__

__

馬爆在即,柔佛真係準備率先走人



對香港人嚟講,就算有留意時事甚至國際政治,主要涵蓋星、馬、印尼嘅南洋政治始終比較少人為意。一來南洋政治真係好膠,而嗰種膠又唔係法蘭西、比利時嗰種膠得嚟有得笑,而係膠到好多嘢解釋唔到;二來當中包含嘅元素除咗政治角力、經濟,仲有宗教、種族。再仲有撈埋一碟嘅文化同煩過嘔茄嘅歷史,複雜到唔係好似小弟、世澤、李振良等有南洋家庭背景係好難參透。

近年談論南洋政治嘅其中一個主要課題就是「馬爆」── 馬來西亞解體,大大話話講咗無兩年都三年。最早談論的正是小弟在2014年9月26日《蘋果日報》刊登的〈主權公投陸續有來〉。除咗砂朥越之外,另一個比較明顯尋求脫離馬來西亞嘅州份,就是毗鄰新加坡的柔佛州。

柔佛州尋求獨立之意已非今日嘅事,最早的「訊號」早在2015年6月,柔佛蘇丹提出加強英語教育,新加坡的成功因素之一就是英語的流通。

表面上無乜特別,但當中犯咗最少兩個馬來西亞嘅政治禁忌:
  1. 巫統為首嘅管治理念馬來人優先,認定馬來語 (Bahasa Melayu) 是唯一正統,英語和華語是代表入侵者;
  2. 巫統視新馬分家嘅基礎係「否定多元種族公平」。認同新加坡嘅政治、經濟成就即是否定巫統嘅主張,甚至視巫統係失敗者。
對巫統嚟講,第1點仲可以忍你,第2點係隨時「激嬲中央無運行」,一個唔該就用內部安全法 (ISA) 拉人封艇先收監後審訊。只是出自州蘇丹口,想拉都唔拉得。所以視之為尋求獨立嘅訊號。

接近兩年半過去,柔佛王室其實做咗唔少事表達去意,其中最明顯是2015年10月,王儲東姑依斯邁祭出1946年柔佛加入馬來聯邦協議「保障柔佛王室及柔佛子民權益」條款,指出若吉隆坡不遵守柔佛有權脫離聯邦獨立。另外,二王子東姑依德利翻出「太公」亞布巴卡蘇丹(1862-1895在位)迎娶華裔黃亞嬌的歷史,暗串的向巫統同伊斯蘭黨提出「華人是入侵者,應該趕走」進行還擊。

又所謂「政治離不開利益」,柔佛同巫統有唔少利益衝突,其中一個較為香港人所知且較容易理解的就是碧桂園森林城市 (詳讀《碧桂園森林城市隨時係爛尾樓》一文) 嘅爭議。

巫統同伊斯蘭黨呢過去兩年幾不斷以穆斯林嘅宗教原則掀起連串政治同社會爭議,例如舊年嘅「豬毛油掃」同近月的「Halal Laundry」,柔佛蘇丹當然不斷發炮,甚至直言要呢啲借宗教搗亂消失於柔佛,其實都係借宗教同種族問題「食住上」表示脫離大馬之意,但比「1946年協議」之論確實無咁明顯。不過巫統喉舌報之一《Kosmo!》日前放大王儲東姑依斯邁指馬來西亞國家足球隊「那是你的國家隊,不是我的。你要知道,我來自柔佛」作出報導。

《Kosmo!》係一份仲衰過英國《The Sun》嘅報紙,「娛樂新聞化」仲勁過香港《蘋果日報》,王儲其實可以一笑置之,但就偏偏爆 Seed 狂鬧。表面效果係巫統受棍,但同時使王儲的一番話受到注目。

王儲的「你的國家隊,不是我的」,可理解成有如 Catalonia is not Spain 同 Hong Kong is not China 之意。產生嘅政治威力雖然唔及「1946年協議」,但其實是更清楚易明的表態,而且直接了當。如果類比返巴塞隆拿球場的話,形同已為脫離馬來西亞聯邦獨立做最後準備。

當然,大家可以認為「講咗兩年幾都未獨立,即係得個講字」,但加泰隆尼亞尋求獨立都唔係三兩個月嘅事啦。再串啲講,辛亥革命都蘊釀超過十年先至成事啦!但有一件將在月底發生嘅事 ── 英國王儲查理斯王子同夫人卡米拉將在31OCT起訪問新加坡同現馬來西亞的砂朥越、檳城同霹靂州。隨時就是「撳制」馬爆開始。

砂朥越尋求脫離馬來西亞嘅訊號非常清晰,而砂朥越人就脫離大馬嘅想法係「54年來俾巫統搞到亂晒係英國佬不負責任一走了之所造成,英國佬有責任返嚟收拾殘局」,某程度上反映砂朥越人所求的是英國恢復管治砂朥越。而在法理上,基於「未有徵詢人民意願」與及維也納條約法公約,砂朥越如果脫離馬來西亞,的確就是要英國殖民走狗重返管治。查理斯王子儣儷到訪砂朥越又係咪只係拜訪當地非政府咁組織,視察山區婦女小童教育發展嘅問題咁簡單?須知道如果「砂獨」成事,事頭婆就要「重返砂朥越」成為最高元首囉。

檳城其實係另一個都有「離心」嘅州份。主要成因之一,係民主行動黨林冠英執掌檳州8年,州政府財政轉虧為盈。有錢剩推行多項社會福利政策 (例如9年免費教育、免費公共醫療等), 成功收賣人心都事少,再一次證明巫統嗰套主張係錯嘅都未算最大件事。又就是「政治離不開利益」,巫統覬覦檳城州的財政儲備,立心要「整死」林冠英以圖重新搶奪檳城嘅控制權。連馬拉佬都心悅臣服行動黨嘅管治,檳城人點可能唔會諗到若果檳城落入巫統手上,一切社會福利都會俾巫統搶走晒......而檳城要脫離大馬嘅法理基礎與砂朥越相同 ── 「未有徵詢人民意願」與及維也納條約法公約。查理斯去檳城有乜要做?自行參透啦。

簡單而言,馬來西亞聯邦三個最有可能尋求獨立嘅州份都「有所動作」,而柔佛可謂三個州當中做得最多同最好準備,而且已經有相當充足同實在嘅訊號,柔佛「走人」已經指日可待。

根據馬來西亞憲法,馬來西亞聯邦係由14個州 (包括新加坡) 組成,1965年8月7日馬來西亞國會通過新馬分家法案其中一條條款就是新加坡離開不影響聯邦組成的法定有效。若果柔佛一走而沒有採取類似做法,憲政法理上馬來西亞聯邦消失於地球,因此「馬爆」之意並不單只經濟泡沫爆破,更會是「馬來西亞解體」。


後記:而因為支那共匪藉「投資」,窩藏大量黑金於馬來西亞,所以「馬爆」勢必波及中國而引發「支爆」,唔明就詳讀前文《江澤民隨時俾納吉累死》。因此香港人要密切留意馬來西亞局勢發展係必須的。


返回主頁


沒有留言: