__

__

馬來西亞變天成事之後



馬來西亞第14屆大選點票仍在進行,但希盟已經鐵定取得112國會議席,馬哈迪亦剛召開記招宣佈入主布城同盡快籌組內閣及覲見國王。另外希盟亦鐵定取得西馬六州政府管治權,柔佛,馬六甲,森美蘭,雪蘭莪,檳城及吉打;另雖然霹靂州出現 Hung Parliament ─ 國陣27席/希盟29席/伊斯蘭黨3席,包頭佬可以左右逢源,但回教黨班友講到尾都係睇風向做人西瓜靠大邊,加上預計馬哈迪點都會花啲功夫同三件包頭佬溝通講數,所以預計霹靂州政府都會由希盟話事,即係希盟將半島西岸除咗最北嘅玻璃市「統一江山」,東岸就留返俾班「恐怖份子」慢慢玩。

小弟本來對「變天」不抱太大期望,但今次選舉結果的確出人意表,對我嚟講最意外嘅係森美蘭同馬六甲兩個近乎與世無爭、順行順走嘅州份竟然變天,同埋祖家砂朥越取得10席,包括攻下最少四個位於山區、森林,與及香港《明報》老闆張曉卿老巢詩巫(Sibu)嘅國陣票倉。

選舉結果是變天成功,當然值得高興,但除咗要為巫統執政60年嘅爛攤子收拾殘局做準備之外,當務之急要做好防範納吉、巫統會搗亂搞事嘅措施。

馬哈迪响5月7日爆Seed 指就算變天,納吉有可能唔會和平地交出政權。須知道巫統有過一段使橫手推翻選舉結果嘅歷史,所指的是1969年的「5.13暴亂」。呢場暴亂係納吉老豆、第二任首相拉薩 (Najib Abdul Razak) 有份策動,馬哈迪係另一個主事者。老馬咁講,係要話俾納吉知「我估到你打算做乜,但我知道點樣向你還拖」嚟警告納吉同巫統唔好亂嚟,最起碼擺個下馬威出嚟;另一方面係提醒馬來西亞人民要防範任何煽動。

納吉會否「子承父業」表面上是未知之數,但國民警衛後備軍已經四處出動架設路障,以至响雪蘭莪、森美蘭出動水炮車,所以還是不能排除納吉會發爛咋。亦所以馬來西亞嘅同胞們慶祝變天之餘要慎防一切可能引起混亂嘅跡象。

另一個要做嘅準備就係提防納吉走佬著草。1MBD 嗰26億令吉貪污必定隨住變天而「出事」,而且查起上嚟隨時會掘出更爆嘅驚天內幕,例如蒙古女郎案背後嘅內情、再例如 MH370 之類...... 納吉唔只水洗都唔清,仲可能牽連埋沙地阿拉伯、支那共匪,到時就算越獄都唔知走得去邊。所以納吉出走嘅可能性係存在,甚至比起「重演5.13歷史」嘅可能性更高,而且亦有跡象。本來佢原本 0200 响吉隆坡開記招,臨時臨急先通知傳媒改嚟緊 1100。呢九個鐘佢會做乜無人知,但當年菲律賓總統馬可斯夫婦都只係用咗唔夠6小時就逃出馬尼拉著草..... 佢要著草可以去吉隆坡KLIA之外,彭亨亦最少有一個關丹 (Kuantan) 機場;又甚至乎佢搵艘船出海一日就去到越南金鷗。

佢著草都會對馬來西亞社會未來走向造成隱憂,所以要設法阻止佢逃亡。但馬來西亞嘅朋友請緊記「留生口」!

至於「收拾殘局」詳情就稍後另文慢慢講,但都要必須盡快做好個人準備,尤其是心理準備方面。最迫切嘅莫過於摒棄種族主義嘅心態思想,每一個人不論膚色、宗教信仰,講 Bahasa 又好,講華語、閩南、客家、白話...... 乜話都好,都是馬來西亞嘅一份子,變天就是大家齊心而成事。馬拉人望住巫統所謂「不俏子」嘅新加坡同埋檳城,該明白華人唔係入侵者,平等地位原來有最大得益;華人就唔好再「心繫『祖國』」,或是老土啲講「祖先揀得响呢度(馬來西亞)落腳就扎根於此」。其他族裔的也當有類似嘅想法。再講得白啲,馬哈迪、林吉祥、林冠英都可以走埋一齊為國家做咗件咁大嘅事,就是要學習嘅榜樣。

依家只係一個開始,又雖然暫時解除「馬爆」危機,但始終有好多事情話唔埋。不過初步分析選舉結果,尤其是州政府執政權嘅分佈,就是上天已經給馬來西亞祝福和做了一些準備。大馬嘅同胞朋友,俾啲信心啦!

返回主頁

沒有留言: