大年三十，先祝大家羊年飽足，洋洋得意。
每逢農曆新年，好多本來係「野生」(即係好日唔會見面) 嘅親友都會相聚，好聽啲講就係趁新年見下面，唔好聽講其實「唔係新年都唔係好想見」。而所謂拜年活動，响共匪治下嘅香港導致嘅社會氣氛變質，其實就變成互相晒命、抽水嘅場合。講嚟講去都係嗰啲話題，更有啲真係講到口臭，甚至尷尬收場。
其實嗰啲話題，說穿了又是小農奴隸基因之「只顧門前三畂田」。雖然100毛甚至商務都整咗啲Script 出嚟，但我覺得還是未夠火喉，咁就整個小弟嘅版本俾大家參詳一下：
小學雞篇
親：嘩，咁快咁大個喇，嗰陣時見你仲係塞豆窿咁
回：世界上最大粒嘅豆應該係蠶豆，SIZE 大約係2cm 左右。阿媽咇我出嚟嗰一刻都最少40cm
親：讀幾多年班呀?
回：如果知道我幾時出世，計下數都知我讀幾年班
親：有無考第一呀
回：我就算有考到第一，咁第二個同學都唔知點答呢條問題好
親：就快升中喇喎，媽咪有無同你揀定啲心水學校呀?
回：讀國際學校先有得揀讀邊間嘅姐，九年免費教育嘅學生，全都都係等政府派位
中學鴨篇
親：嘩，睇住你大，咁快讀中學喇，俾心機喇
回：我個名唔係沈詩鈞，點會呢個年紀係入大學呀
親：出年考會考喇喎，讀成點呀?
回：依家無會考，只有DSE。不過就算攞晒五星星都好，將來咪又係响街做易拉架小販
親：有無人細鬼大拍拖先?
回：中學生不應談戀愛，好似好啱。不過讀好多歷史書呢，古時啲人十零歲已經結婚生仔咯
大學鵝篇
親：阿乜太呀，幾快呀，你個仔/女讀大學
回：所謂光陰似箭、日月如梭，二十個年頭有幾耐吖
親：讀乜嘢系呀?
回：今時今日嘅香港，讀乜閪都無關係啦，唔埋堆共產黨出賣良知，最終咪又係乞食
(如果讀政政的話，可以回：咪讀埋啲香港人成日認為最唔應該理嘅污漕邋遢嘢囉)
親：有無拍拖呀? 幾時帶個女 (男) 仔嚟俾我哋見下呀?
回：拍拖姐，又唔係要對親家，最緊要我鍾意佢、佢鍾意我咪得囉
「社會大學」篇
親：做緊邊行呀?
回：依家香港地除咗投共，做邊行都係餓我唔親、飽我唔死，餐搵餐食餐餐清架啦
親：有女/男朋友未呀，駛唔駛介紹個俾你呀?
回：雖則古語有云「父母之命、媒妁之言」，但依家係2015年，唔係唐乜宗嘅配婚令年代。又呢.... 所謂唔做中唔做保唔做乜乜三代好，我都係同你著想咋
親：幾時買樓呀?
回：你幾時送100萬俾我做首期? 天水圍四百呎都成三百幾萬呀
親：幾時結婚呀?
回：雖則古語有云「男大當婚女大當嫁」，古時啲人都係十零歲就結婚生仔，但依家我想同女(男)朋友去開房，時鐘酒店都俾大陸人霸晒嚟瞓..... (詳參：食女？強國人迫到你連女都冇得食！)
親：幾時結婚呀? 你老豆阿媽恨抱孫呀，快啲喇
回：佢哋想湊B其實可以去做鐘點，過到手癮之餘又可以搵多個錢飲茶賭下馬仔，仲爽啦
後記：正如情人節一樣，對女/男朋友、老公/婆好，日日都係情人節，唔駛等2月14日先至慶祝
呢啲一年先見得一次嘅所謂親戚，迤咗咪算囉~~~~
返回主頁
