__

__

從未如此瘋狂 - 1:32 樂基三菱 MM828 旅遊巴製作全記錄

小心!! 極長篇兼極多圖!!!

砌模型多年,通常都只係跟說明書用原裝材料砌咗出嚟就算,從來無大改。但自從Aoshima bunka 青島文教推出1:32 三菱旅遊巴系列,就一直想砌返响香港見開的車款。



但模型係MS AERO QUEEN HIGH-DECK,香港其實根本就無完全同一款車,東洋 Space Bus 的也只是普通版MS-815,車身比模型的矮,所以整任何一款都只係造返個車身圖案出嚟。
連同同系列的MM-827 / MM-828,香港有用過呢款車嘅公司都有唔少,包括JTB、冠忠/泰豐,CCT,還有今次主角 ── 非旅業界中人只知朵花的樂基旅運。

樂基原本有四架MM828,車牌分別係GY 4709,HZ 5022,HB 7099 同我選擇咗用嘅 HB 8129。但早在08年左右已撒手人寰,換上了四部中港車身的MAN 18.280

正如前述,模型並非响香港見到的實際車款,要改裝車身的工程非常巨大,一開始就決定不改車身,而著重於車身同車廂塗裝要盡量貼近真車。當年就係揸樂基車因利乘便
估我唔到呢!!!!
(Photo by  Leslie Chan at 2009 東亞運動會開幕禮當晚)
影低唔少相片,整項工作變得極為方便




有真車相片對照,就可以順利開工。不過,受到寬敞戶問題要同房署周旋,身心俱疲搞到買咗盒模型返嚟成三年都無開工,後來都的起心肝郁手,第一件事當然係處理車身噴油。

先用沙紙將模型本身有嘅絲印圖案磨走,然後噴底灰


跟住就準備噴淺綠底色,不過這是惡夢的開始。因為我無噴筆,但罐裝油並沒有這種綠色。只能在油麻地中南文具找到最接近、但仍然偏深的顏色。結果用上最冒險的方法 ── 噴上該隻綠後就用白色噴油「飛」幾層油霧上去。算是得出最接近的效果


然後的先噴一層光油作保護,就貼膠紙遮蓋,準備噴裙腳的深綠色。這次好彩,雙星TS-36 算非常準確




然後再噴一層光油。車殼底色完成!!

車底沒甚麼難度,都是雙星TS-29 搞掂。但懸掛的氣袋底座,還是參照真車,油上XF-56


車廂地台可不是油,而是仿照真實裝嵌巴士般「貼」地台膠,用的是在文具店買到那些一大捲的貼紙。還用上一款「不銹鋼紋」貼紙,裁出3mm 闊度扮真車上的鋁角

留意下,模型的地台是預先鑽孔安裝座椅的,故貼好「扮鋁角」後,還要裁走該部份的貼紙。

到要處理座椅時,又來另一場惡夢。因為Aoshima 極度仆街地只按真車的提供櫈腳數目。而我買的呢款係1+1+1 佈局29座位。結果要做一件最敗家的事 - 買多一盒,但惡夢還未完。
因為買多一盒回來,也是1+1+1佈局,沒有提供車窗下的「旁碼」組件,要自行再想辦法。後來上網SEARCH 過才知道,如果盒面是「趟窗」才是2+2佈局45座位,有齊足夠櫈腳同有「旁碼」。想好似我咁瘋狂嘅朋友要留意!!

同樣地,也是將座椅噴油,先噴底灰統一底色,再噴TS-36,然後噴兩層GUNZE 101 校深隻綠色,再然後就噴啞光油扮絲絨。至於櫈腳連扶手就油上XF-24,扶手頂的「膠」則油上GUNZE 水性76


「旁碼」是用上0.3mm 膠片加2mm U型膠條,然後固定於黐好的車門側儲物櫃/司機擋板和尾排座椅地台。接著就安裝全車座椅


將車廂黐上底盤上

底盤大功告成!!
留意下枝波棍,模型本身是「日本版」JOYSTICK 的電索波,用「拉天線」方式造返真車的「地拖棍」波混出來

接著下來,與房署周旋失敗,準備搬屋而停工了。
復工後就集中處理車身上的三朵花。在廣華街「生暉模型」找到了TESTOR 的INK-JET 自印水貼,諗住無死錯啦。用ILLUSTRATOR 劃好印出嚟,再跟程序噴上保護劑。點知......

無論白底定透明,還是非常透底。計劃失敗!!!

結果要用上有如真車噴油的方法 ── 貼紙鎅稿上油

花瓣是X-17;花瓣邊的紫色是X-16+X-7;花蕊米黃色是X-2+X-8。溝定一大樽,之後仲有用

油好三朵花,用1000號沙紙磨邊,再執漏。完成後就噴上兩層瀝架,再磨多一次使表面平滑,然後再噴一層瀝架同防UV光油。然後就用2mm 膠條造橙槽外殼,用「鴨記」LED 白光燈條裝在其中

試好燈證實無問題後,就裝上行李架、車廂天花、車窗等最後工序


1:32的HB 8129 歷時近五年,終於大功告成!

後記:
內文都講到砌這架巴士的過程,同時經歷著被房署迫遷。弄到患上了抑鬱症也公開講過。但完成了這架巴士的一刻,彷彿「搵返自己」。也許是玩了這嗜好多年,難得重拾心情完成,更是整個過程是從來未試過的。

Whatapps 照片俾舊老闆,第一句劈頭埋嚟「俾咗我」,我回覆「砌得咁辛苦,唔捨得」。人稱「飛仔昌」嘅佢,係好臭脾氣,但其實佢好有情有義。這也是我選擇整這朵花而不整較簡單的JTB或其他圖案的原因

家中還有一架以前從廈門拎返嚟的XMQ6127 模型,早已拆散,也是準備造這個圖案花款。又睇下幾時再大空完成埋佢。
甚至見到十多年好友LESLIE 將兩架像真度頗高的TOYOTA COASTER 短陣合二為一,改裝成台灣車款


搞到我又心思思想整架昔日的「戰車」出嚟


至於「敗家」買多咗的一盒,剩低的零件會留下來。車殼該會為同是「擺咗十世」的朋友準備嘗試呢個圖案

底盤、座椅就已有打算。到時再同大家分享。


延伸閱讀 - 砌模型沒落?

返回主頁

沒有留言: