每逢有涉及巴士嘅嚴重車禍，啲報館電視台總係要搵啲「有朵有牌頭」但何謂巴士、巴士結構都唔曉嘅所謂專家出嚟說三道四，唔係話「車身猶如紙扎」就係話呢忽唔安全、嗰樣好危險；加埋啲濕鳩政客一味「快就是危險」「安全帶是萬能的」，係咁响坊間散播「巴士恐懼症」。恕我先「政治化」咁講，根本就係曲線宣揚「鐵路萬能俠」。巴士呢種車係咪真係咁危險？正如一把刀，可以殺人亦可以煮飯，睇你點用囉！
噚日西九龍快速公路單意外，啲專家又話車頭得份玻璃纖維，對司機毫無保障。睇表面確實係幾件玻璃纖維，但想問李耀培之類，知唔知裡面仲有金屬嘅呢？
睇圖所見，確實真係好簡單。但要知道 E500、Wright Gemini 呢類雙層巴士嘅設計，只係預你响市區入面或鄉郊「碌車」，無預你會安排部車响高速公路上飛馳。
响歐洲，歐盟法規訂明高速公路行駛嘅車輛，車廂中不能有乘客站立；「高速公路」泛指可以 60km/h 或以上行駛嘅道路。單係呢個論點，已經肯定香港用 E500、Wright Gemini 呢類雙層巴士行公路，根本係用錯車。大吉利是講句，點可能炒起上嚟唔大大鑊吖！
歐洲既然規定要上高速公路嘅車唔能夠有企位，所以採用嘅巴士响結構同機械方面就好唔同。呢類响香港通稱「旅遊巴士」嘅車款，關於車頭防撞嘅設計，確實比 E500、Wright Gemini 呢類雙層巴士，以至 E200，Volvo B7RLE 之類嘅單層巴士，稍為強一啲。
因為不論巴士定旅遊巴，其實响車底都仲有條「大陣」。正式名稱 Longitude Frame 係以厚度最少 7mm 嘅精鋼屈摺成［ 形，只不過巴士條大陣底部嘅離地高度大約320 - 350mm，仲要只係得司機位下面一條。旅遊巴就離地高度大約550 - 600mm，左右兩條齊晒 ── 一條响司機位下面，一條响上車門樓梯底。
就咁睇確係覺得巴士好危險，不過要做到低地台就一定係咁嘅結構。除非停止推動無障礙運輸，否則就係無辦法！
不過，歐盟又基於「不能對其他車輛或行人造成嚴重傷害」嘅理論及衍生嘅法規要求，唔可以強到盧覺強諗住嘅裝甲車嘅程度，必須考慮「卸力」嘅問題，所以旅遊巴其實都唔會真係好強。事實上，旅遊巴既為咗卸力，同埋要在車廂之下有行李倉，「大陣」去到前輪之後就會變返弱；而且，巴士車頭一定有度車門，結構上完全無得「頂」，所以車頭碰撞司機無可能唔遭殃。
歐盟一直有思量過加強駕駛室嘅保護，其中一項構思係响前幅骨架相對駕駛室地台嘅高度加裝盧覺強最鍾意嘅裝甲鋼板。高位置及概念如下圖 (記住响車身入面)
但研究結果發現無太大實際效用，甚至相反地增加私家車/客貨VAN 車尾嘅損毀程度，或導致司機「夾腳」；而且遮擋咗例如水撥摩打、車頭燈、防霞風機等設備阻礙維修，結果就放棄。
咁即係巴士司機只能準備「受死」？結構上好似無辦法唔代表唔可以有其他方面嘅辦法。其實歐盟關於車速限制嘅法規，算係一項理論上能提升巴士司機安全嘅措施。歐洲有對總重3.5噸以上車輛限速規例，巴士/小巴為100km/h，貨車係90km/h。巴士快過貨車仲話安全？傻架！揸開車嘅都知，巴士或貨車車尾會擋晒視線......
俾巴士開快少少，就係俾巴士爬過貨車，避免司機視線受阻。明未?!
到近年嘅科技發展，出現咗「自動剎車」呢樣裝置，就進一步減低巴士司機响意外受傷以至死亡嘅風險，不過要明白機器嘅嘢就算唔壞，都有技術極限，始終都唔係萬無一失。況且，香港運輸署對呢項設備又係諸多留難，詳細就日後有機會先至講啦。
意外無人想發生，但有啲嘢無搞清楚就亂咁噏，輕則誤導蒼生，重則製造恐慌；而意外唔發生都發生咗，當然要設法避免再發生，但亂噏一通就可以咩？計幾條中學物理算式得出撞擊力 109,700N 又點呢，可以防止悲劇重演咩？啲記者要同編輯搶版面都唔好咁搞啦！你要搵食，明白，雖則無犯法，但寫嚟又有乜為呢！
返回主頁
