__

__

新民黨交通議題派膠收場


原圖 From Tony Li at Facebook 商用車大本營會員專頁 群組 (原 LINK )

呢幅Banner之膠在於九巴 的Dennis Dragon 12m A/C (3AD)  (下圖同款車) 最後一批車是在1998年服役,即是最遲在明年就會全數消失。

之後就餘下50部最後一款非低地台的Dennis Dragon 9.9m A/C (ADS) ,但也只是用多一年至2017年,而且正常派車是不會行走屯門公路的。

即是話,過埋2016年就唔會再有蘇議員所指嘅「舊車」出現於258D路線,佢要「成功爭取」是必定的。
但只餘下一年左右時間就掛幅咁嘅Banner 出嚟,擺明準備到時掛「成功爭取」討好選民。但對汽車/巴士有認識嘅,都知道成件事擺明就係一宗「識就笑死」嘅膠事。

同類膠事其實响20年前都發生過。1995年屯門公路實施巴士專線,當年屯門區議會有一班膠人動議要求九巴將勝利二型調走,避免因「極速只得65km/h」阻礙其他較新款巴士,影響巴士專線的效率。結果就係無幾耐九巴就調晒啲勝利二型離開屯門,但當時最新而適合屯門區行走的11m 巴士 (即S3BL,S3M,S3N) 「供應有限」,只能換入性能方面其實比勝利二型更不適合行走屯門公路的Leyland Olympian 9.5m(BL),MCW Metrobus 9.5m (M)。

說穿了,蘇嘉雯今次又係做咗阿寶 ─ 人類總要重覆犯錯

其實,呢啲交通議題亂抽水、抽錯水嘅事經常見到。新民黨除咗蘇嘉雯呢鋪派膠之外,田二少一樣出咗事

田二少支持小巴加座位本來搞得好好的,但唔知佢係咪响5月5日公聽會上聽到好多「要求引入低地台小巴」嘅聲音而有少少上腦。


在現行香港法例上,如果小巴要容納輪椅傷健人士,就要好似專利巴士咁劃出一個不小於 1350x750mm 嘅輪椅區,技術理論計算即係要減去兩排座椅(共4個座位)。即係話,假設放寬小巴座位數目真的落實,但同時要減去4個座位,咁即係「攞嚟搞」!! 最大問題係小巴服務的原意是「全座位」,有呢個空間就是白白浪費,同現時法例容許原廠設計20座的長陣小巴但要拆走4張櫈,有乜分別呢!!

以我所知,部份想引入低地台小巴嘅專線小巴營辦商主要係方便長者,輪椅傷健人士唔係唔想招呼,但樣浪費空間得啖笑之餘,最大鑊就係如果上咗一部輪椅的話,其他座椅坐滿就超載,或是乘客和司機會為最後剩低的一張空櫈而發生爭執。即係話田二少呢個建議根本就不可行。

呢個矛盾可以點解決?參考歐洲、英國、台灣、日本,輪椅區設有「摺椅」就是了。


不過,香港班官員「引用外國例子」做法例或政策修訂總是抄啲唔抄啲。明明Cap. 374A Sect. 73 (1A)附表15 沿襲的 ECE-R80 標準是容許小巴座椅「橫向」安裝同摺起座墊 (市區行駛巴士更可以「倒頭位」)



但運輸署執行時,就只容許小巴全部座椅向前,全部固定安裝。(新巴Trident 原本在輪椅區的摺櫈就是這原因而拆除)

即係話,要解決輪椅傷健人士同小巴增加座位訴求的矛盾,責任又係落返去運輸署的身上,唔修改法例,尤其是唔跟返足 ECE-R80 嘅內容,根本就無得解決。亦即係話,田二少呢鋪又係無料扮四條。

返回主頁



沒有留言: