逆線行車如斯普遍之迷

***本文為 HK Car Channel 評論文章***

近年出現唔少車cam 片網上「分享」係逆線行車，甚至造成意外；「案發」路段乜都有，日前中環灣仔繞道嘅一單，網民上載到 Facebook 之後唔駛24小時，報章及電視台已經廣泛報導，仲搵到相信係車主嘅息影藝人吳啟明，而涉事司機亦已經投案。呢類危險駕駛罪行真係一單都嫌多，但點解屢見不鮮，係咪同「中港車」、「中國車牌免試簽發」有關，定還是有其他因素？

或者响政界總會有人話唔好上綱上線，又的確逆線行駛嘅涉案車輛唔一定係「中港牌」，但司機嘅駕駛執照係咪所謂「淘返嚟」── 即係透過「中國車牌免試簽發」制度取得香港駕駛執照，就無從稽考。但動輒訴諸「中国」呢兩個字，都唔係純粹「歧視排外法西斯」。

第一，眾所周知，香港係右軚而中国係左軚。駕駛方向不同，因而有司機未能適應，可以話係原因，但唔係推搪藉口。恕我囂張，唔好話我近年去台灣，就算十幾年前要去深圳、廈門...... 一坐上司機位即時「轉台」，唔止係軚盤由右轉左，仲有係行車方向。而查實嚴格講，呢啲根本就唔係囂，而係 MUST。你無意識區別左軚定右軚，唔止係架車嘅軚盤位置，最緊要係道路嘅設計行車方向，根本就無資格响非定居地揸車。

第二，香港唔少路口設有行駛方向規定，即係例如彌敦道北行由北京道直到佐敦道只能直駛、窩打老道交界不准左轉；或是如佐敦道來回程彌敦道交界不准右轉。但响中国除咗單程路 (都極少數)，係唔會有呢類限制。引伸出嚟，要是「個牌淘返嚟」嗰啲司機，無考過香港嘅駕駛考試 (雖然垃圾不堪，尤其係路試)，根本未必有呢方面意識；然後的，因應左軚 vs. 右軚嘅問題，隨時一個唔覺意就駛入咗相反方向嘅路面。

第三，更大嘅問題係响中国嘅駕駛態度，又唔可以話目無法紀嘅...... 但好多時會為咗逃避罪責，或者心存僥倖，只好一於張錯就錯，繼續「逆流而上」直到一係「碰碰車」發生、一係就到下個路口逃之夭夭。

講返中環灣仔繞道單嘢，照睇條車Cam 片，估計吳啟明坐住嗰架 BMW 應該係由會展新翼 (即東行灣仔(北)出口)「捐」入去中環灣仔繞道；吳啟明回應傳媒時表示要前往 Four Seasons 飲宴；而由會展去 Four Seasons 嘅正常行駛路線應該係 會展道 - 夏愨道 - 干諾道中 - 右轉康樂廣場 - 直去民耀街 - 左轉金融街 (即係IFC2側邊)。會唔會係吳生為咗慳時間、同時以為自己响中国(深圳河以北)境內，然後老點個司機咁行呢?? 睇吓個司機份口供咯。如果我哋「烏鴉口」的話，唔該丁旺蟹孭返自己嘅責任，唔好做無良僱主要個司機食晒。





不過，又公平啲講，唔計呢宗事件吳啟明講嘅「本地」司機，始終係有「陀地」司機都犯呢啲錯誤。

「陀地」司機點解會犯呢啲錯誤，正常嚟講真係唔知乜原因，講緊睇路牌真係最基本，而又是見到自己係「逆水行舟」就應該醒水，盡快停車同留意路面情況進行修正。但觀乎返網上流傳嘅車cam 片，佢哋都好似唔知自己錯，又或者可能一如中国嘅「文化」。呢個係咪同考牌制度有關？我就咁睇，雖然香港嘅考牌制度真係垃圾到不堪，但地球上有樣嘢叫 Common senses，揸車就要留意各類路面資訊，唔係話「考牌啲嘢响現實駕駛實踐唔」就可以推得一乾二淨。

傳媒報導關於呢宗逆駛事件提到，警方已經接手並循「危險駕駛」方向展開調查。法例訂明最高刑罰係監禁三年，不過所有案例 (唔計「老危致死」) 都只係罰錢停牌，夠唔夠阻嚇作用？坦白講，Common Senses 錯得嘅仲構成人命同財產安全危機，仲要已經咁多單，客觀講即係唔夠囉。只不過古語有云：香港政府係唔死人唔冧樓唔做嘢，大家都係各自執生啦。不過咁，千祈唔好遇到我或「巴士判官」，否則...... 後果自負。






返回主頁

西九公路意車禍，人為白痴錯誤鑄成大錯

今早西九龍快速公路近西隧入口發生嚴重交通意外，一輛城巴撞向一部故障停响行車線嘅貨車，撰文一刻已造成兩人死亡。睇晒網上流傳嘅相片、車CAM片，肯定意外成因一定唔係啲報館、電視台搵嗰啲專家講嘅車速問題；而城巴車上張司機櫈飛埋出街，亦唔係啲濕鳩政客以為萬能嘅安全帶可以保障安全。加埋各路友好提供嘅資訊，可以話係一宗因多個白痴錯誤造成嘅不幸。

事發位置係西九龍快速公路，但是已經過咗「富榮花園出口」；路面已屬西隧管制區域。



有來自友好方面嘅消息指 0917 已有駕駛者見到故障嘅貨車。如果呢個消息屬實，相對城巴直鏟埋去意外發生時間係大約 1015，嗰一個小時裡面，西隧管理公司搞乜春？先唔好話出動拖車而收費司機必會拗數，但就是睇片睇相見唔到警車或西隧公司的巡邏車，亦唔見有警察或西隧公司嘅職員指揮交通，西隧管理公司擺明係失職。

BTW，警方响頭先見記者時話「不屬西隧管制範圍，但具體意外位置仲要有待調查」，家陣有圖有片有真相。港共傀儡政權又想包庇支那共匪中信泰富呀！

响任何道路壞車，都係盡可能將架車駛埋一邊。根據報導，出事貨車係爆胎，理論上其實仲可以駛去路肩，頂多係條呤花咗或變形。但個司機無駛埋去，已經係第一項處理程序錯誤。另外，報導又指到場維修嘅師傅指貨車上太多貨物，要求貨車司機卸下部份貨物先至進行換胎，呢個又係勁無腦嘅行為。

根據《道路交通(快速公路)規例》(Cap. 374Q) 第7條，行人唔可以响快速公路上走動，基於呢個原則，係唔可以搬貨；即使第23條「因意外或緊急事故而正獲得或給予所需協助的人獲得豁免」，如前述所講，架貨車其實唔係行唔到，可以駛埋路肩。即係話連個維修師傅都犯咗一個白痴嘅錯誤，又或者埋下咗更嚴重危機嘅伏線。

在於架貨車嚟講，最錯最錯嘅就係响無任何向後方車輛發出告示嘅情況之下打開尾板。先唔講「向後方車輛發出警示」呢樣仲涉及到運輸署嘅責任所在，打開咗尾板就遮晒車尾啲燈號，就好似以下呢張相片咁



加上肇事貨車嘅貨廂係白色，有時真係好難及早察覺而採取補救行動。綜合呢兩項嚟講，千錯萬錯就係無駛埋路肩嘅錯，然後就鑄成大錯。

响歐洲、台灣、中国，都有法例規定，壞車的話司機要盡切實最大可能將車駛埋路邊，並且要在車後最少50米擺放「緊急三角標誌」向後方車輛發出警示。所以响歐洲、台灣以至中国，所有車輛出售時都配備最少一個「緊急三角標誌」；香港出售嘅歐洲車都有呢個東西，就係咁解。


涉事嘅貨車有無就唔肯定，但如果有擺到「緊急三角標誌」，都未必有咁大件事。不過，運輸署竟然係叫人唔好擺。

道理上，因為快速公路嘅車速而唔好擺，好似係啱。响歐洲或台灣，都係要車上嘅人盡快撤退到路邊為先，但盡可能响安全嘅情況下擺放「緊急三角標誌」。香港就直頭唔好擺，簡直係白痴。


而加上西隧或警方响壞車到車禍發生之間嘅一個小時無到場採取任何適當行動，就成為鑄成大錯嘅另外一個因素。

至於架城巴，暫時以我哋所知係開工後第二轉車，理論上應該唔會有疲勞駕駛嘅可能，但當然仲有待警方嘅調查。從流傳嘅車CAM片睇到，城巴車長應該有剎車但就收制不及，呢個情況其實同香港嘅駕駛訓練有關。事關香港由考牌開始，到政府嘅所謂宣傳教育，在緊急時只有「獨孤一味」踩迫力。但响外國，尤其是歐洲，「救車」要採取嘅動作唔一定係踩迫力，而係要因應當時路面狀況，可能係扭軚閃避，甚至乎係加速。多條車CAM 片顯示，當時响城巴兩側都係空的，司機係可以扭軚過線避過呢一劫。





另外，又係由考牌開始，唔鼓勵甚至可以話禁止司機要盡早觀察及採取行動。以往我就講過，考牌要爬頭係要駛到距離「死車」少於兩個車位 (大約10米)，先至好做觀察、打右燈、抽頭。但响外國，司機嘅視線目標放得越遠越好，响高速公路要100米或以上。以今次車禍為例，城巴車長應該去到 剛過咗「西隧出果欄」天橋 ，望到嗰部貨車(如下面截圖，紅色標記如貨車的大約位置)嘅時候就要評估係咪壞車唔郁，唔係齋睇有無燈號，係睇架車有無移動嘅跡象、或其他異樣，然後就採取行動。



城巴嘅車長訓練有無教我哋當然唔知，但基於考牌制度同合格要求，加上長久以來响路面嘅觀察，香港人揸車真係唔會望咁遠而一早諗定有乜 Contingency 要準備。

由此可見，今次車禍根本係可以避免，但就係一大堆白痴錯誤就搞到無咗兩條人命。更重要嘅係，如果貨車真係九點幾就「跪咗」，有一個小時俾警方同西隧處理都唔搞，呢個責任就絕對不容推卸。最後，願兩位死者安息，家屬折哀。

備註：**本篇為與 HK Bus Channel 共同撰文**






返回主頁

香港垃圾考車牌制度之「人哋錯都係考生錯」

我寫過好多篇關於香港嘅駕駛考試制度到底有幾垃圾，所謂合格標準有幾唔合理；其中一樣講過嘅係 大路直去有車「玩嘢」响小路衝出，DUP 又肥「不適當剎車」、唔 DUP 又肥 「不適當觀察路面」，呢種任何 incident 係咪都唔合格嘅做法，搞到好多司機唔知何謂防範意識，甚至我敢講依家好多「挑機」駕駛行為係咁嘅合格標準而導致。

最近有網友向我「吐苦水」，話考車牌時就遇到咁嘅情況而不合格要重考。我同佢詳細了解晒件事之後並徵得佢同意，決定公開呢個實例，證明香港嘅駕駛考試有幾痴撚柒鳩線。

苦主係 N 年前响歐洲留學時考到車牌，一直有响當地揸車。幾年前返香港，以免試簽發攞到1,2號車牌，即係私家車同輕型貨車。舊年「手痕」想考巴士牌，於是去報名，報考柴灣試場，搵咗架棍波巴士嚟學車。

佢「訴苦」嘅內容，當然有講到軚盤、波棍、極力子操作嘅合格要求。我解釋佢知「香港考牌就係以半世紀以前嘅汽車科技為基礎」，例如「劣豬腸」攞軚係基於以前啲 Bedford、Austin、GUY、Daimler...... 無液壓輔助，真係要「豬腸軚」先至攞軚 (我試過揸架軚泵漏晒油嘅旅遊巴去車房、同試揸過 Guy Arab V。平常嘅「反手軚」真係扭唔到)。兩腳極力子係因為以前啲重型車波箱無 Synchronize gear ring，要靠轉波過程調節引擎轉速先至入到波...... 佢聽晒之後，條氣無「順」到架，仲話「香港考牌真係痴撚線」(堅係有粗口)「家陣2020年都嚟緊喇，仲用1960年代嘅標準嚟考牌」

講返佢陳述嘅考試過程。苦主話一直都相安無事，响柴灣迴旋處等咗超過兩分鐘先至出到。乜話？等咁耐？我之前講過，考牌嘅合格要求係迴旋右邊視線all clear 完全無車先可以俾油駛出，所以咪要等到天荒地老囉！

臨返到試場，由永泰道左轉嘉業街右轉常安街，佢話轉完彎，自己行車方向路邊無車泊响度，亦無的士小巴响前面；有見到對頭方向如下圖 Google 街景架的再前少少個紅色標記嗰度泊咗架車。



當苦主話未到中銀招牌，突然迎頭有架車「抽頭」，苦主都有收油都輕踩迫力「做樣」(平常揸車梗係響咹砵鳩佢啦)。

但考試結果係第34 項「不顧其及其他道路使用者」一項俾咗 S。

佢呢啲「蕃書仔」梗係走去搵個考牌官講數啦，個考牌官話「有對頭車你唔停車」。苦主當然同佢嘈「仲要我正線，佢逆線，佢錯唔係我錯喎；老鍊咁遠，仲要我咁慢，咁都S？有無搞錯呀」。苦主引述考牌官嘅回應，又係我以前响驗車中心成日聽到嘅「總之嗰樣係嚴重錯誤」啦。

老實講，我唔响現場當然唔知成件事堅定流。但我基於聽過唔少「小路有車衝出大路，DUP 又肥唔 DUP 又肥」嘅例子，我選擇相信苦主，所以爆呢件事出嚟。





或者運輸署考試組班鳩官會話我老作老屈。無錯，就係考試車輛無錄影，車上得個考生同考牌官，根本就係羅生門。但你哋班考牌官撚樣幾十年嚟响咁嘅條件下恃住操生殺大權，利用咁撚變態嘅 Marking scheme 嚟「調較」合格率 Quota，製造無數「冤案」，就係不容否定囉！我依家就掉返轉，擺明車馬亦係恃住法律辭彙 No Third Party Witness 老屈返你哋班仆街考牌官轉頭，吹咩！考試組覺得我老屈呀條氣唔順、個心唔舒服呀？學英國、日本咁，考牌車輛全部裝錄影，咁我咪無得屈囉。但你哋敢咩？我就睇死你哋只係想繼續「用明朝嘅刀斬清朝嘅官」而唔會夠薑就同陳美寶講咯！咪話我唔提你哋班仆街考牌官，俾心機咁樣落去，俾考生打呢啲新聞遲早有第二單，第三單 ...... 第N單 are coming to town。

嚟緊我會設立一個平台，收集任何考牌冤案。如果大家對駕駛考試有任何不滿，可以 email 或 Telegram 俾我。我會整理之後，公告天下。並會評估能否循運房局嘅申訴機制提出上訴。

我就講明，公正得嚟點都有少少會偏向考生，因為香港嘅考牌制度同班考牌官實在太仆街。






返回主頁

豐田 Hiace 大改款

先啟：今次唔講「豐田霸權」呢四個字，純粹車評講吓市場分析。

平心而論純粹以車論車，Toyota 唔係無好嘢。至少 Camry vs. Nissan Teana 我會揀 Camry；又或者我返鄉下古晉租車自駕，係揀香港無嘅 Vios 而唔揀睇見個樣就想嘔嘅日產 Almera (即係煤氣公司嗰隻日產 Sunny，你話係咪嘔吖)。

今次先講最新鮮滾熱辣嘅 Hiace 改款「傳聞」。


到撰文嘅呢一刻，日本豐田車廠或香港皇冠都未發表官方公告關於新一代 Hiace 客貨車嘅消息，但從網上流傳嘅相片，都似層層架喇。

查實 Hiace 改款消息由2017年中開始傳出，事關豐田聯同法國PSA集團，即係 Peugeot 同 Citroën 嘅母公司，繼 Aygo / Peugeot 108 / Citroën C1 之後响2016年再度合作設計開發出一款新的客貨車，各自掛上自己嘅品牌 ── Peugeot Traveller, Citroën SpaceTourer, Toyota Proace 在歐洲銷售。




其中，豐田 Proace 係入替歐洲版 Hiace (即係香港有見過的 Granvia / Regius 七人車同一個車殼)，就有風聲指今代 Hiace (200系) 將會停產，由 Proace 完全取代。

當然，呢個消息一直無法證實；而我嘅睇法係「日本版」Hiace 唔符合歐盟 class M1 / N1 嘅 ECE-R94 前方撞擊保護規則，美國亦有類似嘅規定，在商言商嘅原則之下，應該「統一天下」唔分開兩個車款以節省開發及生產成本，所以相信同預計個傳聞會成真嘅可能性頗大。

之後到2018年年中，台灣嘅汽車媒體就有消息報導，指 Hiace 將會重返台灣市場，我就開始比較留意有關嘅消。事關台灣交通部將 ECE-R94 納入道路法規，所以大家响台灣無見到香港周街都係嘅「日版」Hiace。如果 Hiace 能重返台灣市場，即係會引入「歐規」型號；又是在商言商角度，無可能只係台灣賣「歐規」Hiace 而應該成個亞太市場都係賣「歐洲版」。既然有 Proace 呢隻現成產品，又無理由花錢另外做 R&D，我就開始相信個傳聞會係真嘅。即係香港都準備「大改款」。

同一時間，日本嘅汽車資訊網站亦有消息，全部都係「確認」今代200系 Hiace 將會在2019年停產，推出全新的300系，並且言之鑿鑿話要符合歐洲安全標準而將會係以 Proace 改返用 Hiace 呢個名推出市場。即係我一直响心中、只同少數朋友吹水講開嘅推測應該「走唔甩」。

暫擱近日流傳嘅「諜照」外觀上同 Proace 差天共地，維持就是歐洲的 Proace 取代 Hiace 嘅揣測去分析。Proace 嘅可取之處就係符合 ECE-R94 嘅設計，呢個對駕駛者同前排乘客嘅安全係非常重要。事關「日版」設計，車頭一撞，司機同前排乘客就保證一定要等消防員到場先可以被救出。只不過對於揸慣 Hiace 或 日產 Urvan 嘅人嚟講，歐式凸頭設計「好黑人憎」；而且因為凸頭設計，尾廂空間一係縮短，一係就全車長度超過5米 (例如平治 Vito、福特 Transit，總長達5.3米)，想泊錶位都頭痕，於是唔少人話「如果 Hiace 改到咁就唔再買，轉買歐洲車喇」。



事實上，當平治 Vito 116 淨車價大約34萬，Full option 齊料只係掂住 40萬，而 200系 Hiace 淨車價都接近32萬，已有唔少人話「假假地都叫做有粒 BENZ 星照吓吖」而放下慣性收視。另外，同 Proace 「根本係同一架車」嘅 Peugeot Traveller 早已在香港有售，淨車價大約31萬。部份「膽大包天」夠薑品嚐「法蘭西硬膠」嘅車主，用過之後嘅評價算是中上。Hiace 改款之後仲有幾大優勢真係好難講。





如果係嚟 Proace 改名的 Hiace，因為同 Peugeot Traveller 嘅規格相同，售後零件供應唔駛擔心。港府亦大手買入逾200部，而根據政府嘅招標條款，森娜美响售後服務點都要撐到行不容有失。但可惜根據「諜照」同流傳緊嘅機械規格可以話係「200系駁長個車頭」，啲修理佬嗰句「豐田唔會無零件」嘅口頭禪就似乎「凍過水」。因此，我唔係好明日本仔做乜唔直接引入 Proace 嘅設計同生產線；除非豐田同 PSA 有協議 Proace 只能在歐洲銷售，但我又唔覺得呢個可能性好大囉。如今豐田廠方既要花費 R&D 「日本版」Hiace 300系，又另到香港失去「慣性收視」嘅條件，皇冠車行嘅往後業績會點，只能用「走著看」呢三個字吧。

後記：我嘅自家資訊平台嚟緊會有變革，敬請大家密切留意。






返回主頁

舉報快線撚信件Template

一直以嚟，唔少駕駛者响馬路上遇過其他車輛有違法駕駛行為，威脅到自己安全。做「車Cam 撚」將影片擺上網只係純粹發洩，又或惹埋啲「花生友」講乜春「咪閪多事啦」「你無犯過法咩」之類嘅爛膠回應，其實都幾無謂。但對唔少人嚟講，要實際行動作出舉報又未必識，識又好似覺得好麻煩，咁我就提供 Template 俾大家參考。

响 Medium 寫過「快線撚」唔只阻住地球轉，仲隨時會導致交通意外嘅發生。另外，有報紙無端端報導，响快速公路Cut左線扒頭係違法，但就唔講「快線撚」先至係禍源。既然係咁，就整個 template 俾大家。

先講一啲基礎法律概念。作出舉報需要提供具備以下嘅陳述先至「成到case」俾警方「開快勞」。包括：

1. 你揸緊架乜嘢車，確定你係目擊人士；
2. 車cam 乜嘢型號，證明條片嘅 file data 關於攝錄裝置嘅數據吻合，同證明你係點樣錄到條片，確保唔會辯方 Challenge 條片嘅來源。與及予警方或律政署在需要時可以聯絡生產商或代理核對資料；
3. 涉事嘅車輛車牌。以至顏色、外型、類別等等；
4. 案發時間地點，事發經過，涉事車輛做過啲乜而你認為係違法嘅嘢。甚至對你或觀察到對其他車輛造成乜嘢安全威脅

如果知道違反邊條法例，就引用埋；唔知道就唔好寫，費時造成「證供與控罪有錯」而被踢甩。另外，車cam 片一定唔可以剪接，唔可以cut 聲，就算錄到你爆粗小人老母都要俾警方聽埋，避免成為辯方以「證供片段經過剪接而非絕對可信」踢甩嘅理據。所以一定要用能夠設定分時段錄影嘅「車cam」，而唔可以用 Sports cam 一嘢錄一、兩個鐘。

另一個要講嘅基礎法律概念，就係要有乜嘢條件，先至有可能從法律角度認為係「快線撚」。

首先，當然係你見到有一部車在一定嘅距離維持在右線行駛，並有以下三個情況最少其中一個：

1. 中線有足夠空間可以予「快線撚」切入但佢無咁做。或；
2. 未見到「快線撚」有超越在中線、左線的車輛 (平排都「中」)。甚至；
3. 你以合法車速在中線或左線行駛，或見到有其他車輛而你相信係以合法車速行駛但能超越「快線撚」。例如你响中線「快線撚」一直維持距離，有右線車焗住「左CUT」

你就可以認為係「快線撚」作出舉報。

何謂「在一定距離」？根據我過往嘅經驗，起碼 1km。如何估計 1km？以路牌80計算，換算返影片時間長度，即係最少45秒；路牌100，就是最少36秒，如此類推。簡單講，有唔少於1分鐘嘅片段影到以上情況，就可以「做嘢」。

以我在上週响 Facebook 披露一單「快線撚」為例子，提供 Template 如下：

=========================

致：香港警務處
新界南交通部
新界荃灣城門道8號
新界南總區警察總部地下
(如果唔肯定事發路段屬於邊個警區管轄，就寄去 中央郵政總局信箱 999 號，由警務處總部處理交去邊個警區)

敬啟者：

舉報車輛 ZZ 1234 於屯門公路佔用最右行車線

本人在 _____年__月__日大約 __:__，駕駛車牌 YY 9999 私家車 (跟返你自己揸緊嘅車嘅登記類別，例如輕型貨車、中型貨車、公共巴士) 於屯門公路往屯門方向行駛，由汀九橋一段開始，發現一部車牌 ZZ 1234 的白色私家車長期佔用最右行車線，現向警務處作出舉報。

本人當時駕駛的車牌 YY 9999 的車上裝有型號 ABC 666T 的行車錄影裝置。

附上唯讀光碟載有擷取自行車錄影裝置錄得當時的行車片段，檔名_______________ 。片段記錄當時本人在屯門公路駛往屯門方向，駛至近汀九橋一段路面，發現該部車牌 ZZ 1234 的白色私家車一直維持在最右行車線，直到接近大欖涌巴士轉乘站離開本人視線範圍為止，即使中線及左線尚有足夠空間可予該部車輛安全行駛，但從未有切線轉回至中線。期間因有右線車輛需切入中線超越 ZZ 1234，影響本人的行車安全。

影像片段時間標記 __:__:__ 清楚可見車牌號碼 ZZ 1234 (如以下影片畫面截圖)；


從提供予警方的錄影片段可見錄得外觀與這時間標記的車牌號碼相同的車輛的行駛情況，一直維持在右線行車。
(呢部份關於 Screen Capture 最好寫埋，使警方收到信件之後能馬上確定到條片真係錄到車牌。無都唔緊要。)

本人現向警方舉報駕駛車牌 ZZ 1234 的車輛的司機於______年__月__日晚上大約___時___分至___時___分期間，在屯門公路往屯門方向汀九橋至大欖涌一段的道路觸犯交通罪行：

《道路交通(快速公路)規例》(香港法例第374Q章) 第12條 ── 未有合理切實可行範圍內將車輛駛回快速公路車路的最左綫或駛回緊貼該最左綫右邊的行車綫。

要求警方調查及向駕駛車牌 ZZ 1234 的車輛的司機作出檢控。

本人謹此以真致誠聲明唯讀光碟內的行車影像片段並無作任何修改或剪輯。本人同意警務處可將提供的片段提交予法庭作呈堂證供。如警方需要本人到警署錄取口供，及/或出庭作供，本人願意安排時間。

附上個人資料及地址，以便警方進行調查工作：

姓名：車金能 (CHE, Kam Lun)
香港身份證號碼：____________
電話： __________
電郵：___________________
地址：____________________________________________________



車金能 謹啟
_______年___月___日


=========================

寫好封信，印出嚟，响下款適當位置簽名；將車cam 片燒成三隻CD，連埋封信寄去警務處。DIN C5 信封夠晒裝封信同三隻CD，目前郵費 HK$5.0 (視乎實際重量)。之後就等負責嘅交通部環頭打電話通知，話收到你個case 會作出處理。警方或可能會約你去邊度落口供。地點如下：
港島區 ─ 筲箕灣西灣河街28號
西九龍 ─ 紅磡衛環里8號
東九龍 ─ 九龍牛頭角兆業街2號
新界南 ─ 荃灣城門道8號
新界北 ─ 大埔安埔里4號





唔少人都怕落口供好花時間，但根據我同「巴士判官」嘅經驗，就算最複雜要畫幾張圖嗰種案情，都唔超過兩小時；「快線撚」呢啲相對簡單，好快就可以响口供紙上面簽個名就走得。

或者咁講，好多不負責任嘅駕駛者就係抱住「好多人嫌麻煩」而响馬路上胡作非為，「怕麻煩」某程度上形同姑息養奸。姑且「小農」啲講，難保啲不負責任嘅駕駛行為就係撞到你，所以就算「只顧門前三畂田」，呢啲時間都唔好慳。





返回主頁