__

__

同港燦講港獨



陳浩天、梁天琦 Banned,表面的確帶點悲情,而由梁天琦被港共「搞」嘅時候開始,小弟已經發現平時唔會在網上談政治的,都有share 立法會選舉的新聞,連同街上多咗討論港獨或歸英嘅聲音。加上上週五 (5AUG)唔知幾多千人响金鐘集會,正正是引證坊間嘅港獨意識由隱走向明。

當然,好多人一講到港獨、歸英的即時反應,不是「無可能」就是「共產黨點會俾」。撇除共產黨家陣不論境內政局、經濟以至亞太區地緣政治形勢根本泥菩薩過江 ─ 自身難保,這太深奧的政治分析,單談是有無可能,香港人腦中存在好多盲點,尤其是大多數人受中學中史誤導而有的大一統民族主義觀念,見香港咁細不可能會是「國家」;加上從來都缺乏國際視野,莫說唔會想到盧森堡 (只比香港大一倍)、列支敦士登 (只有香港1/7),就連新加坡都未必明白點解係一個獨立國家。

就是Size 唔係問題,哪到底香港可有獨立的條件,或者香港能不獨立,我是如以下的這樣跟港燦討論。

1. 有無記得97前,香港除政府運作上,有無靠過英國或者係英國插手? 無吖嘛。即係話,整體社會秩序運作就是自己搞掂。只要香港社會秩序去返97前,不就是一個獨立個體吧!

2. 97前嘅香港,尤其是1960-80年代,香港嘅工業出口頂住整個香港嘅經濟發展,而連帶嘅商業活動,包括股票市場、貿易融資等,不就是獨立自主運作嗎? 即係話,香港嘅經濟結構本來就如一個獨立經濟體。的確時移勢易,工商業嘅運作條件唔同晒,尤其是工業唔再單純Mass Production,但唔係無路行吖。例如玩具設計同製造物料安全嘅監察管理,香港响亞太地區贏晒咁滯。

3. 你擔心食嘅問題? 屋企米缸啲米响邊度嚟架? 我依家就食澳洲雙羊,有時就台灣米。你唔好話我知你咁「愛國」食金稻米囉。

4. 又唔該諗返97前,再唔係問返你阿媽,以前買菜有幾多係大陸菜? 依家只因政府為咗幫共產黨借糧食來源控制香港而唔理好多農地都被荒廢,所以先要咁多乜鬼「供港菜場」。OK,你話就算香港啲菜田全部重新有人種都未必夠食,咁全世界淨係得中國可以運菜嚟香港咩? 呢幾年好興食嘅秋葵响大陸嚟架? 仲有出街食泰國菜啲椰菜苗、青咖喱嘅茄子仔响邊度嚟架? 要再講呀,新奇士橙、呂宋芒、地捫蕉响大陸嚟架?

5. 肉類咪又係一樣。之前大陸雞有雞瘟,本地雞農咪話本地雞場出品都夠香港人食,大陸雞唔嚟都無問題。你又估香港無人養豬咩,我依家去街市,一定係去嗰檔排晒長龍嘅「本地豬」嘅豬肉檔買的?!仲有,去飲結婚酒嗰隻乳豬全體,來貨地係越南而唔係大陸呀。

6. 你話共產黨一嘢CUT 咗東江水就玩完。雖然目前東江水使用量大約六至七成,無咗真係唔掂。但你無聽過海水化淡廠咩? 新加坡以前都係依賴馬來西亞供水,依家就係主力海水化淡,唔單只搞掂國內逾60% 食水使用量,馬來西亞今年持續乾旱,隔離個柔佛州要新加坡反方向供水添呀。如果快快手手起返三五七間海水化淡廠,話之共產黨斷水兼斷埋財路啦。

7. 香港無軍隊係事實,但記唔記得97前有「華籍英兵」呢様嘢呀? 記唔記得鄧梓峰就係華籍英兵嚟架? 或者要你哋啲仔服兵役我諗你哋真係情願移民好過。但就算肯服兵役,防務嘅嘢自己做唔晒,搵人幫手囉。可知道新加坡有自己軍隊,但同時亦聯同英國、馬來西亞、澳洲及紐西蘭簽咗一份聯防協定,有軍事入侵就即時有援兵。點解香港唔可以行呢條路呢? 再唔係就簡單啲,就由返英國佬管的話,咪好似97前咁英軍駐守囉。

8. 就深奧少少講政治,當係英國返嚟香港管,又係咪真係殖民地二等公民先? 可知道依家仲姑且叫做英國殖民地,正確名稱係「海外屬地」,議會同政府運作根本唔關英國佬事。共產黨一直唔俾香港有嘅普選,响嗰啲海外屬地就完全有得選之餘,英國佬係闊佬懶理,只係派個總督負責响議會通過嘅法案畫龜,同埋有外賓嚟訪問做迎賓架咋。甚至講個最誇張嘅,百慕達癲到英女皇壽辰唔係法定假期,英國佬鬧都無鬧一句。唔明就簡單啲講一個比喻,即係肥彭返嚟香港住返响港督府,但就唔再係立法局主席,開會唔關佢事,淨係响通過咗嘅法案上面簽名;行政局亦唔係佢開。蔡英文嚟香港訪問就去機場接機,夜晚就主持歡迎宴,講兩句食埋餐飯就返上亞厘畢道瞓覺。

以上八個論點中的1-5,其實係帶返港燦去返1970-1980年代,證明香港就是具備獨立嘅實力;而 3-6 就係說明香港依賴中國才能生存根本是假像。不過,提提大家,港燦對「海水化淡廠」嘅認識絕大多數還停留於樂安排同火力蒸餾法,新加坡、以色列嘅逆滲透化淡技術近乎完全無知。
第7係針對又是民族主義大一統教育而成有關防務只能自已做嘅思想,現今國際軍事情況根本好難每一國家獨力支撐。至於第8 不單純是強化歸英論述,而係順便拆解埋第7 相對於「西方列強殖民主義可恥」嘅問題,強化有其他國家協助防務唔係乜嘢其恥大辱。

通常聽晒之後,就算無開晒竅,都起碼知道香港脫離中國係唔駛死的。若再討論埋英國嘅政治形勢,大多都會明白「英國佬唔會再理香港」未必係事實。

後記:
我個人立場係主張歸英,原因不單係香港嘅防務能力真係almost to be zero,仲有香港真係未有管治人才,更是19年嚟被共匪搞到學壞晒,好多管治嘅能力同思維要由頭學過。而香港過去嘅政治、經濟、民生等嘅社會秩序運作的確係英國佬所建立,唔學返英國嘅一套根本就死路一條。再者,香港要脫離中國最有效、最快同最直接嘅方向就是《中英聯合聲明》失效。在國際法等法理上,聯合聲明失效即係英國恢復香港主權。而之後如果要走向獨立,最少可以有三條路走,包括共和制、中立國,同埋有如加拿大、澳洲「奉行西敏寺法」。

延伸閱讀
港獨有乜唔得!
香港要獨立,最難嘅係港燦個腦

返回主頁

沒有留言: