__

__

佛家唔係乜都唔做等運到



復活節係基督教節日,講佛教好唔啱Channel。但呢期不斷有人 post 「佛系」抽水,去到氾濫成災嘅地步,有少少忍唔住要講兩句。

先此聲明,小弟並非信佛,亦沒有鑽研佛學,但聽聽埋埋唔少同佛學有關嘅嘢,加上「佛家」嘅哲理其實充斥响生活當中因而有所體會領悟而已。

無錯,佛家尚言道「緣」,但亦有普遍一般人聽過、以至常掛咀邊的「種善因得善果」、「天作孽尤可恕,自作孽不可活」等等的「佛偈」。稍會用腦的,都應該會知道佛家思想其中一個重點係「付出與收獲」。以香港人慣常中英夾雜嘅講法,即係 Give and take。所謂「緣」並不單是指「結果」會不會出現,還有「付出與收獲」形成的「因果」關係;但所謂「因果」並唔係 1+1=2 嘅道理。只不過因為「結果」未出現嘅時候只會係一個 unknown,因而會使人有 uncertainty 而有不安嘅感覺。再繼而因為呢種不安,不同嘅人就會有不同嘅態度與及行為。

以為「緣份」到就自然會得到結果,於是蹺埋雙手闊佬懶理,最終係得唔到想要嘅結果。呢個唔單只就是「因果」之理,英文諺語 No pain no gain 亦係咁嘅道理。或者世俗啲嘅講法,唔付出想有收獲是不可能的。已經Totally K.O. 嗰堆「佛系」posts。

或者走另一個極端去講,有人會為求達到目的不擇手段,得到想要嘅嗰件事情嘅結果。唔講乜嘢之後有報應嘅問題,响不擇手段嘅過程當中必定要勞心勞力以至付出金錢,已經係一種Give and take。

又最通常出現嘅情況就係一邊朝目標去做但內心忐忑不安,心大心細、十五十六、老鼠拉龜...... 藥石亂投而最終得唔到想要嘅結果,仲隨時搞到一鑊粥,相信好多人有咁嘅經歷。

引伸出嚟,所謂「緣」,唔係你最終會否得到個「結果」,而係响爭取個「結果」嘅過程當中,採取緊乜嘢態度,繼而因態度影響行為表現,使「結果」會係點樣出現。佛家修行看待「緣」,既不是「等運到」,更唔是「不擇手段」,而係覺悟 uncertainty is uncertainty 唔到你控制,明白 uncertainty 所產生的不安亦係必然,得處之泰然免得藥石亂投搞禍件事,即所謂平常心,或更「禪」的講法 ── 隨心而行。具體啲講就係唔好睇到目標結果天咁大,唔好一味諗住得唔到個結果就如「個天會冧落嚟」,以免影響咗自己嘅思緒而出現一個「亂」字。

另外要提,隨心而行嘅過程中,除咗要記得「唔好傷天害理」呢個最基本原則之外,亦要記住「凡事有代價」的定律。

要唔講「佛偈」咩,西方哲學亦有類似嘅思維,只是小弟少讀唔拋書包,頂多建議讀下卡耐基嘅書,雖然好重商業味道,但對於著重功利主義嘅香港人嚟講其實幾適合。

甚至乎基督教嘅教義都有類似嘅思想,例如最常講的「忘記背後,努力面前,向著標竿直跑。」(腓立比書3:13-14)。睇晒第三章的前文後理,保羅既表明自己知道有著「敵基督」嘅過去,因而知道自己當前應該要做乜;但亦知道自己嘅目標何在,而「若在甚麼事上、存別樣的心、上帝也必以此指示你們。然而我們到了甚麼地步、就當照著甚麼地步行」(3:15-16)。也就是相信上帝的安排然後隨心而行就能達成目標的意思。可謂同佛家的「緣」和「因果」同出一轍。

是故之,不論乜嘢信仰,唔好再抽乜嘢水「等緣份到而可等運到」,呢啲講法唔只侮辱佛教 (以至基督教等),係簡直不負責任所為。

後記:耶撚唔好借勢批評我「一心不能藏二主」對基督教不敬,一切只是照事論事。再要串啲,成日講「上帝是全知全能,是無限的」,但又成日框限住上帝得一種形象,唔覺得好矛盾嘅咩!

返回主頁

沒有留言: