__

__

睇香港選舉不如睇大馬選舉



撰文時,馬來西亞第14屆大選正進行投票。

相比2013年,小弟撰文或 FB page 出 post 嘅數量明顯減少。原因唔係懶,而係一來今屆好多形勢條件同五年前一樣,無必要花時間寫重覆嘅嘢。二來今屆不同於五年前的形勢狀況演進速度相當急速,寫都寫唔切。三來是國陣、希盟嘅「拳來腳往」唔止比五年前更加狠辣,但又好多「陰濕」招數;加埋四來形勢變化速度及兩派嘅過招,點都牽連到「馬爆」,太敏感而不能寫,兼夾「馬爆」涉及到支那共匪而土共想四出收料,講咁多俾佢哋知?傻的嗎!

不過,雖然少寫,但唔代表我唔理,甚至知我者就知小弟比香港選舉更著緊。著緊唔係因為自己的「家世」,亦唔係FF改朝換代,又唔係等睇緊張刺激嘅「馬爆」,而係有好多宏觀條件都比香港優勝。

  • 政客修為質素,唔好話勁到馬哈迪同林吉祥父子、安華為咗隊冧納吉可以冰釋前嫌咁高層次,最起碼唔會香港班政客「私怨大過天,議席我要先」嘅醜惡咀臉;
  • 仲有唔會意識形態為先,原則就是一切,不同嘅政團如有接近以至相同嘅立場目標,就會設法尋找合作嘅可能,務求「造大個餅」,而唔會好似香港咁爾虞我詐、你爭我奪;
  • 從意識形態引伸出嚟,政客在日常工作唔會只顧啲「崇高理念」,而係真正「在地」的做實務;或競選活動演講唔會一味講啲曲高和寡嘅內容,扮高深抬高自己但又得自己明,而係又是「在地」的群眾能明白嘅內容去動員選民。例如馬哈迪唔會一味講 1MBD 如何不公義,集中且不斷講「食飯」等日常生活問題,快靚正使公眾產生共鳴而爭取支持,唔似香港成日講XX可恥、YY不公義,所以我哋要打到呢個ZZ政權,聽到蚊瞓。
  • 面對對手嘅攻勢係毫不留情拳拳到肉,子彈不濫發,講究策略,每射一炮都命中要害。唔似香港班政客一味和理非非、謙謙君子,嘥時間鬥磨爛蓆,以至搔不著癢處,促成「永續抗爭」。或是甚至「射錯」目標,俾對方有還擊機會。例如最近許智峰搶手機單嘢,明明可以一嘢合力向港共傀儡政權迫供甚至有屈機完勝嘅可能,但偏偏就無咁做。換著係希盟,唔玩謝秘書處同行管會都捉住件 EO 嚟「凌遲」;
  • 香港班飯桶成日話被政府打壓處於弱勢而好難反撲,或是埋怨資源唔夠「建制派」豐厚,馬來西亞嘅反對派逾半世紀以來咪又係面對相同處境,甚至情況更嚴峻。但馬來西亞嘅反對派會諗盡方法去應付、去克服,唔放過任何可行性,甚至搵位攝還拖。反觀香港班所謂反對派只會顧盼自憐怨天尤人鳩嗌「我哋好撚窮」然後只識伸大手板求施捨,If you were me 仲會有心機理咩!
政壇之外,社會狀況一樣大幅拋離贏香港。

投票率比香港高幾倍,所反映嘅公民質素唔只係人民知道投票嘅重要性,引伸到思想心理角度,知道自己對社會嘅責任、去投票嘅權利同目的,自不然會去投票。相對香港,一街都係我唔識政治、我討厭政治嘅燦頭,乜都唔理又點會去投票。又或者小農基因「官字兩個口,你唔夠佢鬥」而一味諗住「都係『阿爺』話事架啦,投嚟做乜」。順便講,新加坡實行強制投票,就係對付呢啲華人骨子裡總存在嘅思想,所以當年香港電台《傑出華人系列 ─ 李光耀》其中一句旁白話李光耀好清楚人心,係完全正確陳述。

阿水都明知巫統必定扭盡六壬搞舞弊,變相「大局已定」,但反對派政客同支持者點都會抱住「搏盡最後一口氣」嘅心態去做動員、去投票。反觀香港一味諗住「都係『阿爺』話晒事」而迤做、鳩做,以至唔做。

另外,就是「我討厭政治」同「都係『阿爺』話事」,搞到好多並非「食政治飯」嘅公眾人物唔敢講嘢。無錯,香港好多藝人都要「為人民幣服務」而噤聲甚至投共去也,但又有幾多藝人其實係敢怒不敢言?可是一堆「除了政治以外沒有別的事情」嘅所謂社運友硬係想佢哋「直咇腸 mode」兼旗幟鮮明表態,隱喻、暗示都唔係好滿意,叫佢哋點講嘢去推動社會氣氛呢!

相對馬來西亞,除咗社會嘅大氣氛形成嘅公民質素條件,藝人都唔會不問世事。明刀明槍如黃明志嗰啲當然贏盡掌聲 (亦引致好多麻煩),但是例如梁靜茹近日在 FB 出 posts 輕描淡寫提到選舉,有如變相推動歌迷去投票,比起香港嘅藝人 (除咗投共嗰啲如陳小春、曾志偉、譚詠麟之類) 已經做得更多吧。或例如 Gin Lee 李幸倪,前日 FB/IG 貼相執緊行李,尋日朝早去搭機鐵、傍晚(對一般人嚟講)响唔知邊度坐緊車 (我一睇條片見黑底白字車牌,第一個字母係 J 就知道响柔佛),隻字不提選舉。即使不是推動歌迷去投票,最起碼 showing 佢都有公民意識,還不足夠嗎!

無錯,無人知道佢哋支持那一邊,但「民主」不是每個人嘅立場都是其權利、要尊重嗎?掉返轉講,藝人作榜樣示範,點都可以推動社會氣氛,夠啦。唔係個個都要做議員政客先係「為社會做事」。

除咗Artists,唔少馬來西亞人都要離鄉別井去第二度打工。雖然有海外郵寄投票,但因為極有可能被巫統作弊而紛紛回家親身到票站投票,要撲巴士、火車、飛機票,甚至想夾份租車,開聲就一呼百應互相幫忙。香港呢?雖然唔駛千里迢迢去投票,咪又係小農基因「各家自掃門前雪」,甚至又係「都係『阿爺』話事」而話「投乜鬼吖,去飲茶行街睇戲啦......」

唔好話比著你見到咁都唔想理香港選舉,睇到香港政客、一般平民嘅質素,真係一句「香港人不配有民主」,真係啱嘅!

返回主頁

沒有留言: