__

__

租車撞咗必須負責任,但租車公司亦可能有問題



小弟以往去台灣都有租車自駕,方便去做嘢亦有去玩。雖然未至於好熟台灣租車嘅行情,但點都叫做有概念。因此,一睇到台灣租車撞到右邊車身劏晒但賠償走數單嘢,即時反應除咗覺得條友唔負責任走數正一仆街行為之外,另泛起最少兩個問題 ── 條友點揸車架,同埋呢間係乜嘢租車公司。

容許小弟囂張咁講,我去到台灣如果租車揸,一坐上司機位即刻成功「轉 Channel」右軚變左軚。頂圖張相攝於明池森林公園,即是台7線,條路嘅難度比香港荃錦公路高 N 倍。對我呢啲「揸咗幾呀年車」嘅人嚟講,一望到今次事件架 VW Caravelle 右邊車身掃晒欄,明顯地條友好大機會因為唔慣揸左軚,睇錯位而出事。對右軚 vs 左軚嘅操控分野有 hesitation,加上台灣路面其實「唔講得笑」,無必要真唔好搏。

租車撞咗要賠係好正常嘅事情,但我一睇租車公司要求賠償全數維修費用約70萬台幣,就覺得好奇怪。因為「正常」而言,租車公司提供嘅保險除咗香港通稱嘅第三保、台灣叫責任意外保險之外,亦會有提供「損毁免責保險」,英文 Collision Damage Waiver (簡稱CDW)。

CDW 的概念相當於「全保」,即是有乜大吉利是租車者只需承擔香港俗謂「墊底費」的上限金額。台灣的租車公司一般的 CDW 賠償上限由台幣一萬至三萬。台灣有部份租車公司會將 CDW 列為附加項目,但 CDW 銀碼不過是每日大約一百多元港紙,有啲算死草貪小便宜嘅柒頭就是會慳埋呢少少錢。要賠償70萬台幣,就是有可能條友就是呢啲算死草,結果就出晒事。不過,亦有另一個可能性 ── 間租車公司嘅合約條款有問題,甚至是成間公司都有問題。

台灣有唔少租車公司,有規模的除咗國際知名品牌 Avis、Hertz 之外,「本地薑」計有格上、和運、中租等等。但同時有唔少細公司,甚至經營模式類似香港以前盛行的「車檔」。「車檔」嘅車租可能稍平,但往往潛在「無事由自可,有事大煲鑊」嘅風險。CDW 是附加選購之外,合約條款亦可能潛藏有乜大吉利是就有非常嚴重後果嘅條款,例如有如今次事件要客人承擔全數維修賠償等等。

小弟 Search 過台灣有邊間租車公司有出租肇事嘅 VW Caravelle,就有母公司為台灣上市的中租租車。但作為上市公司旗下公司,無乜理由會是員工/所謂負責人嘅私人 Facebook 帳戶出post「追數」,而應該循正式法律程序處理。就算要進行輿論戰,可直接透過台灣、香港傳媒「爆料」。呢個已經使我產生該租車公司是甚麼來頭嘅疑問。引伸出嚟嘅第二個可能性,就係呢間租車公司「鬼鬼地」,可會不是「攞正牌」(車輛有齊租車批註及相關保險) 的租車公司?或是份租車合約條款有「鬼」?

唔係要為走數嘅嗰條友開脫,講多一次:租車撞咗要賠係天公地道,而係租車嘅嘢唔好貪平,更加唔好貪小便宜。相對車租銀碼,CDW 費用真係好濕碎。更重要嘅係要睇清楚合約條款,千祈唔好心存僥倖。唔好話台灣係左軚,操控完全有異於香港慣常嘅右軚所構成嘅風險,就是最簡單一句「你小心人、人唔小心你」嘅常識而搏唔過。

當然,租車公司具體係乜嘢料子,有待那位游先生等人作公開交代,但無論如何,賠償「走數」就是不負責任;就算租車公司真係「鬼鬼地」,無睇清楚合約條款亦係嗰位鄧生自己嘅責任。所以點講都好,賠償係必須。

後記:
1. 台灣有大把旅遊車公司有9-14座VW Caravelle、VW Crafter、VW Sprinter 小巴出租。價錢就自己查啦;
2. 雖然堅係要「追殺」事主走數,但香港啲報紙報導一味 Spin 撞車唔賠,唔好話無起清楚間租車公司個底,就是租車條款、CDW之類嘅嘅問題都無去做 facts check,真係睇見有少少眼冤;
3. 呢件事隨時再次引起台灣及香港司法制度不互通嘅問題。就算唔要「政治化」嘅角度,隨時影響到香港人日後在台灣租車嘅困難。鄧生隨時「累街坊」

返回主頁

沒有留言: