__

__

運輸署及環保署極醜惡的拖延封殺廈門金旅小巴


香港第一款達到 EURO 6 排放標準的公共小巴 - 廈門金旅XML6701 在上星期終於成功出牌,吸引了幾家傳媒參觀採訪。

報導引述車主冼洪強表示,懷疑特區政府有心拖延,車輛三月運抵香港,至八月才完成驗車可以出牌。但事實上,這部「歐六」小巴去年十一月底已運抵香港,小弟在十二月初去完台灣之後,就走去搵舊主顧睇車試車,仲影咗相。撇除冼生可能講錯 / 記者可能聽錯然後寫錯,五個月先至搞掂晒Type Approval 同登記前驗車,我第一反應就係運輸署同環保署「擺明拖」。

好多人以為我對於運輸署運作、驗車程序只係亂吹老作,就算過去寫幾多篇文講到似層層,都認為係流料。哪就先同大家有圖有真相:





你哋無睇錯,就是運輸署發出廈門金旅有關Type Approval 的信件。你哋無眼花,信件 Attn. 俾我。

簡單講,曾身為海關註冊汽車入口商編號ID 1434 (廈門金旅香港代理) 法律上的負責人,亦當然係處理申請Type Approval 到驗車出牌嘅跑腿,做過嘅廈門金旅 Type Approval 的 Plan No. 如下:
B0351000C, B0351A00C, B0469000S, B0469A00S - 第一代 XML6701 學校私家小巴

GD010GD4500 - XML6113 45座位旅遊巴士
GD020GD4900 - XML6123 49座位旅遊巴士(過境規格)
GD021GD6600 - XML6123 66座位旅遊巴士

GD021GD650S - XML6123 65座位旅遊巴士(A03 學童服務安全設備規格)

淨係廈門金旅都8個申請。仲有再之前廈門金龍 (KING LONG) 的 Plan No. 計有 480 - XMQ6885,481 - XMQ6118,489 - XMQ6886。連埋中間的 Minor Adjustment (例如油缸位置),前前後後總計接近20次 Type Approval 申請,填一份TA001表格填到手跛,我點可能唔知道需要乜嘢文件,文件數量,耗用時間?! 所以,金旅用五個月 (甚至事實係七個月,下段詳述),我怎不會即刻出現一個「拖」字;或是豐田 Coaster B50 十九座位只是三個星期就「落地」做得生意,就幾乎肯定係使特權打尖!

順便提醒,以上的PLAN NO. 的Type Approval 檔案資料,大家係可以去信運輸署引用「公開資料守則」查閱。姑且臭串啲講:小弟就是夠膽攤晒出嚟,真金不怕紅爐火!

又順帶一提,小弟一直沒有隱瞞過去從事汽車代理業務工作,只是唔問我唔會講,但問到的我一定攤晒出嚟。自從2013-5-23 出版的《陽光時務》雜誌訪問之後,更是公開的事。

但要指出,2012年4月已「金盤洗手」,不再涉足汽車銷售行業的生意或工作。

去年12月16日,《香港01》,《經濟日報》及《明報》報導過呢部小巴,證明前述指部車响舊年11月底到港係絕對真確嘅事實。即係話架車「晒太陽」接近9個月先至出到牌!當然,車輛運抵香港唔代表已經向運輸署及環保署提交文件申請 Type Approval。我問過舊老闆黃升平,佢話係响農曆新年前「入紙」。即係話日前《蘋果日報》及《香港01》報導引述運輸署回應「三月先收到申請」又係講大話!

運輸署回應仲有話「4月底才提交文件」又係另一個大話!事關今次話專線小巴規格上與第一代學校私家小巴大同小異,所需要嘅文件,除咗車身圖則、引擎排放報告、行車噪音測試報告,全部都與Plan No. B0351000C 的一模一樣。就是公眾最關心的乘客座椅結構強度同安全帶裝備,因為採用與第一代學校私家小巴相同的Fainsa STEL935 座椅 (連人造皮料都係同一間工廠生產),要提交的文件都可以全部「照舊」。但黃生同我講,在2月多次致電運輸署查詢進度都無回音,極其量驗車主任回應「睇緊」,直到3月就告知所有車燈 (即車頭燈,指揮燈,車尾燈) 十多份報告以「並非歐盟標準」被打回頭。

得先指出,除環保方面有關廢氣排放及行車噪音管制規定採用歐盟、美國或日本的檢測標準之外,根據《道路交通(車輛構造及保養)規例》(香港法例第374A章)、《道路交通(安全裝備)規例》(香港法例第374F章),除咗座椅、安全帶、玻璃也規定採用歐盟、美國、澳洲或日本的檢測標準之外,其餘的設備根本就沒有條文規定採取甚麼標準。簡單而通俗啲講其實係無王管。車燈本身唔涉及重大安全要求,而只係測試照射/反射/投射的角度及範圍和亮度。

我處理過的8個申請,車燈全部提交中國3C標測報告就搞掂。無端端唔受 3C 而話要歐盟,仲唔係玩嘢咁係乜呢!好在廈門金旅廠方早就有齊全部車燈的歐盟檢測報告,但廠方生產十幾款車,連埋Faded-out車款,要搵返晒架小巴用的車燈的報告都要時間,所以咪「四月」囉!

另外,所謂「一站式申請」Type Approval 手續實施咗接近十年,即係引擎排放報告、行車噪音測試報告都要一併連同圖則、測試報告提交俾運輸署,再由運輸署轉交予環保署審核。其實正常而言,兩個署會在大約四至六星期後完成審核,然後發信通知代理完成及告知Plan No. (行內俗稱「批准信」。而睇返上面小弟「晒冷」的其中一張相片,運輸署兩封信的日期分別係11 July 2011 同 31 Aug 2011,證明「四至六星期」就係事實。但環保署在3月底才發出的「批准信」,足足兩個月。就算扣埋農曆新年啲官員放假十日八日,都遲咗最少一個星期。

前文《港共為保住皇冠車行乜都夠膽死》提過,法案竟然維持小巴及總重9噸以下巴士沿用 EURO 5 而無需如其他車種,包括巴士、貨車提升至 EURO 6,正是當中「有古惑」之處。翻查政府及立法會的文件記錄時序:
2016年12月19日 - 環境局向立法會提交法案咨詢文件
2017年2月17日 - 因只是「附屬法例」採取「先訂立後審議」的立法方式,環境局刊登憲報實施;
2017年2月24日 - 立法會內務委員會會議討論法案內容,經表決通過成立法案委員會;
2017年3月7日 - 法案委員會召開第一次會議,選出易志明擔任主席,並進行第一次審議;
2017年3月20日 - 法案委員會召開第二次會議,進行第二次審議,最後表決通過部份修訂;
2017年3月24日 - 立法會內務委員會會議,接納法案委員會的決議及報告;
2017年3月31日 - 環境局以立法會通過的法案內容,並因為完成「先訂立後審議」程序,作第二次刊憲並正式實施。立法會於同日向公眾公開法案委員會的報告書

廈門金旅的小巴是 EURO 6;豐田 Coaster (不論舊款 B50 還是新款 B70) 還未能提供EURO 6,甚至是來自日本、中國、歐洲的「天線」,Cummins 已斷然拒絕豐田/日野要求供應 ISF 系列引擎 (即廈門金旅所用的引擎);雖然豐田與BMW有使用柴油引擎的協議,但據悉 BMW 規定豐田只能用於私家車產品,就算 X5 採用的 N57 3.0L 柴油引擎可能適用於 Coaster 小巴都唔可以用。即係 Coaster 小巴 / Hino 300 貨車幾乎不可能會有 EURO 6。試問如果環保署响3月20日之前向代理發出批准信,莫偉全大貪官寫嘅「小巴未有EURO 6」會逃得過立法會議員嘅法眼?!可以講,公民黨無同我聯絡,都在 Bill-comm 期間書面質詢提及小巴維持 EURO 5 的疑問。如果連小巴都要提升至 EURO 6,皇冠車行商用車輛部仲唔執笠呀!

廈門金旅 EURO 6 小巴的 Type Approval 申請被拖延七個月,除咗係港共傀儡政權運輸署同環保署要無所不用其極維護豐田霸權,尤其是環境局/環保署成日開口埋口話要改善空氣污染問題,點解有一款比豐田Coaster 更環保的車種都要拖,我真係搵唔到 Other than 「勾結皇冠車行利益輸送可恥」嘅理由囉。

日前《蘋果日報》及《香港01》的報導尚有提及廈門金旅的19座位小巴Type Approval 申請,運輸署回應「未有提交足夠資料」。我得再次指出,除咗車身圖則之外,其餘文件同Plan No. B0351000C 的一模一樣;排放及噪音測試報告亦會與剛出牌的16座位小巴相同,即係客觀而言無可能唔齊文件。我同樣問過黃老闆,佢話運輸署將 Fainsa 的座椅測試報告全部打回頭,原因係「西班牙文」。



Fainsa 嗰堆文件,小弟在申請B0351000C, B0351A00C, B0469000S, B0469A00S 同 GD020GD4900 時都用過晒,當年提交的都是 Spanish。點解6至7年前你班貪官唔BANNED 我呢?7年前後的分野,就是申請文件是否由小弟簽署。

要是總驗車主任李偉文、或曾遭我點名的車輛安全及標準部李家輝認為「就係咁」,我會非常願意同不單是舊主顧、更是我學曉修理的恩師、甚至知道我在2006年發生過何事而知道是救命恩人的黃升平先生,立即辦理各項商業註冊等手續,無條件兼不收分文為19座位的申請文件簽署!又或是「毛李」夠薑的話,立即以政府行政程序將本段提及的幾個PLAN NO. 行緊街嘅車全部通知車主搣行車證。我就睇下麗斯李貴芳 (架「佐敦跑狗」車主)、興業客運蘇老闆等人點炮製你哋囉!

最後,有三個汽車業界人士同小弟講,話九龍灣及朗月街兩個驗車中心嘅職員好唔想見到我,當中更有話「佢嚟到就肥鳩你架車」。既然班驗車官視我如神枱貓屎 / 非洲和尚,我會積極考慮去信署長李萃珍強烈建議佢向法庭申請禁制令,禁止我非公務進入運輸署旗下所有驗車中心,以免對驗車人員構成不必要的壓力。都係「爛仔mode」嗰句,李八婆你夠膽就做,你班仆街伙記身無屎駛怕我呀!

後記:
1. 唔知運輸署班貪官個腦係咪只識得個貪字,傳媒問乜都鳩答。冼強話「三月」你哋就照答「三月」。上年6月16日「三菱ROSA 得25部」已經出晒事,明知我係熟你哋運作嘅麻煩友都仲係要犯第二次錯誤,真係唔知你哋想點囉!

2. 好多人,尤其是啲白痴巴膠,仲只係聚焦於「支那製造」,甚至有例如陳嘉朗之類嘅柒頭話我「為共匪抬轎」「投共可恥」。我必須指出,撇除小弟同 柏斯敦巴士台 直播試車的評價,廈門金旅是否可靠,係由市場去做判斷;同時地唔係我對運輸政策問題的考慮重點。掉返轉問,係咪「豐田無得頂,豐田無嘢整」就可以將整個霸權的不公義視若無睹,甚至有如一個叫 Salavdor Fung 嘅網民會視為理所當然呢?
無錯,共產黨正仆街,但皇冠車行連同運輸署及環保署十多年來的所作所為唔仆街咩?「豐田霸權」呢四個字真係無支那共匪嘅因素响當中嗎?
就算廈門金旅「會爆炸」,相對於豐田霸權,我只想到二戰時英國首相邱吉爾的名句:If Hitler invaded Hell, I would make at least a favourable reference to the devil in the House of Commons. 唔明就讀多啲書,唔讀書就唔好製造噪音!

返回主頁








沒有留言: