__

__

淺談馬來西亞2018大選



隨住馬來西亞選管會宣佈大選投票日定於5月9日,選舉的基本條件齊備,就講下形勢分析。

如無意外,兩大主要陣營 ── 國民陣線及希望聯盟將在全部222個選區交鋒;伊斯蘭黨將派出130人參選。單純呢項數據,即係有近六成選區出現所謂「三角戰」,但伊黨「鎅票」無法一刀切確定會影響國陣定希盟。因為傳統上伊黨的支持者的取態多數偏向國陣,但總有人不滿納吉嘅管治而「轉軚」;可是,又因為五年前曾與民主行動黨及公正黨結盟,有部份支持者的取態偏向相當於當時的「人民聯盟」(相對今「希盟」),但又受到現任主席哈迪阿旺高舉神權政治嘅意識洗腦的影響而「轉軚」。但同時地,伊黨開明派不滿哈迪阿旺上晒腦「乜都賴真主」而出走,另行成立誠信黨並加入馬哈迪領導嘅希盟,會吸走一班不滿伊黨「痴咗線」嘅支持者。可以話呢 130個議席嘅選情亂七八糟,甚至預計可以話會「難產」。

撇除香港政治圈子對「改朝換代」的幻想以至FF,小弟雖然從親友了解到唔少 Kampong (鄉村) 選區主動協助希盟助選宣傳,但出發點不過是因為 Mahathir 的號召力,呢股基於一定程度上是個人崇拜的「支持反對派」力量嘅根基其實唔夠穩固,國陣要扑散唔難。再者,依家所謂支持希盟嘅 Kampong 不過主要是「近郊」,尚有基本足夠的通訊及互聯網而村民嘅思維比較文明,可是再偏遠一啲嘅「荒山野嶺」選區,雖未至於與世隔絕,但難接觸新聞資訊就是事實,意識取態上還是偏向親國陣。而最重要的是,Kampong 選區選民人數只得一萬人左右,唔好話相對城市起碼六至七萬 (甚至逾十萬) ── 同樣票數反對派在城市贏一席而國陣在 Kampong 攞五至六席,就是「近郊」選區的選民人數兩萬至三萬,「槓桿比」都最少1:1.5,你話希盟點可能「取得過半數議席」贏得大選!? 如果再講埋當地有分析認為,國陣只要取得全國總票數約 40% 就隨時奪回 2/3 絕對大多數議席...... 係咪可以「今晚早啲瞓,唔駛諗咁多」呢!

只不過所謂「兩刃劍」嘅道理,「國陣攞四成票重奪修憲權」嘅另一面可以是「希盟攞四成票取得國會過半」,道理上 Mahathir 未輸得晒;另一方面,投票日訂於星期三,盲嘅都睇到巫統想阻撓到新加坡、泰國或印尼打工嘅外勞、在非原居戶籍城市打工的人前往投票 (例如我有三個侄女分別在吉隆坡、新加坡及汶萊工作),結果唔只激起民憤,仲導致有人發起聯署動員要求國王頒令5月9日全國放假,而現任國王端姑‧莫哈末五世陛下在唔夠12小時就宣佈大選當日訂為公眾假期。唔只睇到國王「有啲火」,若再明白馬來西亞嘅元首輪任制度及制度下的「統治者會議」(Majlis Raja-raja),還可以理解為九位「輪任國王」的蘇丹都有啲睇唔過眼。再仲有,端姑‧莫哈末五世陛下本為伊斯蘭黨根據地吉蘭丹州的蘇丹,而雖然端姑‧莫哈末五世的宗教取態相對比較保守,但亦唔係鐵板一塊,多少都起碼對伊黨嘅選情有所影響。雖然未致於會構成希盟「翻盤」嘅可能,但至少可以睇到國陣要取得國會絕對大多數並不輕易。

撇除巫統必定起勢搞舞弊,十三個州+三個聯邦直轄區 (吉隆坡、布城及原屬沙巴的納閩) 嘅選情預計,希盟在檳城、雪蘭莪基本上「坐定粒六」贏得兩州選區多數國會議席及州政府管治權,兩派「駐重兵」於柔佛,當然會是大亂鬥;馬哈迪父子兵將在老家吉打上陣,及去年駕崩的蘇丹阿都哈林殿下曾「開大火」炮轟巫統和伊黨煽動宗教種族問題「破壞國家各族人民的融和」,亦可視之為對國陣選情產生變數而將會是另一個「重點戰場」。相對地,吉蘭丹、登嘉樓及納吉老家的彭亨將會是「包頭佬嘅世界」可以唔駛多講;西馬其餘四個州,我個人觀察估計,除咗森美蘭對國陣可能有暗湧之外,馬六甲、霹靂同玻璃市都可以「合埋雙眼」。至於東馬沙巴及砂朥越,「Kampong 槓桿比」超級嚴重,選情唔駛可以點理,反而近期「動作多多」嘅砂朥越嘅大局勢走向才是重點,必須加強留意。

當然,未到投票日、未完成點票公佈結果,都唔會知道鹿死誰手。但不論是國陣取得國會過半數、以至 2/3 絕對大多數,或是希盟取得112席以上,納吉嘅政治前途 (以至命仔) 都進入倒數階段,爭在會有乜嘢下場咁解。而正如小弟以往所講,馬來西亞嘅局勢變化將牽動中国局勢轉變,奉勸大家唔好只係識睇香港嘅傳媒極少量以至連人名都錯、具指導性質甚至是誤導嘅報導,善用互聯網直接留意馬來西亞當地嘅新聞消息。

返回主頁

沒有留言: