__

__

車cam 犯法?運輸署憨膠咋!



早幾日網民翻出舊年報章報導,指車cam 因為有顯示及播放功能而會犯法。如今香港馬路周街柒頭司機,車cam 已成必須品,報導咁講即係叫人唔駛裝,有得啲交通意外口同鼻拗羅生門。雖然如今有多款沒有屏幕的車cam 供消費者選擇,但在使用便利、可提供保障嘅程度其實都成疑問。

所謂裝車cam 犯法嘅問題,源於《道路交通(車輛構造及保養)規例》(Cap. 374A) 第37條


驗車官「肥」車cam 所持嘅理據係「可以播放映像」而不符合第(3)(b)段,表面睇確係啱晒,但要留意連同GPS (第(2)(d)段) 都係在2000年加入的條款。現在普及的Micro SD 卡錄影器材在2000年時有嗎?就算是必須接駁電腦才能觀看錄影片段的車用硬碟式錄影系統响當年都係剛剛起步。即係話呢條法例過時咗接近二十年,沒有如老懵董金句「與時並進」。

聚焦返當前的法例條文本身,第(1)(a)(b)兩段嘅目的,係防止司機睇到屏幕而分心,尤其是俗稱大MON Hifi、或旅遊巴士車頭天花部大電視播放影片,避免司機掛住睇戲造成危險,基本原則而言係合適的。就第1 (c)段如果揸正嚟做,所有觸控式屏幕的音響都係犯法,因為例如由聽歌轉收音機、聽緊商台轉去港台,都唔係「開關」或「控制音量」,更唔好話揀歌。直接啲講,响目前法例條件之下,運輸署署長應該授權香港海關將全部大MON 音響「冚檔」同禁止入口及銷售。

至於有屏幕的車cam,錄影期間的畫面是實時映像,是符合第2(b)的「該汽車四周範圍當時的閉路式視景」的條件,以普通法原則而言係合法的,但概念上有兩個爭拗點:

第一,「閉路式」(closed-circuit) 是指在電力或電子工程層面的電流 / 訊號傳遞的線路狀態,即如日常通俗說話「通電」。所謂「閉路電視」之意是攝錄鏡頭經電路傳送至屏幕顯示映像。目前流行的 Micro SD 卡車cam 係無電線,但也是經過 closed-circuit 傳送映像到屏幕。

第二,因為有播放影片功能,而不是「當時」(條文英文版 current closed-circuit view) 的畫面。但是,會用車cam 的人都是想錄影行車片段保障自己,誰會駕駛期間無端端手痕走去撳個制播放之前的錄影片段?單是呢一點已經睇到驗車「肥」車cam 係矯枉過正。

另外,在實際使用及可靠性的角度而言,有屏幕予司機睇到錄影進行中係必須的,因為至少知道錄影功能係咪正常,或知道有故障需要維修以至買過部新機更換。相對地,近年多款無屏幕的車cam,司機必須另外在智能電話裝設相關的 APPS 才能觀看映像。要睇到「當時視景」就要長開電話,情況同有屏幕的車cam 一樣,即係基於法例嘅原則精神不過是「自己呃自己」。但是唔長開電話,若果車cam 或 APPS hang 機又唔會即刻知道,失去咗對司機同乘客嘅保障。

相對台灣品牌如Garmin、Papago (利申:我用緊)、日本品牌如 Fujitsu (利申:我有一部 for 外遊租車自駕) 等,除了供電單車的型號之外,沒有無屏幕的車cam 產品,可以話那些無屏幕的車cam 只不過係應付香港未有與時並進的法例及只圖擺官威嘅驗車官而已。

至於車cam 的安裝位置,根據現行法例中的第(1)(a)段「不得安裝在駕駛人座椅前面的任何地方」,因而只可以裝在中鏡下方或左方。表面上車cam 裝在那處是無傷大雅,但是嚴謹得有點雞蛋裡挑骨頭考慮到法庭舉證的準確度要求的話,就必須好似我咁裝在中鏡的右側 (我認擺明犯法,或好聽啲「公民抗命」)。原因是雖然目前本港市面上買到的車cam 的鏡頭視角超過100º(普遍約110 - 140º),如果遇上識嘢嘅律師就會提出「片段映像角度位置與司機的視線有差別」質疑錄影片段的可信性。

事實上,以下圖輔助解說。以私家車原廠中鏡(連鏡框) 闊度約180 - 230mm、車cam 視角135º 計算,安裝在中鏡左方(下圖紅線)或右方(下圖藍線)的兩側映像範圍差距(黃色虛線) 就有500mm,相當於1/3架私家車闊度。


綜合而言,車cam 本身是符合 Cap. 374A sect. 37(2)(b) 的條件,無理由唔裝得;第(3)(b) 段造成的「不合法」可謂多餘,又或者臭串咁講,如果會揸緊車無啦啦撳制「播片」嘅柒頭司機根本唔適合揸車,唔該「交返個牌出嚟」。

至於第(1)(a)段的安裝位置問題,我個人會基於歐盟的碰撞安全要求,只要唔會在萬一發生意外撼到頭就可以了。另外,雖然歐盟尚有一項前方視線安全標準規則,但目前在香港普遍有屏幕的車cam 的大小也只是約80x80mm,只要不是安裝在水平視線高度該沒甚麼問題。

由此可見,Cap. 374A sect. 37 對車cam 嘅監管唔單止過時,更嚴重影響司機及乘客的權益保障。因此,小弟認為車cam 唔應該視為不合法裝置,運輸署驗車中心 / 外判私家車驗車中心不該因為安裝了車cam 而「肥」。

再講多一次,如果會揸緊車無啦啦撳制「播片」嘅柒頭司機根本唔應該揸車。法例確係要為社會提供保障,但管埋啲 common senses 唔會做嘅事就有是多餘。運輸署與其管埋啲白痴行為,不如搞好啲駕駛資格考核同教育,唔好掛住(疑似)勾結車行搵錢,同拎住嚴重 outdated 嘅法例擺官威啦,唔該!

至於前段順便提及的「大MON」音響,小弟立場一樣 ~ 揸緊車會睇戲的就「唔該交返個牌出嚟」。一係就唔該陳美寶立即通知鄧以海(海關關長)以出售不合法商品為理據全香港冚檔,但啲車主、旺角麥花臣球場、銅鑼灣威菲路道一帶會發生乜嘢事就後果自負。

返回主頁

沒有留言: