__

__

新加坡人被馴養到無執生能力




上面呢張唔少人share過嘅相,事發於2016-11-21日,地點係楊厝港路 (Yio Chao Kang Road) 與宏茂橋第5街 (Ang Mo Kio Ave. 5),詳讀The Strait Times 報導。各港燦唔知地點唔緊要,反正呢啲區份正常嚟講你哋唔會去。

重點係壞咗交通燈,全部車塞死去唔到,無人有intention睇下點郁動啲車散水,拉手制等警察到。

換轉响香港發生呢啲事情,起碼的士佬、貨車佬,又或者如我慣咗响路面「碌」,就會落車睇下點環境,諗下點褪車同幫手睇位盡可能散咁啲車,等警察嚟到唔駛煩而只係指揮交通直到交通燈恢復為止。

已可見到坡佬真係無港燦咁醒。

但呢類膠事前日又一單,又係响宏茂橋

原LINK: http://www.channel8news.sg/news8/latestnews/20170404-sg-amk-traffic-jam/3651106.html

又再假設發生响香港,應該會有十零廿個人幫手推車,將其中一部巴士推去同一條行車線,或就算唔敢攞軚 / 著唔到車軚箱無咗液壓輔助攞唔到軚,就推前大約兩個車位 FOR 足夠空間俾車過。起碼可以慢溜而唔會塞死。

新加坡人真係鈍到咁嘅地步?定係心態上懶到咁?

話說一個月前小弟返鄉下時,搭過一程的士,司機年約60歲的華人,知道我係香港人就雞啄唔斷吹水 (當地較年長的不論膚色都係鍾意同香港人吹水,除非你唔願意講嘢)。講到李光耀,提到1965年獨立之後嘅歷程,肯定 Mr Lee 所付出同貢獻之餘,就講到李光耀為國家同人民所規劃嘅一切,的確使新加坡人人安居樂業;但亦相反地使唔少人因為安穩而有一點「飯來張口」嘅心態,覺得生活上好多事情政府會做好晒唔駛操心。於是乎就就無咗香港人嘅主動性、積極性、靈活性嘅思想,同做人做事欠缺衝勁。

吹水期間就講到壞交通燈事件,我有講如果發生响香港會點,的士司機就話呢個就係新加坡人嘅思想同心態方面嘅寫照,同對比香港人嘅分別。

呢啲思想心態同兩單交通事件有何關連?

第一件事當然係香港啲星馬半桶水同左賊最愛批評新加坡嘅「打壓自由可恥」。就是獨立前後到1980年代,新加坡面對種族、宗教而成嘅內憂被迫重手對付「言論自由」,久而久之除咗養成新加坡人「有乜事都唔出聲」嘅習性之餘,仲有養成「循規蹈矩」到唔係自己份內事就想掂都唔好掂。揸車嘅就揸車,搭車嘅就搭車,other than that 乜都唔好搞。

第二件事就係諗住「政府乜都會做架喇」,於是乎壞交通燈咪就等警察嚟囉、壞巴士咪就等巴士公司或LTA搵拖車嚟囉。然後基於「唔係自己份內事掂都唔好掂」,唔會諗到塞死晒就拖延警察騎電單車到現場嘅時間、拖車去唔到現場。更加唔會諗警察或巴士公司嘅人嚟到第一件事要做就係疏散啲車而呢啲嘢其實可以自己做得到,兼且可以加快當局善後嘅速度。

其實以新加坡歷史進程形成新加坡人嘅辦事能力,根本可以好快處理,尤其是壞巴士平排單嘢。新加坡兵役制度使普遍男性嘅體能比香港人好得多,要推開架巴士更加無難度。

李光耀的確成功壓住國內嘅危機使新加坡發展起來,亦的確使人民生活得到富足,但就搞到社會運作得如此笨拙。但反過來,如果沒有李光耀當年嘅強硬,新加坡隨時唔只會有Shabudin Yahaya日日鳩噏,搞到日日打打殺殺。真係針無兩頭利!

所以唔好淨係羡慕新加坡人住「大屋」,好多膠事香港人係唔會明白,更可能接受唔到。

返回主頁

沒有留言: