__

__

家陣係選舉定賭波呀

臨近投票日,好多準備投票的人,唔計受中共指揮嗰啲,還在思量到底將手上的選票投給那一位候選人。

而同時地,不論網上還是現實世界,討論選舉事情時,都充斥以下有如賭徒思想的言論:

俾票嗰個,會唔會嘥咗架? 論壇表現咁嘅款,都無機會啦,投俾第二個有機會好過啦
就如睇匹馬晨操無嚟火,响沙圈又好似無嚟精神咁,梗唔買呢隻啦。

民調咁低,都係輸硬啦!
就如賭波睇住走地盤賠率係咁跌,都係買唔落手;

條o靚妹/o靚仔咁細年紀,得唔得架,都係唔投俾佢咯
就如睇馬經時,就算係第四班賽事,一望到呢隻係新馬,或只跑過一兩場連PLACES 都未派過彩,仲買佢? 傻架!?!

等佢變強我就投俾佢囉
就如睇英超聯時,望住車路士,然後一句「丟,等佢上返去先買啦」

阿邊個都應該夠票,投個弱少少抬下佢啦
就如賭馬賭波時,心諗「反正有閒錢,刨下冷囉」

嗰件弱雞到咁,當可憐佢,俾佢等佢唔駛輸按金啦
就如賭馬畫飛嗰陣想著「是但啦,咪睇下會唔會跑第四囉」

呢啲賭徒思想,往往就使選舉結果出現「唔正常」賽果。而走回基本步,民主選舉就是「向你認為最能代表你的候選人投下一票」,而唔係賭波賭馬,或者入賭場埋「大細」或百家樂枱睇走勢然後落注。

再者,要走回最嚴格的民主政治原則,就是任何候選人都有機會當選、落選;又所謂實力表現,尤其是幾場選舉論壇,就可以下定論嗎? 可知道好多人言詞表達能力、辯論急才,同實質做事能力係兩回事的。而「年齡」呢個因素,更是小農奴隸基因 ~ 論資排輩。抱這思想的人,根本就無資格講民主。

反過來講,要評論某個候選人,你可有足夠能力、資料、知識等,去作客觀公正嘅評論咩? 你有無有如董驃、張基、熊良錫,甚至是簡而清嘅功力,識得睇一匹馬响晨操、沙圈嘅表現先?
(唔識佢哋係邊個,就問下閣下嘅父親大人或其他世叔伯)



無嘅就唔該收聲,更唔好因人廢言嗰隻說三道四。9月4日的是立法會選舉,唔係賭馬賭波,更唔係入賭場搖老虎機、玩百家樂。請不要再有這些賭徒思想去看待選舉,更該要停止所有以為驃叔上你身嘅言論!

後記:咁鍾意賭,甚至連選舉都「賭」,小弟介紹你哋班「唔賭唔知時運高」嘅友仔玩台灣人發明,仿傚股票交易嘅遊戲而同時進行民意調查的「知慧交易所」。已經有齊今次立法會選舉五大選區及超級區議會嘅「賭枱」。慢慢玩啦!!!

返回主頁

沒有留言: