__

__

解決演唱會黃牛黨,還原基本步先再講



小弟都估唔到,演唱會黃牛黨問題的「火勢」越燒越大,更無諗過有傳媒撩到去「贊助商」呢一個從利益角度咁敏感嘅問題。只不過香港地一講到錢銀問題,唔好旨意有得解決。

唔好講「黃牛黨」根本係一個產業鍊,涉及人數龐大嘅利益,剩係睇有業界中人話「八成內部認購」只係上限,俾主辦機構同贊助商有較靈活嘅空間,就知呢班人根本無打算解決門票炒賣問題,甚至再直接啲講想呢個產業鍊持續落去長搵長有。

有人提議「門票實名制」,撇除私隱同行政成本問題,單是「臨時有事去唔到」就唔止係錢嘅問題。唔只無得送張飛俾朋友去睇 Show,仲搞到原本一齊去睇演唱會嘅朋友都入唔到場。或者逆向思維去睇,可以兩個/多個人分開各自買,但隨時買唔到相連座位...... 仲去嚟做乜!

就是贊助商、銀行信用卡優先訂購形成的「內部認購」問題,有唔少人認為一刀切降低內部認購比例,甚至取消內部認購,實在太天真的想法。好簡單嘅道理,在商言商,唔好計「黃牛黨產業鍊」嘅利益,贊助商見無「靚位」可以「派」俾啲客,剩係得宣傳品印有公司Logo,頂到盡冠名贊助,贊助金額就算唔歸零都大幅度縮水。仲點開演唱會呢!

贊助縮晒皮之下要開演唱會,唯一方法就是門票加價。如果對照台灣、星馬等地的演唱會門票票價作參考,連同歌酬、製作公司搭建舞台之類製作成本,起碼要加價 60% 甚至逾倍。仲想 $280 坐「山頂」迤三個鐘?早啲返屋企瞓啦!

即使俾得起 $1500 買紅館「英文字母行數」,當下香港樂壇又有幾多歌手會使人覺得「值」而願意買飛?睇怕香港體育館就算連埋外國歌手,一年得返十個演唱會。

雖然演唱會「值唔值」與否有好多個人因素,最簡單的是會否成為某位歌手的Fans,係個人抉擇。但就算 Fans 一樣可以對偶像嘅作品踩到一文不值、甚至「變心」離偶像而去。李克勤都有歌以至成張專輯我踩到一pat屎,我原本睇好嘅鄧紫棋依家眼尾都唔望下!

梁靜茹在三月响美國西岸舉行巡迴演唱會,其中三藩市的一場,門票最貴 $388 最平 $58 (美金呀,要乘返7.8)。


換著响香港,$3000 港紙「英文字母行數」都真係幾嗱唎...... 但之前有人「大」我「如果$1500 仲係咪會買」,而我嘅答案係「必定『狗衝』去買」「亦相信會好多人買」。

梁靜茹2007年第一次嚟香港開演唱會「Corner 式三面台」約7500個位開兩場全滿。之後分別响2009年、2012年同2015年都係四面台12000個位,全部「爆」。無錯,可以挑剔的「每次開得嗰兩場咁大把」,但以梁靜茹在香港嘅知名度,隔兩三年就「爆」兩場,仲要我去嘅幾次都係由頭到尾「全場大合唱」嘅場面氣氛,你估容易呀!

要搵返香港「本地薑」歌手做例子?張學友剛於今年1月26至28日在吉隆坡Axiata Arena舉行三場演唱會,門票最平馬幣258,最貴988令吉,即是港紙2000銀。


雖然有Citibank 優先訂購,但每場只限2000張 (演唱會會場佈置 12000 個座位),但三場全滿。香港有幾多個歌手得吖!再者,吉隆坡算高人工,但計返生活指數對比返香港,相當於 HK$3000 一張飛,最平的都相當於 HK$700。換轉响香港,有邊個歌手咁嘅門票價錢而你會買?

掉返轉講,嗰啲「好似有舊痰响喉嚨度,把聲都唔出」、「錄音逐句錄靠後期製作」嘅所謂歌手,唔好話三千銀一張飛,試下過千銀而「山頂」都五舊水,睇下開到幾多場!掛得「歌手」嘅朵點可以唱功唔得的話,唔好話如小弟隻耳比較 sensitive 之類所謂「有要求」嘅樂迷,無實力就無質素嗰啲送俾我都唔會去,出專輯仲可以靠後期製作呃到人,演唱會一見真章仲唔「走人」,無下次啦!

無錯,「值」點都同錢銀有關,但正如「BENZ 夠貴啦咪一樣大把人買」嘅道理,歌手有質素就唔駛愁合理地高價格的門票銷情。香港嘅所謂樂壇以至整個娛樂圈一日唔改變陋習、繼續掛住狗仔隊揭私隱、影走光條底褲乜嘢顏色,唔還原基本步講求演技、唱功、舞藝之類,仍舊 (嚴重而極端啲講)「一堆垃圾歌手响街」,紅館拆咗都無問題架喇。

返回主頁

沒有留言: