咪用馮檢基侮辱李克勤

雖然身為李克勤FANS，但非常反感佢曾經公開表態支持 Mrs. Hilter 同反對「反國教」所表達的政治取態，亦明白政治圈子因此而極度憎佢，繼而事無大少針對佢，雞毛蒜皮嘢都要抽秤佢，就連佢攞到今屆商台叱吒樂壇男歌手金獎，都要恥笑「樂壇關愛座」。可是純粹從音樂角度出發而對事不對人，佢攞呢個獎雖不算實至名歸，但當前香港嘅所謂樂壇有邊個男歌手真係掂過佢，我真係睇唔到囉。

無錯，李克勤無話好似佢嘅「伯樂」譚詠麟，或同期出道嘅張學友宣佈唔再攞獎，係會俾人覺得「仲要同啲細嘅爭」，但舊年2月第59屆格林美獎其中一首得獎歌曲Moth into Flame，樂隊 Metallica 四位成員中最年輕的Robert Trujillo 比克勤大三歲，唔通美國樂壇又流行「關愛座」呀?! 對人不對事總不會客觀，但「名叫香港嘅井」太習慣不知外面嘅世界係點郁啲就因人廢言。

李克勤出道30年，音樂造詣除咗「零瑕疵」嘅相反「無感情」之外，當今的歌手那管是許廷鏗、陳柏宇、吳業坤等，真係「見到尾燈當佢贏」。唔駛講乜，剩係《演奏廳》同《演奏廳 II》嘅 Live recordings，家陣有邊個歌手夠實力同夠膽呀！歌曲類別唔只情情塔塔，乜嘢題材都有，甚至「講政治」計有小弟提過嘅《後會有期》講移民潮，仲有大家該仍記憶猶新嘅《天水、圍城》(雖然佢迴避係「政治嘢」)；要再數的話，起碼仲有《演奏廳 II》第四首《香港仔》其實係講香港人為賺人民幣不擇手段嘅醜態。唔計寫同唱呢類題材嘅歌要講下膽量同要有時事觸覺，俗謂「新世代」嘅一堆歌手有無 intention 寫同唱同社會有關嘅歌？抱歉的，在我的印象中又係無。



今次得獎由來的《30克》專輯，《一個都不能少》的編曲抄襲確實係污點，仲要係重犯同類錯誤 (上一次就是《希望》)，真係抵打。但第五首的《給歌迷梁小姐的公開信》雖然既無得獎亦無派過台，以有如答謝梁小姐在世時一直的默默支持，勉勵她的親人繼續開心的生活落去，唔用生命終結只有悲傷的方向，又有那位歌手同創作人可以做到？更唔好話呢首歌反映克勤對歌迷的尊重咁懶係高尚囉。

《30克》專輯另一首最多人講嘅歌係《C3PO》。C-3PO 本是 Star Wars 其中一個機械人角色，克勤將《星戰》中 C-3PO 同莉亞公主嘅關係寫成一首歌，又係嗰句「唔係人人諗得到囉」。仲要講呢，Google search 最少三篇對呢首歌嘅《樂評》，但篇篇都係話首歌係講「收兵」，其中一篇仲串克勤成50歲人學人講「兵」係咪老咗啲呢...... 我睇到真係笑咗囉。

所謂「中學生中文閱讀理解」嘅要求之一，係要從考慮埋作者嘅身份同文章嘅背景，以至寫作的時間條件，先至係正確研讀同分析。例如朱自清嘅《背影》，唔擺低今時今日鐵路(以至通訊科技) 嘅發達係唔會研讀到作者與父親別離嘅情懷。

C-3PO 只係一個機械人隨從，點取代 Han Solo 呀！無錯，真係只能寫到「兵」咁樣，但克勤的「青春期」由1980年代開始，嗰陣嘅香港社會嘅男女感情關係無依家咁功利主義，單純得嚟真係可以見到心儀對象有「白馬王子」照顧而幸福快樂就默默祝福，直到永遠阿們嗰隻。當然，以今時今日嘅觀念係覺得好撚憨鳩。但呢種「石器時代」嘅思想就係咁，而且同現今嘅想法最大分別，既唔會因為「女神」唔揀你呢隻兵而自怨自捱，更唔會憎恨將「女神」私有化嘅嗰條友 ；同時地，會否另覓對象同「女神」無直接關連 (嗱，官方MV就表達咗呢啲元素) 。可見這些《樂評》不單膚淺，更可以謂「小學雞」都不如。至於點解咁寫，係咪因為當前香港社會看待李克勤的大氣氛，小弟唔去考究。

專輯有兩首歌觸及「送禮勤」── 《恭喜你》同《30克》。雖然自嘲呢樣嘢關心妍的《關家姐》可謂最經典，但關心妍擺明車馬用首歌嚟做 Promotion Campaign 重點，响 Marketing 嚟講係好低 Level 嘅招數。相反地，克勤無咁做，就算上電台接受訪問講呢兩首歌，重點集中响編曲同聲線調校 (恭喜你)，同 A-capella 嘅「好玩」(30克)。

另外，詳細研究李克勤 30年來逾50隻非純精選嘅專輯，《30克》嘅編曲同演繹風格近乎從未出現過，除咗《五十路》同《失魂記》兩首「又係唱俾老婆聽」之外，題材亦係「新鮮」，加埋以上幾點，已經足夠證明李克勤攞獎根本就唔係「關愛座」。頂到盡一句「時也命也」，或奉承的講「遲來的男歌手獎」。

咁馮檢基呢？在香港從政逾30年，做嚟做去都係得一味有如「街坊保長」，對比克勤啲歌嘅題材同風格就變化萬千，已經「企開啲啦」。雖然克勤嘅歌藝「無感情」，但「零瑕疵」可以要嚟 Hifi 「炸機」，但馮檢基打又唔打得 (唔是「勇武」嗰隻打，而係連質詢都迫唔到啲官埋牆角)，企出嚟連台型都欠奉「睇又唔睇得」，講句嘢都唔夠說服力嗰隻，拎李克勤嚟比喻根本就是揀錯對象。

再者，如前述《30克》專輯充滿全新音樂元素，尚算能說「與時並進」作出改變，但馮檢基莫過話好似克勤 (江湖傳聞離開UMG原因除咗錢之外係音樂創作空間，導火線係《罪人》因為改編歌少咗商台嘅宣傳機會) 夠膽轉陣作新嘗試，就是唔少人好言相勸著佢要改革都當耳邊風。甚至乎克勤過去親自落手協助新人發展演藝事業 (例如黃依汶、陳婉淇。雖無功而還但都唔關克勤事)，馮檢基就偏聽深水埗幫班死老野，搞到任國楝、莫家嫻、楊振宇最終拂袖而去，仲要死攬住個根本係廢柴嘅李健勤當係寶。

將以上咁大堆嘢夾埋一齊去睇，馮檢基唔只不配同李克勤嚟比，直頭係「食塵都無份」嗰隻，亦更清楚肯定咁比法簡直係侮辱李克勤。亦同時證明，香港嘅社運同論政圈子啲眼界視野狹隘到退聯，連基本常識都無，中學生都不如；一味只顧因人廢言、私怨大過天、拎住一個論點就大放厥辭發花癲...... (下刪三萬字)。是故之，小弟無乜意慾理會香港政事，情願匿埋做自己嘢 (包括開 Hifi 聽歌炸機) 好過，亦係呢個原因。

都係嗰句，年齡唔係問題，能力先至係關鍵。馮檢基唔好話拍馬都追唔上林吉祥或柯健銘，連李克勤都不如，收山返鄉下耕田啦！

返回主頁

西九初選投廢票

叫人投廢票，即係益咗支那共匪？仲唔是「係共諜係鬼」現形！小弟唔阻止你哋咁諗，但小弟稱作「飯桶」的傳統泛民派系為咗3.11補選，猙獰面目盡現人前，黑幕黑到史無前例級數，尤其是九龍西，飯桶嘅策略佈局(包括新界東)同益咗中国共产党無乜分別。只不過新界東有張秀賢同范國威兩名悍將，尚算頂得住飯桶同左賊操盤郭永健啲仆街事，而九龍西就真係飯桶「玩撚晒佢」。

回帶到原本「流傳」區諾軒得到游蕙禎MP 背書「考慮出戰」，但吹咗幾日風就「墮馬」，接著姚松炎突然現身。撇除小弟同區諾軒交情非淺 (事實上小弟素來公私分明、公事公辦)，呢單嘢嘅內情搞到我極度火滾。

可以爆料，游蕙禎MP / 青年新政的 First choice 並非區諾軒，最原本的屬意人選正是姚松炎 。你哋唔知呢！
游MP 早在去年暑假前後接觸姚松炎，但姚松炎扭屎忽花mode 暗示「唔打算選」，繼而無應機，游MP 先至 approach 退黨不久嘅區諾軒。呢個情況帶出嘅問題在於姚松炎「唔嫁又嫁」── 冷對游蕙禎的游說，但區諾軒的「風」未吹得起就「被收皮」後突然衝出嚟，跟住成堆白鴿以外嘅飯桶、左賊企响佢側邊。姚咁做唔係擺明 ignore 游蕙禎 / 青年新政咁係乜呀！政壇中除咗土共之外最想消滅青政嘅正正就是一堆飯桶，意味姚松炎就算無同飯桶有 Deal，都係同飯桶同一陣線。

或者大家會以「姚松炎只係唔想接游蕙禎『死亡之吻』」嚟到反駁。但如果姚係咁諗，為何唔同游蕙禎講清楚而要扭屎忽花mode 暗示「唔打算選」以至後來直頭唔應機！單係呢點已經引證小弟絕非上綱上線扣帽子！

另外有三件吊詭事可以引證姚松炎「好有問題」。第一，姚松炎原屬建築、測量、都市規劃及園境界功能界別，佢大可以選返呢個位。但姚既不打算選，又沒有見到有「意向繼任人」出現，難免使人覺得佢另有盤算。再對照返九龍西補選同初選嘅時間軸，佢到底搞乜真係老夫子之慣常 ── 耐人尋味。而就是區諾軒「墮馬」同佢蒲頭在時間上的巧合，更無法排除不懷好意。

第二，12月初有風聲吹出，姚松炎將可能報名補選再被DQ。呢個風險姚松炎無可能唔知，或最起碼唔會無預計呢個可能性。點解佢仲會咁搏命於九龍西唔是重點，率先放呢個風嘅係《香港01》，即係港共傀儡政權已經有兩手準備，先至係關鍵位。按照目前形勢(尤其是香港研究協會民調結果) 分析，姚松炎勝出初選嘅機會相當高。如果佢去選舉事務處報名無幾耐選管會就 DQ，飯桶必定以「形勢緊急」、「唔夠時間再作初選」之類做藉口，安排初選結果第二嗰個頂上。以香港研究協會民調結果為基礎，即係馮檢基。

按此拆解，白鴿 / 支教民見袁海文 (有排都) 未夠班「隊冧」游蕙禎 / 青年新政，但又搵唔到其他人選，馮檢基恨選得返恨到流晒口水，姑勿論馮檢基對白鴿嚟講唔算係自己人，但總之青年新政是首要敵人，黃碧雲等人「連結次要敵人」有乜出奇。但眼見袁海文啲「拔萃仔態度」又真係唔夠抽，直推馮檢基必會引起巨大反響而極有可能低票輸俾胡杏兒姐夫，到時唔只交代唔到仲必定會俾全城圍剿追殺。但先「開行TURBO」推姚松炎，等選管會 DQ 然後急就章推馮檢基出嚟，既達成「射落海都唔益青政」嘅目標，就算馮檢基真係輸咗，都可以一句「我哋盡咗力」推得一乾二淨。呢個推斷仲睇到飯桶隨時同港共傀儡政權夾好晒，仲去初選投票而唔投廢票即係幫支教民抬轎！

第三，飯桶的民主動力籌劃初選期間，都懶係有禮貌的邀請游蕙禎一齊開會商議。據悉游MP 堅持引用2016-2-28新東補選飯桶提出的「議席原屬」原則，認為初選結果必須得到青年新政認可，搞到飯桶們頂住度氣但無從招架，於是趙家賢班仆街千方百計扭盡六壬要將青政踢出去，出返口氣之餘全力將「隊冧青政」的首要目標得以達成。

飯桶選擇姚松炎主要原因係針對游MP 講過「被 DQ 者有優先權」，封咗佢把口；另外圖以姚被歸類為「自決派」方便包裝成「同青政立場相近」，將姚松炎出選西九補選合理化，冀徹底地封殺游蕙禎 / 青年新政在補選的話語權同空間。

或者掉返轉講，姚松炎要是唔參與呢場劇目，飯桶 (尤其是黃碧雲) 同左賊根本唔可能佈出呢個棋局；又劉小麗 (同佢後面個70+阿伯) 知道小弟、世澤等人隨時「打到佢變蜜蜂竇」而決定等下一場補選先再算，飯桶、左賊可以話沒有其他人選。言下之意，姚松炎到底係被飯桶綁上賊船，還是佢自投羅網，真係天知地知佢哋自己先知。但無論強姦定焗賭，三件事唔只清楚見到姚松炎極度有可疑，第二及第三更見到飯桶私心歹毒到毫無底線。既然如此，初選仲投嚟做乜春！

跟住講埋馮檢基。佢年紀大其實唔係問題，外國唔少政客都老過佢。例如馬來西亞反對派國會領袖，民主行動黨的林吉祥今年已77歲，比馮檢基大13歲。


外號「空降王」嘅林吉祥幾乎每次大選都不在原有議席選區，2013年更到選民人數近11萬、被視為國陣鐵票黑洞的振林山 (Gelang Patah)參選，結果 54284 : 39552 贏近15000票當選。馮檢基呢？剩係識死守深水埗，仲要輸鳩埋，連輸兩劑添呀！

無錯，2015年區選有黃仲棋鎅票，但如果實力足夠維持到小弟提出的「過半支持度」理論，黃仲棋嗰215票縱有點威脅，但致敗嗰99票 (陳穎欣2531：馮檢基2432)根本只係一粒鼻屎。已見馮檢基之廢。

再講林吉祥從政生涯之所以幾乎每次都空降，除咗係為民主行動黨拓展版圖之外，當選後重點專注鞏固選區勢力基礎同培訓新人，但馮檢基不單只會留戀深水埗，任國楝、莫家嫻、楊振宇、蕭亮聲在九龍城區只係「食自己」。就是民協沒有投放充足資源，佢哋四個被迫變得強悍。可是到頭來馮檢基沒有反省，民協不單沒有改變策略，更是譚國僑為首嘅「深水埗幫」堆死老嘢嫌佢哋四個「太過勇猛」有異於民協『踏實』(實質係老油條) 作風，就開始進行排擠內鬥。

結果呢，唔好計阿聲嘅性格有少少囂欲以响「天龍國」嘅嘉多利山站穩陣腳同班元老有拗撬而離開，與小弟交情算得上深厚的任國楝曾私下向我信誓旦旦、矢言「民協湊大我，我點都唔會離開」，都拂袖而去。已經百份百肯定馮檢基以至整個民協毫不在意俗謂後輩嘅成員在政壇的發展。更是楊振宇一條友响工賊竇堅砌到師傅廖成利可以安心做證婚生意，本是最有潛質出選超級區議會，但深水埗幫為免「悍將」映照出佢哋只圖食老本之廢，咁啱線何啟明擦鞋擦到佢哋好高興，就情願捧件擦鞋仔而踢走 Ronald，結果咪包尾大幡慘敗。唔是話 Ronald 贏硬，但我好相信要是深水埗幫尚且正常拉票，攞第五席唔係無可能，或至少唔會衰過陳琬琛。更清楚見到譚國僑班死老嘢的無恥之餘，亦證明馮檢基在黨內事務一樣無能。

飯桶唔曉馬來西亞，咁就講台灣嘅例子。現年66歲的民進黨立委柯建銘，佢在台灣政壇一直以來嘅主要任務就是做說客。近三十年來的成績雖難憑肉眼看見，但不分藍綠「點都俾番佢幾分薄面」是台灣政界人所共知的事。柯建銘真係做到年輕 2歲的馮檢基的名句「又傾又砌」的實效出嚟，馮檢基？得個講字囉！馮檢基連柯建銘都不如，廢到拎去堆填都嫌阻訂！俾佢選到即係繼續助長「議席關愛座」風氣，使民協不過是一間「政壇老人院」得以續命。

再者，半年前的《馮檢基告老歸田啦》一文已經講過，小弟經年苦苦相勸馮檢基要改革，但馮不單沒聽進耳；呢半年來仲好學唔學走去學白鴿「當我透明」嗰隻。既然不改陋習、不顧政治倫理硬係要搶奪原屬青年新政嘅議席，小弟就只好拋掉「馮檢基是我的政治啟蒙之師」的道義，核彈式剿滅民協。順便向呢半年來有同我交流過的現任主席施德來勸諫：民協無得救架喇，無謂再為間老人院浪費精神時間，早走早著啦。

至於袁海文，佢上面係黃碧雲呢條臭X八婆已經唔駛講嘢。就算撇甩條八婆，改晒你啲「拔萃仔自以為好巴閉不可一世」嘅做人態度先再講嘢。

姑且擱下「議席原屬青政」嘅原則，姚松炎「呢個人相當有可疑」，馮檢基廢到退聯，袁海文的無料扮四條仲要臭串，點選得落手呀仆街！星期日無謂去投票九西初選，要投都投廢票，務求是但一個贏都是低票勝出，壓低晒認受性。
(新東就掉轉，衝去倒票俾張秀賢或范國威。郭永健？要「包容同胞」就俾佢啦。)

唔要佢哋三個有何人選？就是「議席原屬青政」嘅原則，應該留返俾游蕙禎講嘢。如按過去事態發展，區諾軒就是了；按未來形勢走向，仲要為英國內政部相當可能唔會早過 11MAR2018 批出周庭退籍BC申請 (甚至否決申請) 作出部署，區諾軒可能又要出動 (唔參選都要做動員)，九龍西就剩下一個的鄺葆賢醫生。雖然我知道佢極不想參選，但真係搵唔到其他人，跪地向阿葆求原諒同謹慎考慮。

後記：
1. 飯桶見住游蕙禎响2015年响被喻為泛民墓穴嘅黃埔幾乎「搞掂」鼠王芬，又見立法會選舉响紅磡7個票站得票比黃毓民多成千票，唔隊冧佢即係證明支教民廢柴喎；
2. 再計埋開辦6C專線小巴事件阿葆受盡屈辱，唔整死佢哋以後就算有議席嚟開飯都要做餐死先有飯食，仲成世界嘅。梗係隊冧佢哋最重要啦！

返回主頁

馮檢基告老歸田啦

基於政治道德倫理，因為尖碼時期民協提供最大嘅協助 ~ 借地方擺放物資、借架罉、幫手响議會打，小弟唔應該對馮檢基指手劃腳，但民協因為馮檢基嘅敗選到密謀參與補選搞到黨員大逃亡，連最資深黨員之一、前任主席莫嘉嫻都退黨，就真係無法再忍口，兼要破口大罵。

近五至六年，香港政局出現兩個重要的變化，一是本土思潮出現，二是「激進化」。前者無需多解釋係乜，後者其實有兩個角度，一是政客、群眾在抗爭言行表現激化，這很容易理解；二是政客在處理日常事務不再文質斌斌和理非非，要斬釘截鐵「刀刀見骨」，清楚易明的予公眾知道政績。


馮檢基個人以至民協黨團本來無甚「大中國膠」、建設民主中國等意識形態包袱，理應唔受本土思潮所影響，已經少咗支教民體系要面對嘅政治形勢變化帶來嘅衝擊，但在「激進化」方面，就毫無寸進，死守住「社工變議員」嗰一套嘅從政模式，尤其是「老巢」深水埗區的區議員尤甚，九龍城區的朝住「激進化」之途去走。

或者會認為，就是「激進化」，所以任國楝、莫嘉嫻都在2015年區議會選舉敗陣。但是佢兩位嘅落敗係有種票疑雲因素，事實上佢兩位响選區內的工作係贏盡口碑。再睇埋蕭亮聲响嘉道理山選區呢個被喻為傳統泛民「必敗陣地」嘅選區連贏兩屆，連埋楊振宇雖然係「承繼」廖成利的政治資產，但兩人响2015年的得票比2011有大幅進賬，引證「激進化」確實係一條出路。民協亦因此出現所謂「深水埗幫」同「九龍城幫」嘅內鬥，只是鬥在內部而沒浮面所以無乜人知道而已。

而「受恩」自尖碼，小弟一直唔想睇住民協死，亦因為睇到本港政治大氣候，多年來不斷向馮檢基進言要改變路線同作風，唔能夠再「老油條」慢條斯理；亦有同阿基講明白民協支持者嘅本質多係斯文淡定，「唔需要去到我呢種咁狼死嘅地步」，亦無需仿傚長毛嗰一類嘅作風，但一定要採取較進取嘅方式去表現政治實力、較 Eye-catching 的方法去宣揚政績，先至可以擴大選民基礎。

2015年區選，撇除黃仲祺呢條二五仔鎅票，馮檢基仍舊的「老油條」，小弟認為就是落敗原因。曾經在報章撰文開名直接指出呢一點 (2015-11-27《明報》區選結果反映香港政治生態變化)。之後亦有私下同阿基講「真係要變架喇，唔係會亡黨」。再到了去年立法會選舉蘊釀期間，透過不同嘅渠道同阿基提出「俾後生上啦」。姑且坦白自揭底牌，我屬意的是楊振宇出選「超區」，莫嘉嫻在九龍西名單排頭，名單中要有任國楝，為佢「東山再起」做準備。但為免干涉人哋「家事」，一直無同馮檢基講，只同嘉嫻及 Ronald (楊振宇) 講叫佢哋盡力爭取黨內的支持出選。結果呢......

雖然名單唔係我心中所希望，但又是政治道德倫理，還是繼續向阿基同「僑老闆」(譚國僑) 進言，提醒佢哋唔能夠沿用習慣咗幾十年嚟嘅「打法」。

坦白講，佢哋選舉勝負唔關我事，只不過隨住馮檢基及譚國僑雙雙落敗，民協內部矛盾逐步浮上水面。蕭亮聲打算退黨日有聽聞，終於成真。本來施德來當選主席該可以進行大刀闊斧改革，但馮檢基仍參與九龍西補選的黨內甄選，就意味著民協根本無打算迎戰政局變化而自我提升，更是「九龍城幫」具十足「戰鬥力」人物相繼離開，更證明「深水埗幫」仍只想繼續其老油條做事作風，甚至尸位素餐落去。既然如此，就只好講出我嘅想法，包括對馮檢基嘅不滿，對民協嘅不思長進要直斥其非。起碼叫做「盡最後努力」希望佢哋痛定思痛，又甚至好衰嘅講，民協他日亡黨之時唔好話無人勸過佢哋。

要救亡第一件事必須要做嘅，就係馮檢基唔只要宣佈唔會參加補選，更是唔好再選。「深水埗幫」班老油條除非激得起，否則唔好掂立法會選舉。甚至應該攀上政治道德高地，站在游蕙禎MP 的一邊「頂行個雞頭」。不過以馮檢基近月來的舉動，呢一切最後的進諫只會淪為廢話。

註：照片為攝於2010年12月5日尖碼大型一人一信行動

返回主頁