__

__

解決演唱會黃牛黨唔係加強執法就得



相信大家都經歷過,想去睇「紅館」的演唱會,等到門票公開發售時,發覺 Seat plan 天下河山一片黑而有備註寫明「黑區」是主辦單位保留。「黑區」佔的比例必定超過一半,甚至最高記錄去到八成。想買到客觀認為「較好嘅位置」嘅「黑區」,要不是留意住商台「叱吒903」、唱片公司、製作公司之類公佈消息當中的「XYZ信用卡優先訂購」,然後响「優先訂購」當日 call 爆訂票熱線,先至有機會買到啲。如果「優先訂購」失敗,又唔想公開發售只能買到「只係有如去戲院」嘅位置,除非有門路搭上主辦單位、贊助商,否則只好去Yahoo拍賣、tickethk.com、viagogo.com 之類「炒飛」。

尋日立法會馬逢國議員向民政事務局提出書面質詢「炒黃牛」呢個問題,「垃圾筒局長」回覆又只係打官腔重提「炒黃牛」係犯法,會同警方溝通加強執法 (新聞公告全文)。可見港共傀儡政權對香港嘅演唱會「黃牛黨」完全闊佬懶理;亦同時見到馬逢國根本無針對「黑區」嘅問題核心,或者「黑區」涉及龐大利益而唔敢問,求其「問咗當做咗」應酬交差就算。

在商言商,一場演唱會製作成本幾百萬甚至過千萬,主辦機構要起碼封蝕本門係無可厚非,假設以 HK$500 計算門票平均價,一場的門票收入350萬至600萬 (「四面台」12,000個位 或「三面台」大約7,000個位),基本上一場至兩場已可以「平手離場」;再者,「黃牛黨」的利潤亦與主辦單位無關,道理上主辦單位無必要助長炒風。但點解「黃牛黨」問題持續咗N年,且越來越猖狂,唔單只馬逢國無問 (或唔敢問),相信好多人都無去探究。

又再在商言商,主辦機構如唱片公司最擔心賣唔晒而蝕錢,歌手亦會擔心歌酬同門票銷情所反映的「人氣」問題。單純門票銷售嘅收益又存在風險,搵方法「包底」係好正常嘅商業決定。HOLD 起「黑區」正正是「包底」舉動,而「包底」的亦無可能要蝕。銀行透過「信用卡優先訂購」,賺手續費同吸納現金流,既可解決「包底」嘅蝕本風險,同時地食住香港人「驚蝕底」嘅心態,製造輿論解決歌手擔心嘅「人氣」問題,一家便宜幾家著,已經解釋到「黑區」點解越來越大。至於那些成功「優先訂購」嘅門票最終會是入場觀眾定淪為「黃牛黨」活動,銀行可以一句「我哋只係負責門票銷售,出售後消費者嘅行為無法過問」推得一乾二淨。此為「炒黃牛」問題嘅根源之一。

另外,演唱會主辦機構亦會尋求贊助,贊助商所考慮的當然是「賣廣告」增加知名度,但「賣廣告」單純在宣傳海報、記招有公司 LOGO 出現,甚至乎就算「冠名贊助」,能增加嘅知名度點可能值幾十萬甚至幾百萬。但如果透過贊助而從主辦機構攞到「黑區」中的「超靚位」、握手位之類,然後派俾啲客仔,不單達到「增加知名度」嘅目的,又可以維持客戶嘅關係,咁咪「值返晒」囉!但跟住又係嗰句「啲飛派咗出街,攞咗票嘅佢哋之後點做唔關我哋事」推清責任。此為「炒黃牛」嘅根源之二。

大家再留意下,唔少演唱會嘅贊助商都有保險公司,最常見有 Prudential 保誠、AXA 安盛、AIA 友邦。正常人都知「賣廣告」是不可能直接吸納保單客戶,但保險公司最多嘅就係人 ── 保險代理。啲 Agent 可以「派飛」俾客維持關係,甚至「保單換演唱會門票」,why not?! 除咗又係「啲飛派咗出街,佢哋之後點做唔關我事」之外,可有保險代理參與非法的「炒黃牛」所為?天知地知佢哋自己先至知!

再計埋製作公司、唱片公司、經理人公司等等啲員工「靜雞雞」炒埋一份,已經數咗四個演唱會「黃牛黨」出嚟。唔單只解釋到「黑區」涉及龐大利益而可能係馬逢國唔敢問得到肉之外,亦睇到香港嘅流行音樂文化點解會沉淪 ── 歌手都以「紅館」開演唱會為事業目標,但要成功踏上紅館舞台嘅元素不過是操控响「黑區」的莊家手上,而唔係自己的歌藝以至舞藝嘅實力吸引觀眾、歌迷的支持。咪搞到「好似有舊痰响喉嚨度,把聲都唔出」、「錄音逐句錄靠後期製作」嘅所謂歌手周街都係囉!

相對地,台灣嘅演唱會就少好多呢啲利益輸送問題,主辦單位就算「Hold 起啲位」的比例唔會多,甚至 >99.9% 「堅砌」公開發售。例如明晚假台灣新北林口體育館開三場演唱會嘅鄧紫棋,會場佈局大約10,000個位,公開發售的就有8,000張。衰啲講,「炒」極都係得四份之一咋!

又例如小弟近期較多提及台灣樂壇有「平民天后」稱號的徐懷鈺,將在5月25及26日假台北國際會議中心開演唱會。

主辦單位 Hold 起嘅位近乎零,5月26日3500張門票三分鐘SOLD OUT,5月25日加場都賣咗超過九成。雖然場地係只有如香港的「伊館」或九展,但沉寂咗樂壇接近十年都有呢個成績,呢啲咪叫實力囉!

如果香港嘅演唱會門票銷售安排好似台灣咁,就唔會「黃牛黨」問題嚴重到要拎上立法會;開演唱會堅係講求「實力」,香港嘅流行音樂文化亦唔會近乎一潭死水。

利伸:小弟已買5月5日梁詠琪演唱會 (經歌迷會訂購) 同徐懷鈺演唱會 (兩場,全部經公開網上訂票)。

返回主頁

沒有留言: