__

__

19座位為平衡其他運輸業利益只係藉口



運房局向立法會交通事務委員會提交文件,同意放寬小巴座位上限至19座位,主要原因是要平衡專利巴士同的士業界嘅利益。

呢個所謂理由不過是老調重彈。而又反過來問,政府調整專利巴士嘅經營,有考慮過小巴嘅利益嗎?的士佬從小巴載唔晒撈到生意,唔係破壞緊小巴嘅利益嗎?單是呢兩條問題,小弟响2015年5月12日提交俾立法會嘅意見書已經提出,但運房局依然選擇性失明,就唯有再次開火。

首先,好多人唔明點解我會就小巴業界做嘢,甚至有人大做文章暗指為利益做事而唔係為社會公義。真正在現實中認識我的人,會好清楚知道我同運輸業 (包括銷售、維修、營運) 有源遠流長且廣闊嘅關係網絡,亦同時好清楚$$係唔會推動到我去做事。另一方面,就是响運輸業打滾咗咁多年,好清楚知道無論客運還是貨運中不同範疇嘅响社會公義層面嘅問題所在;而問題總會涉及到經營者嘅利益,是無可避免的。只不過小巴政策有關嘅問題近年來比其他運輸業嘅問題來得大且清晰,先至講/寫得比較多而已。

另外,姑且「抽死人水」── 的士小巴權益關注大聯盟秘書長黎銘洪先生在生前與我交情非淺,不單有乜飯局都會叫我出席,平時還給我很多教導,是我的良師益友。他生前成日同我講的士同小巴業界嘅問題,問我有何睇法和可會「諗計仔」幫手搞掂佢。當他病榻床上,我到醫院探望佢「吹水」時,話題還是離不開「柴油的士」同「小巴加座位」。到最後幾日,我同佢講「黎SIR 唔好擔心咁多,總之『柴油的士』同』小巴加座位』我會打掂佢」,雖然佢只能輕聲說話,但就同我講「林仔,你俾心機搞掂佢」。可以話,我係執行緊黎秘書嘅遺願。而佢對小巴座位嘅立場是「點解限咗大細仲要限埋座位數?限咗7米又好8米又好,裝到幾多個位就幾多個位囉,點解唔係好似巴士咁用到幾大架車就幾多個位?」,故此我對19座位座位呢個數係絕對唔滿意。同時地,黎秘書生前亦是受小巴業界的俸祿「開飯」,故此我好夠膽講,邊個仲係用「利益」嚟質疑我同各路友好所做的,不單是抹黑,更是對黎秘書的不尊重。

之前一篇《皇冠車行食得禾米多》提到19座位根本係運輸署同豐田代理皇冠車行嘅官商勾結。而半年以來好彩地我無收過律師信要告我誹謗,即係話我有無吹水唔抹咀就大家心知。

只不過可以同大家講,「19座位」其實係政府提出嘅方案嘅Version 2。咁Version 1係乜? 其實係18座位


熟悉政府運作的,會好清楚知道所謂紅色小巴業界意見只不過是借刀而已。

背景是咁的。先留意政府今次份文件第18段,闡述將會於明年中展開低地台小巴試驗計劃;由去年公聽會以來,小巴加座位嘅同時要求引入低地台小巴,方便長者以至輪椅殘障人士使用小巴服務。即是政府嘅立場非常清晰,將「加座位」同「低地台」進行綑綁處理。

2016年6月18日《經濟日報》報導指目前全球車廠生產的低地台小巴,只有Hino Poncho 係完全符合目前法例的車身尺寸上限;又小弟在2015年5月12日提交的文件第20頁大踢爆「Hino Poncho (7m 規格,廠方代號 HX9JLBE) 的單門版本就是18座位」

放大中間個表:


好明顯的,「18」不是為Hino Poncho 度身訂造,真係搵鬼信!

運輸署車輛安全及標準部班貪官見事敗,焗住要搵諗第二個數字。只是在18,20定24之間,運輸署班貪官搵到人口增長與需求比例嘅數字遊戲,即2016年7月7日《明報》刊登小弟撰文〈只差一個位要大動干戈?〉中提到的:
政府是將1988至2014年人口增長163萬,增加3個座位的增長基數萬分之0.018,與1976至1988年人口增長110萬而1988年增加兩個座位的基數相同。
在配合豐田Coaster XZB50 (或將在明年推出的B70系) 「不能裝設第20個座位」為皇冠車行抬轎,將現時市場另一競爭對手三菱ROSA BE640G 能裝設20座位的優勢作斷頭式殺害,以使豐田維持絕對優勢。

至於豐田Coaster (不論是目前的XZB50還是明年的B70系) 的「第20個位」的問題,運輸署不過是利用其官威向公眾和議會表達「有危險」嚟DQ,即係恰市民同議員唔識。

稍為再講遠少少,「19座」思維的背後是1997年三菱推出BE6代目Rosa時,加推長度7730mm設計 (用450mm座椅可佈23座,380mm座椅則可佈29座)

而當時豐田Coaster最長只有6990mm 的HZB50 / BB50(用450mm座椅可佈20座,380mm座椅則可佈24座)


銷售量暴跌,直至皇冠車行與日本豐田車廠協商推出「駁陣」加長至7725mm的BB59

先至收復失地。

但始終有旅遊巴士公司因為三菱ROSA「載多一個客」而唔買豐田。即是話,如果政府訂20座位就有可能重演這段歷史,但訂19的話,三菱失去了「多一個位」嘅優勢,而皇冠車行就可以繼續壟斷市場稱霸。

大家或許會問,既然豐田其實都有可能做到20座位,政府為何不以「皆大歡喜」的取態呢?只要參透毛澤東名句「消滅於萌芽之時」和「有利於我不利於敵」,就會明白「19座位」才能使皇冠車行立於不敗之地。

相信大家讀畢都會清楚見到「十九局長十九座位利益輸送皇冠車行可恥」唔係鳩嗌口號搏sound-bite見報,而係徹頭徹尾大包圍式為皇冠車行度身訂造嘅政策走向。所以,就算進智公交(HKEX:00077)CEO 陳文俊話「收貨」,我都唔會就此罷休。加埋自2003年以來見盡運輸署驗車組各種黑幕呢啲涉及公眾利益嘅私怨,我就是會武士道精神戰鬥到最後一刻,起碼就算輸咗都能問心無愧。

後記:
1. 本港市場已出現多一款「超過19座位但長度唔會超過法例」嘅小巴。小弟已於早前去試過車,駕駛同乘坐表現唔曳。稍後另文詳講;
2. 已收到消息,明年農曆新年後,將會有一款唔超過現行法例上限 7.0x2.3x3.0m/h,裝設了26個座位嘅車會到香港。即係示範就算20座位都仲係浪費許可運載能力。

延伸閱讀:
回應運輸署署長今日在交通事務務委員會上有關增加小巴座位言論
回應明報、蘋果日報報導運房局否認失實

返回主頁

沒有留言: