__

__

撤回19座法案,張炳良極度肉酸


昨日傍晚,民主黨 (姑且用返正名) 尹兆堅就放寬小巴座位上限提出修訂,由19增至20,並得到立法會主席梁君彥批准在6月28日恢復二讀程序進行辯論,運房局因此發爛咋話「破壞運輸業『生態平衡』」威脅要撤回19座條例草案。小弟的手機響過不停,相熟記者係咁打俾我或 Whatsapp 打聽乜嘢料子,嗰一刻忙於招呼記者友好之餘,心中暗喜「十九局長同皇冠車行呢次仲唔死」。

有說法指尹兆堅提修訂,爭啲搞到連3個位都無得加,正一累街坊。縱使小弟極度憎恨民主黨,但對事不對人,對尹兆堅嘅指責不單完全不公平,更是一種無知嘅所為。

首先,第一個正式响立法會表示會計劃提出修訂的,是民建聯劉國勳,時間係2017年5月19日法案委員會會議。雖則到撰文的呢一刻仲未見到佢真係入紙,但就證明打算提修訂之意不只是民主黨,尹兆堅亦唔係第一人。所以抦尹兆堅的傻仔係完全盲炳。

第二,運房局係响梁君彥批准尹兆堅的修訂之後,就發新聞稿話打算撤回。無錯,立法會議事程序係容許運房局咁做。不過政府咁做,一方面形同要建構「就係民主黨提修訂搞到連3個位都無得加」嘅輿論鋪排,卸責俾民主黨並藉此向立法會作出威脅,甚至乎恐嚇 (下段會拆解),係極度野蠻的表達「不同意修訂」嘅態度。但同時地另一方面就引證咗「19」呢個數字根本就係港共傀儡政權的前設。而就呢一點,尹兆堅其實佈局並成功引蛇出洞。

小弟之所以用到「恐嚇」呢個詞彙,原因係响法案委員會審議階段,6月2日會議上,委員會主席易志明接納立法會法律部的意見 ── 根據議事規則57(4b),議員提出修訂只能針對條文而不能修改法案標題。而法案標題寫明「19座位」,即係無得郁。但尹兆堅提出的修訂是19變20,理論上梁君彥係應該BAN。只不過主席亦可以基於「公眾利益」因素,豁免修訂唔駛跟足議事規則。而事實上「20」構成的公眾利益一定多過「19」,因此梁君彥批准尹兆堅的修訂並不構成濫權。

另一個「政治化」嘅角度,小巴加座位係一個純民生議題,任何一個議員都必定想懸掛「成功爭取」Banner;民生議題理論上政客必定去到盡。再者,如前述提及劉國勳係第一個表示會提出修訂意向,再加上陳恆鑌响6月2日會議爆seed「加到20,原廠設計20座位嘅車款就唔駛拆走一張櫈,咁只能裝19個位嘅車廠同代理商咪自己諗辦法爭取訂單囉」,即係民主黨同民建聯的立場一致。而又公民黨、工聯會亦早已表明支持「加得越多越好」(雖然附帶針對業界嘅條件,包括低地台小巴及司機待遇),加埋經民聯、田北辰都係「睇風向」,即係任何多過19嘅修訂都應該响分組點票夠票通過。順便講埋,呢個分析 (唔是收風) 小弟同一眾關注交通政策嘅友好早就睇通睇透,亦分路向小巴業界說明 (包括進智公交CEO 陳文俊),提議佢哋盡力向議員做游說功夫,並不厭其煩提醒佢哋千萬不能「亂講嘢誤大事」,但結果陳文俊就憨鳩鳩衰多口搞禍晒!

根據「三讀」程序,若果運房局撤回條例草案,連所有修訂都會即時被打回頭,所以就是威脅以至恐嚇,目標針對立法會,就係咁解。而同時間,就證實咗「19」就係運輸署 / 運房局的前設。

港共傀儡政權之所以咁堅持「19」呢個數字,小弟都寫過N篇文章分析 (詳見延伸閱讀清單)。但點解去到「臨門一腳」不惜同立法會攬炒,圖使小巴繼續16座位,其實仲有一個內幕。

黃世澤昨日提過新款豐田Coaster (B70) 可能超重,但無講具體情況。坦白講,小弟响運輸業嘅人脈比佢廣,因此當然比佢更早收到風,更當然打聽到詳情。

消息指輸入香港的 B70 的規格的設計許可總重 (GVW) 是5.3噸,雖未超過法例上限的5.5噸,但據報裝設19座位的滿載負重超過5.3噸。小弟在三星期前聽到時都半信半疑,因為從事咗N年汽車行業,心中有數每個車款的技術數據,心諗「無理由咁X重,仲重X過廈門金旅?」。上日本豐田網站睇返廠方公報的數據 (如下圖),

(http://toyota.jp/pages/contents/coaster/005_b_001/pdf/spec/coaster_bus_spec_201704.pdf)

皇冠車行價目表所示的型號是XZB70R-ZEMQY,未能100%對準日本的規格。但所知道其實是 LX 級別 (甚至更「齋」),故可以參照 XZB70-ZRMNY 的數據,進行如以下的計算:
  • 淨重3750kg。日本的法定標準是完全空載,連油缸都是空的。
  • 油缸容量95升。油渣的Density factor 通常以0.8計算。即入滿油重量76kg;
  • 來港規格是沒有座位,在本地安裝。為配合法例規定乘客座椅結構強度要符合ECE-R14,需要在地台及兩側車身焊上四條厚度最少3mm U型槽鐵 (行內俗稱「蝦殼」)。四條槽鐵合計長度逾20米,Mass factor 25kg/m,即重量達約500kg;
  • 日本原廠座椅每張重約18kg (小弟打算訂一張返香港玩殘楊何蓓茵,要Check 運費當然問過日本的零件供應商攞數據,所以我知道重量),在港安裝的裝椅起碼22kg。每個位重量增加最少4kg。4kg x 19 Seats = 76kg;
本港法例計算司機及每個乘客重量54kg。司機連19個乘客負重 54kg x 20 = 1080kg
3750+76+500+76+1080=5482kg。比廠方公佈的5345kg,超出接近150kg!

只不過,因為要符合ECE-R14標準要焊上的四條槽鐵嘅橫切面形狀可以有變化,只要做到結構強度就得,所以重量係可以因為鋼材供應可加可減。而一部淨重約4噸嘅車要偷輕150kg話難唔難,但話易又唔係易。就是因為計算結果還無法肯定「超重」傳聞嘅真實性,所以小弟响過去呢三個星期一直無出聲。

姑且基於計算結果去睇,150kg 相當於兩個位,即係 B70 頂盡只能「公共小型巴士17座位」。If you're 運輸署班貪官,見「要益皇冠」都係加得一個位,會同張炳良講乜吖?咪「唔好加」囉!

或者大家會質疑,既然日本原廠規格最高可載客29人,有乜理由香港會超重呀?解說之前,用返前段的算式計自一下日本規格係乜嘢一回事:
總重5345kg - 淨重3750kg = 1595kg - 76kg (油缸) = 1519kg ÷ 29 = 52.4kg/person
接近香港法例的54kg,理論上係無超重噃!

點解皇冠車行不輸入連座椅的規格?不符合ECE-R14嗎?日本原廠附三點式安全帶座椅已在香港用過 (如下圖)


只不過,在香港「加工」安裝座椅,除咗「保證」符合 ECE-R14 之外,班 SALES 咪可以...... 你懂的!

皇冠車行營業部嘅盤算是否「自作孽不可活」就不作評論了。要再踩多腳的話,就係「原裝櫈」的ECE-R14 唔通係流料?但如果小弟三星期前所收嘅風係事實的話,就證明港共傀儡政權為了維護皇冠車行嘅利益,係可以不擇手段到完全妄顧市民使用公共交通嘅利益。簡直令人髮指!

最後,劉國勳响6月2日質問「署長簽豁免俾12.8米長巴士之前有無問過的士小巴業界」,陳帥夫同李艷芳當堂O撚咗咀!張炳良咪撚再講乜鳩「平衡運輸業界利益」喇,講大話都講得叻啲吖唔該!

延伸閱讀
陳文俊你都對得住黃家以至整個小巴業界咯
霸權不成就殲滅小巴
廈門金旅小巴更能證明豐田霸權係事實
皇冠車行懷疑就Coaster 小巴第20個位向政府提供虛假資料
運輸署唔係明益豐田就係明跣三菱
封殺柴油私家車為益油公司,亦係為皇冠車行
港共為保住皇冠車行乜都夠膽死
豐田驗車唔係盡享特權真係搵鬼信
驗車從來都係官威與牙力嘅較量
19座位為平衡其他運輸業利益只係藉口
只差一個位要大動干戈 (2016-7-7 明報)
回應明報、蘋果日報報導運房局否認失實
皇冠車行食得禾米多
石油氣的士 壟斷謎團 (2013-5-16 蘋果日報)

返回主頁

沒有留言: