__

__

驗車從來都係官威與牙力嘅較量

正常又跟足規矩的話,運輸署驗車係根據《道路交通條例》(Cap. 374) 連同附屬法例,主要係《道路交通(車輛構造及保養)規例》(Cap. 374A) 同《道路交通(安全裝備)規例》(Cap. 374F)去做嘢。但驗車官好多時恃住自己係官,然後就小農奴隸基因「官字兩個口」同「官說了就是」發作,擺官威兼以為自己係專家權威,恃住操生殺大權想點就點,想信好多人尤其是搵食車司機、車主同車房師傅都領教過「有佢講無你講」,話肥就肥。但亦有「手鬆」之時,不過講緊睇驗車官心情居多。當然,搬龍門嘅情況經常發生。

所謂上樑不正下樑歪,運輸署驗車嘅惡習風氣,可以話係由署長開始帶起,關鍵就在於Cap. 374A Sect. 4
署長的豁免權力
如署長認為如此作是為了公眾利益,可豁免任何車輛或任何種類的車輛符合本規例或其任何部分的規定。
何謂公眾利益先得架?

先唔講驗車啲技術嘢,單係講返放寬小巴座位上限呢個議題,署長楊何蓓茵同運房局局長張炳良開口「19符合公眾利益」,埋口「平衡其他運輸業界利益」。但是的士佬嘅反對只不過係想繼續乞兒兜裡嗱飯吃(小巴乘客等得耐改搭的士),即係市民俾多咗車錢呢個公眾利益又唔理;又或者專利巴士公司引入12.8m 巴士,每架車連企位載多10-12個人,幾乎相當於一架小巴,影響緊小巴業嘅利益又唔講,即係其實所謂「公眾利益」又係任得運輸署/運房局佢哋點講都得。


(ADL E500 12.8m)

現行Cap. 374A 附表1,整體結構車輛嘅長度上限係12m,即是12.8m 係完全違法。署長或許因為「載多10-12個人」為公眾利益而根據Sect. 4 賦予嘅權力批出豁免許可。但12.8m 嘅Turning Circle 就算唔超過Cap. 374A Sect. 12 (1)(b) 26米上限都好,轉彎點都比12m 佔用更多路面就係事實。過去一年發生巴士轉彎被阻嘅Case的確多咗,但楊太又唔認為係公眾利益而否決。又係一個「署長話點就點」嘅例子!

事實上Cap. 374A Sect. 4而衍生嘅輍免多不勝數。就以巴士為例,除咗12.8m 之外,仲有四個項目:
專利巴士闊度2.55m (原法例上限2.5m)
話說當年E500 推出時,九城新話英國再無2.5m 闊度供應,唔批2.55m 就市民無車搭。咁就焗住署長簽豁免許可。


但是馬來西亞吉隆坡KL Rapid 嘅E500

闊度是修改到2.5m 嘅呢...... (咁即係可以改而新九城唔嗌英國殖民走狗改反去迫運輸署簽豁免啦......)

仲有的包括:
- 單層巴士總高度3.8m (原法例上限3.5m)
- 兩車軸總重18噸 (原法例上限16噸)
- 車軸負重上限11噸 (原法例上限10噸)
呢三項又係有小弟私怨成份的。

話說當年想將XMQ6118提供61座規格,而原本的45/49座規格淨重(Unladen Mass) 啱啱過咗12噸少少,後軸淨重8噸多啲,即係已經好刎水。於是乎同廈門廠方死諗爛諗偷輕架車 (嗱,無影響安全系數)

結果好彩搞到淨重「揩住」12.5噸,加埋62x54kg=3348kg 啱啱好唔過16噸,後軸總負重9950kg,又啱啱好唔過。

又話說後來(大約2005年),想引入XMQ6127

但廈門廠方提供數據唔計頂置冷氣高度已經3460mm,焗住要改用內置冷氣。(後來搞到一鑊粥而最終俾廈門共產黨成功踢走,呢啲遲啲先講)

可但是已故中共國家副主席榮毅仁個仔榮智健嘅中信泰富旗下嘅大昌貿易行轄下嘅合安汽車有限公司接手XMQ香港代理之後,就嚟架頂置冷氣而高度起碼3.6m,總重過硬16噸嘅XMQ6129


而以上三項嘅豁免許可就係响當時差唔多時間「出街」喎......

連埋2.55m、12.8m,不就是引證到驗車啲嘢就係睇邊個「有牙」,夠惡就邊個贏吧!

呢啲「食力」較量嘅事情,唔單只係响商用車方面,就是私家車都有,只不過多數唔係發生响驗車中心,而係响馬路。

一直有江湖傳聞,港共公安擺ROAD BLOCK 係揀車款鋤,本田,Subaru 呢啲係重點針對目標。小弟向夠膽同我漏料嘅交通部警員朋友查證,佢話「你都明『跑數』呢家嘢架啦,唔set 啲 Target,點返去環頭交差話今晚個block做咗幾多嘢呀」

話說小弟認識一位鍾意玩車但唔會飛車嘅上市公司高層,半年前買咗部Civic Type R


無改過任何嘢,全原裝。

某晚佢一如平日「CEO look」咁款揸住呢架嘢响觀塘道被截,公安講明「懷疑非法改裝」要勾車,佢唔服氣同三隻公安理論。朋友問公安「我肯定全原裝。你如果肯定有改嘅就拖,但如果驗完車證實無改嘅,就民事告你哋幾個浪費我時間連埋無車用要搭的士嘅錢claim 返廿零三十萬」。嚇到連個「三柴」都縮而放佢走。

運輸署借調蔡志熊過公安部,呢個問題會否有改善,我不作評論或猜測。只可以講涉及驗車呢家嘢,大家都係熟讀Cap. 374A 拎嚟防身,先會係最佳選擇。

返回主頁

沒有留言: