__

__

運輸署驗車黑幕黑到嚇死你

放寬小巴座位上限呢個議題,單純由舊年立法會「公共交通策略研究」及前期放風起計已經兩年。政府提出方案由18變19,再變到12月16日民建聯劉國勳及民主黨林卓廷分別動議要求提高到20座位,除咗啲巴膠塔利班之外,市民都普遍歡迎。但當中的數字變化,小弟講過好多可能涉及政府同皇冠車行嘅勾結,就好多市民頂多都半信半疑,更有啲懷疑運輸署車輛安全及標準部和驗車官們係咪真係咁夠膽做小弟所講嘅黑暗事。當然,呢一刻還未出現ICAC可以請人上去飲咖啡嘅證據。不過,小弟自1998年以嚟有好多親身經歷呢啲黑幕,不妨漏一啲俾大家睇下。

話說2003年,小弟一夥「愛國情懷」(依家睇返就當然係愚昧) 推動「祖國」汽車工業發展,引入廈門金龍 (KING LONG) 旅遊巴士嚟香港。第一部去運輸署做Type Approval 就係呢架XMQ6885


即後來的車牌FA8198嗰部。

「第一部大陸車」就當然俾人雞蛋裡挑骨頭,捉呢樣唔啱、鋤嗰樣爭少少。瘋狂到連車燈要逐粒燈胆拆落嚟,睇Marking 有Philips 字樣都唔信,要搵萬用錶度電值。

姑且正面一點睇,就是「第一部大陸車」啲驗車官驚孭鑊,咪同佢哋合作下囉。其中一項被「趷」的,是車尾指揮燈大細。驗車主任真係搵呎量度,然後Quote Cap. 374A Sect. 114 連同附表9,話唔夠80sq. cm。無得反駁,就唯有諗計改。

同廠方傾過之後,就將原本尾泵把上的後霧燈的紅色燈殼 (下左圖) 改為橙色燈殼 (下右圖)


再改埋電線接駁原本的指揮燈,合併二盞指揮燈嘅面積嚟Pass。

可是,後來由曾為香港汽車會副會長江日雄經營嘅祥龍汽車引入中通客車,其中一款LCK6918 37座旅遊巴


尾燈一望都見到盞指揮燈細到呢......


但就無要求佢換/改/加,以達至符合 80sq. cm 要求。唔知係驗車官走漏眼,定係望到「占士江」個朵夠響,就隻眼開隻眼閉喇。

再其實,另一部KING LONG 樣板車XMQ6118,即後來的車牌LR 873 嘅指揮燈有類似情況,

但就可以簡單一啲,將指揮燈(圖中尾燈較近中間的「白色位」),同倒車燈 (最底嗰盞) 對調就OK。

不過採用同一組尾燈OEM 件嘅亞洲車身廠出品,就無要求對調囉!


以上呢啲,極其量只係行政失當,就算申訴專員公署開快勞都可以好容易拆到擺平。但後來响2010年所發生的,就埋下今次我借近年交通政策議題玩大報復嘅伏線。



是的,當年我有份主理廈門另一家車廠「金旅客車」嘅香港代理業務。利伸:已於2012年退出金盤洗手。日前HK01報導嗰架「20座位」唔關我事。

當年呢款學童小巴出去九龍灣驗車中心驗車時,驗車官先後三次表示「豐田呢忽唔係咁喎」「豐田嗰忽唔係咁喎」。

頭兩次,一齊出去的維修部師傅話「呢架唔係豐田」。到第三次,我一嘢爆seed:
家陣你哋做嘢係跟374A定豐田車廠 MANUAL?
你哋出糧係出公帑定皇冠車行,定係兩份都收晒呀?
四個著製服嘅狗官即時黑晒面;時任九龍灣「坐館」蔡志熊 (近期已調任警務處高級汽車檢驗主任(交通總部))9秒9速逃。

可是班驗車官仍要玩嘢,包括指車尾太平門要「無論任何情況都要開到」,那管我引用Irizar Century 旅遊巴嘅太平門係相同操作方式,都話唔得;再然後就話車廂仲有空間可以俾人「偷雞」擺多兩張櫈,要加一啲護欄,可是豐田的BB50 學童小巴.....

大家响街度睇到就會明,我唔詳講喇。

順便一提,XMQ6885 要做環保Type Approval 審批時,一樣俾環保署流動污染源管制組玩咗鑊金。

XMQ6885 是採用Cummins ISBe 220 30引擎,同當年差不多相同時間到港嘅珀麗灣Dennis Dart SLF 係同一副偈。申請程序會係同一套文件。但是Dennis Dart SLF 嘅申請批出「遲來先上岸」,XMQ6885的就係咁拖,唔係話睇緊就話要提交補充交件。

直到後來我引用Dennis Dart SLF 個case 迫宮 (已經拖咗三個半月),就死死氣約我上去EPD 寫字樓開會 (稅務大樓45樓)。EPD 當時嘅主任劈頭第一句「林生,你都明白大陸提交啲文件資料嘅真確性我哋要好小心謹慎」,佢都未講晒我就拍枱爆seed
你懷疑我交假文件上嚟嘛。得,我依家就乖乖地坐响度,你即刻過去對面軍器廠街,叫商業罪案調查科嘅警員上嚟落孖葉塔我返去慢慢查。
四日後,EPD 打電話嚟「麻煩帶埋公司印上嚟攞(批出審批)信啦」。

以上嘅「故事」的確係小弟同運輸署同環保署嘅私怨。相信有些私怨大過天嘅巴膠巴敗等會抹黑小弟不過是在「公報私仇」、借所謂社會公義撈取政治籌碼云云。但運輸署有如港共公安一樣咁「搬龍門」演繹法例,就是無得反駁我嘅事實。港共公安就奉港共傀儡政權唆使去做嘢,運輸署同環保署有乜動機咁做嘢,應該唔駛我再多講。大家該同時地理解到,18座19座到底有幾大可能性涉及官商勾結利益輸送,甚至是涉及貪污,並非我吹得就吹。

而過去一年多以嚟,我從運輸業界收到三宗驗車「搬龍門」事件,雖然不一定是惠及豐田,但就是驗車官們好學唔學學共匪主子釋法咁隨個人意願演繹去進行驗車,就是社會公義層面的事情。

奉勸各驗車中心啲阿SIR好自為之,唔好再搞三搞四擺官威;以至車輛安全標準部終極大佬,行內人習慣嗌佢做「毛李」嘅李偉文,好好訓示班下屬唔好再亂嚟。否則因為「19座位」會有乜事發生,我唔敢寫包單!

仲有環保署助理署長莫偉全,當日你啲手下做落嘅好事,夠晒鐘要還架喇。加埋「油渣車NOx 排放比電油車高五倍」係 P&P 級數,你唔好諗住定過抬油可以出年提早退休咬糧!

延伸閱讀
19座位為平衡其他運輸業利益只係藉口
皇冠車行食得禾米多

返回主頁

沒有留言: