__

__

無稽的港式婚姻關係

睇咗今日《蘋果日報》財經版「好不主席」專欄真係有感而發



其實又係「麵包與愛情」嘅問題。港女們成日諗住結婚生仔是必然嘅事,繼而就諗結咗婚就應該生活安定,如果仲有憂柴憂米的話真係唔知點生活、點撫育下一代。於是乎去到所謂適婚年齡揀對象就要事業唔有成都要安定下來。Joycelyn 講嘅呢個case 其實反映大部份嘅港女寫照,只爭在選擇咗麵包之後有無程咬金出現,又或者出現咗又繼續要麵包而認命過埋下半生,抑或「走佬新娘」;甚至結咗婚生埋仔以為擁有幸福但實際上係不甘寂寞而紅杏出牆。呢啲情況筆者身邊見識過唔少,亦不分男女,結局各異咁解。有的就婚姻以外有另一段感情「調劑」,有的就找SP滿足一下生理或心靈需要,嫖妓亦大有人在,離異收場也有見過。

問題係文章所描述呢種心態之下達成嘅婚姻,或對婚姻的期望,根本唔係一種正常而健康的狀況。即使是港男也有抱著「到了適婚年齡就要結,搵到呢件叫算係OK 咪娶囉」嘅心態。但不論男女,就是一段婚姻關係根本切合唔到對方的需要,包括生理同心靈,出問題根本爭遲早。只可惜香港人大多數看待婚姻都是如此,斯文啲嘅講法就係人云亦云,粗鄙而直接啲講法就係「人死你又跟人去一齊死」。根本就無幾多人想清楚自己需要的是一段怎麼樣的關係,又或者係香港實在係一個「只會人云亦云」嘅社會,唔跟住前人走就像一頭怪物。但我倒想問道「到頭來出事的話,要承受的是你自己抑或街上的路人甲?」

甚至小弟聽過再迂腐啲嘅「老婆梗係要賢妻良母,唔係點安置好頭家。要玩梗係响出面架啦!」或者女性版本「老公梗係要嚟照顧自己生活。要玩嗰個梗無可能响屋企」。大家該總有聽過「男有男嘅出去玩、女有女嘅出去蒲」去形容某對情侶、夫婦。這就想引用該是「全港最大膽女主持」講過「男人响屋企食得飽又覺得好食,仲點會諗住要出街搵嘢食唧」。或者道德塔利班影照的心理下只會覺得這返話是不合體統,那我就要問到「點解一定要去採野花」呢? 現實中我問過好幾個朋友,要不是沉默不語就說甚麼婚姻觀念就是如此。

講到尾,二人結合就是二人之事,床上水乳交融、床下都能相處融洽與否都是兩個人之間去承受,但看見結婚相也是一式一樣的在立法會大樓、電車路,用著相同的打燈方法,婚宴前播著一式一樣由童年到結婚的SLIDE SHOW,但到頭來連出外用餐也只是各有各食、目無表情毫無交流,甚至是貌合神離。

我想問,這是你想要的關係嗎?!抑或只是繼續有如阿源的名言「這些機會不是屬於我」就認命渡餘生?!

也許更要想清楚,人云亦云、跟風行事之下,「無知」真的是福?
返回主頁

沒有留言: