__

__

劉迺強你都對得住黨咯

《成報》接二連三以頭版爆大鑊,除咗鬧爆統監府張匪曉明同689之外,還燒到青年新政頭上。

今日 (11SEP) 的頭條標題,直爆張匪曉明同689根本一直圖謀政變篡位,佢兩個加埋例如張匪志剛等嘅黨羽準備坐洗頭艇都唔怕。內文提到青年新政,特別指名道姓游蕙禎是「內應」,好多人就睇到上晒腦,特別係應該躝返去台灣新北板橋湊孫同睇實「大漢」嘅黃毓民啲教徒信眾。但事情真的這麼表面同簡單嗎?!

游蕙禎係咪共諜,呢一刻都無人會答到。但正如前篇《李光耀都俾人傳係馬共》提過,鄭永健事件最終曝光源於佢拍枱的堅決要報警,唔容讓組織內其他人打算揸流攤式處理包庇佢。單從呢件事去睇,要是她真的係共諜,佢嘅演技都真係一流,呃到全世界。但是要留意《成報》9月3日嘅頭條內文其中一個重點係講青年新政嘅身世,尤其是劉迺強一直所做的。




大多數人只知劉迺強依家係中共政協,算係所謂中共紅人。但要了解劉迺強呢條茂利,就要認識佢由1980年代開始所做的如何破壞香港。

劉迺強自1970年代以來一直於《信報》寫文章,雖然主要是經濟和管理有關的題材,但別忘記那時香港正吹起一鼓「認中關社」嘅風氣,不能排除他早就潛伏伺機;及到1980年代初,就重點評論政治。

根據當時為《信報》編輯的林保華向我所述和提供的歷史檔案,劉迺強當年分別以真身及筆名艾凡,幾乎每週撰寫合共近4000字鼓吹民主回歸。而他在1982年聯同楊森、高達斌、馮煒光等人創立「匯點」,更將民主回歸論的呼聲高唱入雲,掩蓋了香港革新會《星島日報》兩個民調結果是絕大多數港人支持 (分別是70%及76%) 繼續由英國管治嘅呼聲。再加埋司徒華為首嘅教協一唱一和,卒之促成咗 4%民意變成主流聲音的局面 (實踐了毛澤東的「謊言講一千遍就變成真相』),亦即是導致到今時今日香港淪喪於共匪手上的亂局。而基於呢段歷史及劉氏在當今中共的政治地位,加埋高達斌、馮煒光等人的表現和所得到的政治酬庸,更可以好肯定民主回歸就是中共自編自導自演的戲碼。

但是,中共的政治倫理就是要維持個人的利用價值才不致會被用完即棄,劉迺強响 97 後仍然動作頻繁,但每每都是唱紅打黑模式惹來社會反彈,雖然他的確是透過「製造麻煩然後解決麻煩」的呃到飯食,但政治影響力逐步轉弱亦是事實,尤其是江澤民派系換上了張匪曉明之後,以至689登位,他在台前演出的機會更進一步減少,2012年1月他在《信報》的欄位被撤,正反映佢嘅政治地位亮起紅燈。很自然地,他就是要尋找機會重振個人聲勢、不被黨所拋棄。

佢個仔劉方在2006年任港大學生會主席,而《成報》提到的「香港社區網絡」成立於2010年,Timing Facts 是刎合的,並引證劉方幫老豆抬轎 / 老豆要個仔幫拖的情況存在。可但是姑且以《成報》指的演變出青年新政的推論,確實證明青年新政嘅背景「有問題」,甚至是到今日仍然鬼魅處處不是子虛烏有。但又要留意返鄭永健事件的背景同始末。

鄭永健家人响尖沙咀亞士厘道經營食店,要注意的不是賄選事件被揭發的其中一個案發現場,而是食店可會促成佢同劉迺強父子的關係、有甚麼聯系。雖然沒有太多的消息或風聲確立呢個推論,但聚焦於賄選事件被揭發,形同鄭及其上線的行動和計劃遭摧毀,所指的不僅是所謂鎅票計劃,仲有係如何利用青政去做政治佈局幾乎被Total lost。而如果鄭的上線真的是劉方、甚至就係劉迺強,你係中共會點睇佢老人家吖?! 粗俗啲講就係「你劉迺強衰响個MK妹手上,仲點睇你老哥兩父子台戲呀!」

或者大家睇到頭都大埋,先整理一下個局:
《成報》屬習系就是很明顯的,習系要對付的是江系,在港的目標就是張匪曉明同689也非常明確。但要真正出動洗頭艇或策動「輔仁文社命案」之前,總需要「掃垃圾」的吧。而既然劉迺強應該因為青年新政孭咗隻大黑鑊,俾著你係習總都會先行解決佢。

至於點解不斷提及游蕙禎,我認為就是鄭永健賄選案,亦即是劉迺強隻鑊的「罪魁禍首」(之一)。只有將這位小妮子拖落水,講到佢好似為劉(以至統監府和689) 執行緊任務,引證劉迺強有份參與張匪同689嘅謀反,但同時 Show 埋佢到底有幾廢,習系先至有足夠彈藥先行「隊冧」呢位由民主回歸到搞到今日香港立立亂嘅麻煩友兩父子,兼部署緝拿張匪曉明同689!即係呢,又是直咇腸去理解《成報》的爆料,都係會錯誤理解。

還是那句,游蕙禎係咪共諜,呢一刻真係無人講得埋。但從鄭永健事件,再加埋細心觀察九龍西選情,最少三條名單 ── 黃毓民,林依麗同李泳漢,甚至還要加上何志光就四條名單,擺明車馬就是針對游蕙禎的佈局來看,她就算真的是共諜,都唔會係屬於要拿香港做人質嘅江系。不過,從我超過一年嘅觀察同認識了解,佢可能似李光耀女兒、夠膽同阿哥李顯龍就父親遺囑問題近乎大打出手、暗串阿哥「欲借助將父親神明化鞏固自己地位」嘅李瑋玲醫生多啲。但當然,正如民主回歸論一樣,政治嘅嘢就是要時間引證真相。姑勿論游蕙禎的身份如何,劉迺強兩父子响中共嘅地位「係咁先」就是不爭的事實,大家該可以聽/睇少一個廢人廢噏。

返回主頁

沒有留言: