__

__

政客 - 藝人 cross-over 唔得架?!



曾俊華為動畫電影《超級無敵世界波》(原名:Early Man) 配音,好多人睇到宣傳廣告就打個突。一來應該無人諗過阿 John 會參與演藝工作,深入少少嘅二來就係配音唔是「對畫面口形讀稿」咁簡單,阿 John 竟然配到 (利伸:小弟未睇套戲)!如果唔係金魚記憶,應該知道阿 John 唔係第一個香港政治人物參與演藝工作。約兩年前游蕙禎就拍攝了ViuTV的劇集《三一如三》,撇除「私怨大過天」而針對佢嘅言論,同樣唔少人睇到嘩嘩聲。




唔少香港人都抱有「政界同娛樂圈風馬牛不相及」嘅觀念,甚至歸根究底是華人社會自古以嚟看待「為官者是為民請命,而戲子多是無情」的想法,認為做官不該同時做藝人嘅小農思想。又或者反過來認為藝人從政又係騎呢古怪舉動,認為拍戲唱歌就咪掂政治,以至又係小農基因的認為藝人從政嘅目的不過是「攞著數」。無幾多人會細心思考政客/演藝人 cross-over 嘅需要,更唔好話對社會產生甚麼作用。

無錯,從所謂「私利」嘅角度,政客參演或藝人從政,確係可以增加收入渠道、曝光率以維持知名度,點都避唔開的。但政客參與演藝工作嘅過程當中,既能對政治以外嘅事物有親身體驗,拓闊視野同思維,一定程度上有助政務、管治嘅工作。衰啲講,假設小弟在運房局工作 (事實當然係現在和可見將來都唔可能) 但又繼續偶爾「客串」揸巴士,不是可以在運輸政策工作上做得更好嗎!

從另一個角度去睇,演藝界唔需要面對「政治」嗎?撇開汪明荃、鄺美雲、曾志偉、成龍、陳小春...... 嗰咋友仔投共所衍生嘅問題,單純拍戲要申請封路、用政府設施做場景、拍攝爆破場面,唔係已經無得「我討厭政治」咩!如果有認識娛樂圈嘅政客,撇除所謂「朝中有人好辦事」嘅小農思想,剩係協助處理及跟進申請審批,已經有助推動本港嘅演藝娛樂文化。又例如近期熱門話題的演唱會門票炒賣,撇開馬逢國根本係一件廢柴,不是可以更有效向政府施壓嗎!甚至從小農基因角度去講,要是有熟悉演藝界嘅政客「坐鎮」,班黃牛黨點都有所顧忌。

就算要完全撇清「政治」二字,演藝工作過程唔需要同政府部門接觸,演藝人最經常遇到嘅問題之一莫過於同錢銀有關的事,例如收唔齊歌酬、片酬甚至被走數。又或是其實唔少藝人,尤其是新人,都缺乏足夠法律知識,或是受香港娛樂圈有著「講個信字」、「你唔係唔信我」嘅觀念氛圍影響,同經理人公司、唱片公司、電影公司有合約糾紛。撇開普羅大眾看待「明星」嘅心態,呢類事件其實有如一般打工仔的勞資糾紛。一般勞工階層如果同僱主「講唔掂數」都會尋求議員、政客協助,那麼一個能穿梭於政界同演藝界嘅人,不是能更有效充當呢個角色,必要時負責「擺平」工作參與談判,以至於平常嘅時期「鎮住」班心謀不軌嘅經營者。

撇除曾俊華現無官職、游蕙禎被DQ,又撇除班投共 artists、馬逢國之類嘅廢柴,香港確實欠缺有份量能穿梭於政界同演藝界嘅人物。方國珊除咗選極立法會都選唔到,仲要到今時今日仲拎住三十年前亞視劇集《哪吒》做光環,十足十啲「拔萃仔」咁,就算數把啦。原名劉慶基嘅「叉燒炳」劉丹,2000年競選立法會先得嗰15,450票。

反觀外國,唔計阿諾舒華辛力加(Arnold Schwarzenegger) 咁遠同「荷李活巨星」咁高嘅級數,近在台灣已經有一個叫余天嘅人物。


有去過台灣觀選,總會响民進黨嘅活動中見到呢位「二撇雞」大叔。

余天不單只是民進黨核心人物、曾於2008至2012年擔任立委,1965年已參與電影演出,1966年開始推出唱片,1977年起主持綜藝節目,是縱橫台灣演藝界逾半世紀的資深藝人。2004年參選立委但落敗,到2008年當選。曾為民進黨中委 (2014-2016年) ,現為民進黨新北市黨部主任委員。雖然余天出任立委期間未有突出的政績表現 (近期亦因為女兒余筱萍參選台北市議員而膠事連篇),但確實壯大了他對台灣演藝界提供支援的實力。

余天除了身家豐厚不時借款予藝人渡過財政難關之餘,亦為唔少演藝人出頭。「大範圍」的計有2003年率領成立台灣文化演藝推展協會,2006年成立全國藝能總工會;「細範圍」的就例如襄助以故的豬哥亮當年的復出、協助徐懷鈺處理「登台演出『順便』老細飯局事件」之後的合約糾紛等等。

香港所謂從政的藝人,唔好話一味只識投共嚷著藝人「心懷祖国」有形無形地摧毀香港嘅娛樂事業演藝文化,有誰曾經關注過任何級數的演藝人的工作問題?唔好話從無過問 Dancers 五勞七傷而酬金奀到唔好話睇醫生、連開飯都成問題;唔敢得罪620之類無視 CCTVB 藝員人工差到隨時要借貸度日,連「發哥」周潤發的片酬被走數要自己搞訴訟追討!

再引伸出嚟,並非議員而在政圈中打滾嘅人、社運份子,對於香港嘅娛樂圈、演藝文化有何關注?除咗留意、分析、探究某部電影、電視劇、歌曲,藝人的言論有何政治涵意然後抽水說三道四之外,頂盡只會關注具有政治元素的事件 (例如近期的《中英街一號》未獲電影發展基金撥款),有邊個稍為會留意涉及演藝人的權益的問題,以至發聲?在小弟視線範圍真係完全唔見囉!更唔好話會寫「非政治角度」的影評、歌評。單純以上呢兩點,已經係香港娛樂事業文化衰落嘅原因之一。

還要指出,家陣香港人對娛樂新聞嘅態度,對電影、劇集、歌曲作品有何欣賞或批評之處,幾近全無興趣,一味掛住「狗仔隊」揭陰私、藝人嘅私生活、女星件衫領口有幾低條波罅唧得有幾深、走光條底褲乜嘢顏色......

掉返轉講,台灣演藝界同樣受盡中国大陸嘅影響,但仍然總算基礎堅固。唔好用台、港人口差距做藉口抵賴,商界常言道「大陸十幾億人,一人一啖口水都浸死你」,香港嘅演藝文化衰落,根本全香港人都有份造成。

由此可見,政界同演藝界之間有互動往來係必須,政客參與演出根本唔駛大驚小怪 / 藝人參政 (投共之外) 亦無乜咁大不了。香港人咪再小農基因,更唔好再只掛住睇藝人嘅私隱;政圈中人亦唔好再「除了政治以外沒有別的事情」。

返回主頁

沒有留言: