__

__

高鐵、三跑,就是為了「收回」香港

高鐵再爆大鑊,超支50%,就連田北辰都有發火 (有少少褪軚跡象),仲有「一地兩檢」仍未解決,搞到就算落成通車,繼續人人只能坐响地底17分鐘就要落車過關嘅打算。回望返反高鐵運動時,呢項質疑嘈到拆天都無人理,你話港燦們係咪抵撚死吖!!

「一地兩檢」懸而未決之際,我先同大家回帶舊年5月7日《蘋果日報》爆出西九總站圖則在B2及B3層均預留大量空間俾共匪兵團進駐設立出入境櫃枱 。當人人大嗌咁做即係違反一國兩制,但點解仲會有呢個設計? 當人人都嗌「我接受唔到」嘅時候,小弟同大家睇一段新加坡歷史:

1965年8月7日馬來西亞聯邦國會通過驅逐新加坡議案,8月9日正式實施迫使新加坡獨立,相信都有一少部份香港人知道。但「新馬分家」一事係有一份詳細協議,最多人知(甚至拎嚟抽水) 嘅其中一項係維持供水協議嘅有效,但有一項無乜人知,而可以對照香港高鐵嘅一項條款,就係新馬鐵路沿線主權。

新馬鐵路新加坡段由柔佛州邊境嘅兀蘭(Woodlands) 南延至李光耀選區嘅丹戎巴葛 (Tanjong Pagar) 火車總站,根據新馬分家協議,呢段路軌沿線及丹戎巴葛火車站的領土主權,仍屬馬來西亞聯邦所有,當時馬來西亞警方就係响火車總站入面設立櫃枱為所有火車乘客辦理出入境手續。


李光耀當然唔妥呢個咁膠嘅安排,但被東姑拉曼威脅住「一係走,一係用ISA拉晒你哋班PAP友」,有得唔受咩?! 獨立以嚟不斷同吉隆坡拗數,但巫統班賊當然賴死。直到2011年7月1日,新加坡政府正式在兩國政府簽署協議之下,收回呢段路軌嘅領土主權,並隨即展開拆除路軌工程。

西九總站嘅出入境櫃枱安排照正常就當然係違反一國兩制,但如果應共匪要求「學習新加坡」,即係參考呢段歷史將高鐵香港段沿線土地主權移交俾中國共產黨,而港共傀儡政權聯同立法會入面一眾媚共政客…..
莫講話一國兩制蕩然無存咁抽象,就是解放軍用高鐵殺落嚟西九展開大屠殺,又或者响菜園村捐出嚟响元朗、屯門大開殺戒,真係完全合情合理,仲要係合法!

最重要係共匪咁就CAP 咗一大片香港領土主權同控制權,仲有再細心留意,就係將新界同九龍劈開兩邊。到時想好似搞掂西藏咁全面接管香港,落實一國一際,真係易過食生菜!

至於三跑計劃,其中一個爭拗重點就係「空牆」問題(詳讀《三跑唔一定要起,機場都可以發展》一文)。機管局、民航處成日話「只要落實三跑,空域問題就會解決」,但我同(已離開)的「機場發展關注網絡」叫佢哋公開一啲保證「空域問題就會解決」嘅文件,追殺咗十世莫講話拎唔出,叫佢哋「對賭『高登魔咒』」都睬你都有味。

但睇睇以下呢份空域圖


澳門直頭响「牆內」,唔駛15,700呎出入

機管局、民航處信誓旦旦,但又攞唔出有力證明,真係無法唔陰謀論咁諗,三跑CAP 水都係其次,屈香港交出F.I.R. 主權先係共匪真正嘅目標。

即係話,高鐵就要嚟搞掂個地下,三跑計劃就係要搞掂個天!兩個Project 唔全盤推到,香港人唔只跌錢,仲係後患無窮。

返回主頁



1 則留言:

CL WU 說...

好詳盡~~~
但係文中有D字錯左
如:
原文「8月9日正式實施迫使新加坡獨立,相信都有一啲少香港人知道。但「新馬分家」一事係有一份詳細協議」

應該係「相信都有一啲香港人知道。」<<原文多左個少字;

原文「就係張新聞同九龍劈開兩邊」應該係新界而非新聞吧?