__

__

我無咁得閒再理保留巴士啲嘢

一單懷疑擅闖私人地方+偷竊事件,確係反映巴膠定唔知巴敗嘅問題仍然猖獗,亦反映保留舊巴士嘅情況依舊。但無端端燒到我度


除咗要出個聲明與我無關之餘,亦順手再講兩句點解呢幾年對保留巴士呢個議題聲都無聲過。

2011年保育尖碼巴總運動第三階段,借勢提出交通博物館呢個概念,本身嘅目的當然係為咗爭取保留尖碼巴總,但同時亦係同一班保留咗古董巴士嘅人打算,希望最終能夠為佢哋爭取到一個俾啲古董巴士安身之所,兼可以將啲古董重新出牌,唔駛再偷偷摸摸掛T牌駛出街。一直有同嗰班人提過,件事變成公共議題先有機會做得成;但亦因為「公共議題」,佢哋亦需要將啲古董巴士履行一啲社會責任,嚟一個所謂等價交換;而同時地我指出會以Scottish Vintage Bus Museum 嘅概念,唔會影響到佢哋用自己嘅錢買同維修架車而形成嘅個人資產價值因素,同時可以達到個目標。

可是咁多年嚟,換來嘅只係响我背後不斷有負面嘅聲音,包括:
車都無留一架有乜資格出聲
係就自己留返一架去搞啦,想「共」咗我哋啲車呀?!
有本事咪自己買返架去搞囉,攞我哋啲車嚟撈政治油水,都有病嘅
無錢留架車講咁多做乜
搞到先算啦,政府會聽你支笛咩
咪搞到連依家要擺架車都諸多顧忌
仲有好多,不能盡錄。

但留意下呢班人嘅思維,講嚟講去都係一啲自私、個人利益為先嘅想法,完全無客觀、認真地諗過到底件事我嘅出發點,連最基本嘅「就係車都無留一架走出嚟幫你哋做嘢」都唔會諗,更莫講話本來我嘅諗法就係因為我無留車,形成一個「中立」嘅身份位置,方便同政府去deal (先唔好理港共會唔會make deal) ,當然更加唔會諗得到啦。

再者,呢班人開口埋口講錢,尤其是某位近期極度高調嘅舊巴士owner (唔開名喇,自己估啦),講錢之餘,「搞到先算啦」呢句我就聽得最多。可是佢又同時覺得自己有錢rebuild 返架車好威威咁,但同時又成日怨「只能掛T牌」。正所謂God is he, Ghost is he,再加埋長期俾人咁串法,那麼既然我就係「車都無留一架」嘅太監,仲同呢堆留咗車嘅「皇帝」急啲乜!! 留返啲時間做返自己嘢好過啦,好撚得閒呀!

啲車繼續擺露天倉日曬雨淋車頂漏水又好,隔離場火燭燒鳩晒又好,掛T牌出街俾差佬逗又好,佢哋鍾意點就點啦,我無眼屎乾淨盲。

不過,咪撚諗住話「超,抽水唔成發爛咋之嘛」,我再講多一次:車都無留一架,爭取到我無著數,爭取唔到我亦無嘢蝕。你哋鍾意繼續私心去睇我過去做過嘅事係閣下嘅自由,係咁多。

延伸閱讀
古董城巴死期補遺

返回主頁


沒有留言: