__

__

加泰隆尼亞獨立玩完?同馬德理攬炒大戰就真



加泰隆尼亞响1OCT獨立公投之後,自治區主席普迪蒙特(Carles Puigdemont)遲遲唔宣佈獨立,10OCT 加泰自治政府議會草擬好獨立宣言,吹晒風話會隨即宣佈獨立,但結果係普迪蒙特只係畫押然後宣佈押後獨立。接續呢十日,馬德里同巴塞隆拿刀來劍往,西班牙首相拉霍伊 (Mariano Rajoy) 出動到廢除自治權向加泰迫供,照平常的思路 Puigdemont 應該嗱嗱聲宣佈「走人」,但到香港時間今日0300,只係「打咀炮」狠批馬德里中央野蠻無道,繼續俗謂「扭屎忽花」而無宣佈獨立。

香港人同左賊,仲有啲國際政治半桶水睇到呢個局面,大多都係會話「話咗獨立等如找死」、「激嬲中央無運行就係常理」之類嘅廢話;甚至乎因為歐盟唔只「食花生」仲話唔支持加泰獨立,然後大叫「話咗分裂國家嘅嘢係不得人心」。鸚鵡學舌係容易,但就是完全無知嘅表現囉。

歐盟之所以唔出聲,或表示「唔支持加獨」,就是因為歐盟議會有著不干涉成員國內政嘅傳統。呢個傳統嘅存在,一方面係組成歐盟嘅基礎主要係統籌成員國之間嘅「跨國」經濟活動同成員國非憲政、國內管治層次以外嘅法制事務;二來係防止再有類似希特拉、墨索里尼、佛朗哥呢類暴君癲佬借歐盟議會嚟搞「統一天下」。如果歐盟今次出聲,輪到西班牙做主席嘅時候,又咁啱係 Rajoy 呢類 Franciso Franco II 嘅仆街擔任的話,隨時搞到成個歐洲天下大亂呀!

講返「巴塞對皇馬」。Puigdemont 同 Rajoy 有如响賭枱鬥推籌碼,但同時响枱底一個擺咗粒手榴彈,一個擺咗枝MP5,準備賭唔掂或發現有人出千就同歸於盡。

先唔講點解玩到咁盡。加泰因為公投結果同加泰佔西班牙全國 GDP 逾兩成,牌面佔盡上風;馬德里就恃住手握憲法大權同歐盟嘅公開表態,一於撐到行。Rajoy 宣佈要解散加泰地方政府,有如已經將收埋枱底枝 MP5 擺上枱面,仲要上埋彈。雖然加泰嗰邊未拎粒手榴彈出嚟,但要知道掹保險針可以响枱底進行,同埋唔一定係由 Puigdemont 掹針。

Puidgemont 之所以夠膽咁玩,一來係望準 Rajoy 同人民黨不過是長槍黨餘孽,簡單講係一班賊。賊性之一當然唔會放過加泰隆尼亞呢隻生金蛋嘅鵝。賊性之二就係強權暴力,單係睇返公投當日班西班牙警察連阿婆都打爆缸就好清楚 Rajoy 同人民黨呢個特質。另一方面,除咗最為人知道的巴斯克之外,西班牙最少還有三個自治區存在離心,包括雖然只為西班牙提供約 7% GDP,但是為金融投資中心嘅加利西亞 (Galicia)。加泰隆尼亞如果出走成功,隨時產生嘅連鎖反應而加利西亞又開始有所動作的話,成個西班牙散晒都似。言下之意,長槍黨餘孽將不惜一切代價、用盡任何手段阻止加泰隆尼亞獨立,那怕是軍事鎮壓都有可能發生。

若不幸真係發生流血,人民黨唔單只會同中國共產黨齊名,西班牙國會聯合政府其他黨派勢必同人民黨割蓆,聯合政府隨時瓦解,Rajoy 能否再做首相都會變成一個巨大問號。而 Rajoy 真係變成 Franciso Franco II,有離心但一直無乜行動嘅自治區見到咁,就算唔即時行動都必定會開始打咀炮話要爭取獨立。

唔講到「西爆」好似好遙遠。要知道歐盟係人權大過天,馬德里出兵而加泰隆尼亞流第一滴血,歐盟就迫住因為人道問題而要插手,話之加獨成事之後西班牙變成第二個希臘咁破產都焗住要打鳩 Rajoy。Rajoy 被「打」以至人民黨被取締都事少,一個唔該暫停甚至撤銷西班牙嘅歐盟成員資格,搞到西班牙真‧退聯嗰隻,就真係會搞到「西爆」。橫計掂計,佛朗哥二世對加泰隆尼亞採取軍事行動就必定變成「分裂西班牙罪魁禍首」違臭萬年。Puigdemont 以至加泰獨立運動領袖見到咁嘅局面,駛乜同長槍黨餘孽急。「賭枱下的手榴彈」就係咁解!

爭取獨立從來都唔係易事 (包括新加坡),成事嘅困難並不在於同宗主國的實力差異,而係決心、策略同手段,加泰隆尼亞正正做咗非常清楚嘅示範。

後記:
1. 加泰隆尼亞計算馬德里中央而採取嘅策略,其實 >90% 適用於香港盤算北京。只不過國民黨模式嘅中國歷史教學 + 支教民「建設民主中国」洗腦逾 30年,算把啦;
2. 某程度上加泰隆尼亞係搵歐盟借刀。只不過香港人十居其九都堅定不移的認為「香港無價值,國際唔會理」,再唔係就「英國佬走咗仲點會理香港」;
3. 加泰隆尼亞恃住自己有錢又勤力,夠膽同西班牙「講數」。但大多數香港人個腦仲繼續「無咗『阿爺』香港玩撚完」;
4. 普遍香港人都係「大一統」盲從信眾,無資格講乜春「支持加泰隆尼亞」,收嗲啦唔該!

返回主頁

沒有留言: