皇冠車行懷疑就Coaster 小巴第20個位向政府提供虛假資料

先同大家回帶。舊年6月21日立法會交通事務委員會審議放寬小巴座位上限。小弟聯同柴文瀚及柏斯敦巴士台台長羅振奇發動聯署，共33人參與，指運輸及房屋局提交嘅文件(編號CB(4)1124/15-16(01))提到「若座位增加超過 3 個，車長將會超過法定上限7m」，失實或虛假陳述，違反《立法會(權力及特權)條例》(香港法例第 382 章) 第 18(2)條，要求主席將文件宣告作廢。

雖然都預咗當任委員會主席田北辰唔會運用 P&P 權力廢咗份文件 (更唔好話揸正嚟做可以報警拉人)，但當日會議各黨各派議員都出行力就19定20甚至更多，質到張炳良同運輸署署長楊何蓓茵唔識招架。

更是署長楊何蓓茵解釋因為某個車款(所指的是豐田Coaster)第20個位响車頭，雖然澳洲批准安裝，但因為「要爬過引擎蓋，好危險」所以唔符合《道路交通(車輛構造及保養)規例》(香港法例第374A章)而不能安裝，亦所以訂响19呢個數字。

結果招致小弟再次聯同阿柴同「巴士判官」出手，指政府使用的豐田 Coaster 都有嗰個位，除咗質疑署長嘅言論失實之外，仲串佢快啲通知 EMSD 拆咗佢 (詳見當日的新聞稿)。

稍為會用下腦的，見我哋拎政府的豐田 Coaster 出嚟，就算唔知道「出事」，都應該聞到陣燶味，諗辦法轉軚，將19變起碼20啦。但舊年12月16日，立法會交通事務委員會會議，運房局提交文件仍然是19，再次俾各黨各派議員打到一仆一碌。劉國勳同林卓廷分別動議要加到20，都獲得通過。

之後呢兩個多月表面上無乜動靜，但運輸署 / 運房局响不同嘅場合仍然繼續「19」，即係粗俗啲講「仲未知死」。

本來，政府車嘅規格可以亂嚟，就算如我哋串署長嘅車，都可以話「因應部門運作需要」卸晒。可是..... (睇嚟真係天意)

响2017年1月16日早上大約08:00，有一部白色車身、車牌 NA 6183嘅豐田Coaster 長陣「小巴」，駛經油麻地北海街近彌敦酒店，俾人影到擺咗上網。


最「過癮」嘅係，呢部 NA 6183 竟然有運輸署署長响2016年6月21日立法會上話「好危險」嘅嗰個位 (留意上圖箭咀所指)。即係呢部車懷疑非法改裝啦！

本來打算掟去西九龍交通部報串，但諗起唔知會唔會係邊個老友間旅遊巴公司，先去運輸署填份 TD318 表格俾$45「查底」(嗱，懷疑非法改裝，我剔「法律程序」，無錯架!!)。點知運輸署職員表示沒有該車牌的登記資料！

詢問職員點解會無記錄，職員表示有兩個可能性 ── 有人使用假車牌；或該車輛為政府車輛，但暫以一般登記號碼行駛 (即俗稱「套街牌」)。如果係假牌就當然可以報警；但要確定係「套街牌」嘅政府車，要問政府物流服務署。

先透過傳統車輛登記號碼預留拍賣網上服務，查詢 NA 6183 能否被勾出拍賣，結果係


咁就極有可能係「套街牌」嘅政府車。於是就根據《公開資料守則》向政府物流服務署出信查詢。物流署回覆確認真係政府車，屬警務處的。轉介過去警務處之後，收到嘅回覆係咁

信中無提到係豐田Coaster，唔緊要。對比以下遮咗可識別到車主資料嘅行車證：


登記類別 PUBLIC LIGHT BUS，廠名 Toyota。除咗Coaster 都無第二款車！底盤號碼：JTGFP538___________ ，同警方嘅回信JTGFC538___________，只相差 P 同 C。

豐田採用 ISO 格式底盤號碼，全部有得解。J = Japan，TG = Toyota；FP538 或FC538 都係豐田 Coaster B50系嘅代號，後面 masked 嗰堆係生產年份、生產序號之類嘅資料。唔駛再拗，100000000% 肯定 NA 6183 係豐田 Coaster B50。

留意信中黃色 Highlight 嘅部份 ── 機電工程署驗收確認車輛結構及配備均乎合法例要求。楊太話唔合例喎，點解 EMSD 話合例？喂阿哥，《基本法》第8條訂明「香港沿用普通法制度」，點解兩個政府部門，兩個說法????????

仲有好戲在後頭！有政府深喉俾咗一份買車標書俾我，當中有一頁

(打格以免能查出誰人做二五仔向我放料)

又係留意黃色 Highlight 嘅部份。意即「投標者必須報稱確認將供應的車輛符合《道路交通(車輛構造及保養)規例》(香港法例第374A章)」。

Fully Comply 即係全架車任何一忽都要合例。但皇冠車行入標賣豐田Coaster俾政府時，報稱楊太話「要爬過引擎蓋，好危險」嘅嗰個位，聲稱確認係合例，即係皇冠車行向機電工程署入標時 提供虛假資料同作出虛假聲明？刑事喎老友！

當然，亦有一個相反嘅可能，就係本身嗰個位合例，但運輸署過去死都唔批。在運房局撰寫文件同署長準備發言稿時，俾人放流料話第20個位唔合例。

咁邊個向署長同運房局放流料呢？存在可能性包括：

1. 運房局撰寫文件會問運輸署攞意見同資料，運輸署會問各代理商攞料，當然包括皇冠車行。皇冠車行可以話「嗰個位」裝唔到故只得19座；
2. 運輸署班友整理資料提交俾運房局嘅過程當中，就咁基於 Type Approval 檔案確實未批過 (28位個「倒頭位」因為就坐方向而唔算)，無同 EMSD 溝通研究到底得唔得，就直接寫19；
3. 但就算運輸署班友同皇冠車行了解到賣俾政府嘅 Coaster 小巴有署長話好危險嘅嗰個位，仍舊基於 Type Approval 檔案同唔想搞到 EMSD，所以寫 19？
4. 甚至乎係一如小弟一直推斷，就算知政府嘅豐田 Coaster 有署長話好危險嗰個位都好，為求要廢咗三菱 ROSA 可以多一個位而有嘅市場優勢，一於搏大霧求過骨寫19？

一係 TD 跣楊太同張炳良，一係 TD 夾埋皇冠作故仔，再唔係就皇冠擺明叫 TD 做手腳，是但中一樣，當然仲有其他可能性。

而不論邊個鋪蕉皮，四個疑點都會構成 P&P 串謀提交虛假文件嘅罪行之先，頭三個疑點即場斷正行政失當，申訴專員公署可以開快勞。疑點 4 更加涉嫌干犯串謀行騙、偽造文件嘅罪行 (最高刑罰監禁14年)。假設運輸署無事，咁即係皇冠車行涉嫌向機電工程署提供虛假資料同作出虛假聲明可以話斷到正晒！

成件事反映皇冠車行呢十幾年嚟玩緊「好女兩頭瞞」，但今次為咗意圖或企圖保持市場壟斷，卒之東窗事發。真係古語有云「上得山多終遇虎」，有咁耐風流嚟緊應該有咁耐折墮。





要擺平件事得三個做法。一係EMSD 立即召喚所有政府嘅豐田 Coaster，尤其是警方 PTU 嗰批7.7m 嘅 XZB59 車頭裝兩個位，返加路連山又好邊度都好，通通拆櫈。一係運輸署車輛安全及標準部同皇冠車行立即跪低，批咗署長話好危險，但澳洲批咗嘅第20個位。反正新款 XZB70 嘅引擎蓋比 XZB50 低，兼冷氣罩更前，即係既然賣俾政府嘅 XZB50 都裝到，XZB70 更加無難度。兩樣都唔搞就第三個做法，留名等睇警方拉人封艇。

但不論有無擺平、警方有無採取行動，我好相信渣華道321號應該開始準備緊啲咖啡招呼你哋。爭在幾時，同會唔會好彩地係 Akina (前新聞主播方健儀) 沖俾佢哋。

後記：
1. 八個幾月前撻政府批 Coaster 串楊太，中間仲爆過幾單大嘢 (睇延伸閱讀個list)，咁都唔醒水，迫我出動到終極核彈，真係攞嚟賤。
2. 廈門金旅係有俾錢同日本豐田買圖紙生產A貨，佢哋改到XML6701小巴車門移前約700mm 裝多一張櫈，「正廠」做唔到意味日本仔廢柴。不過又公平啲講，B70系嘅車身要改車門位置係有啲難度，但Nissan Civilian 都停產，剩低豐田 Coaster 同三菱 Rosa 兩款車，又明知三菱 Rosa 嘅車身設計其中一個優點就係車門位置，都唔趁改款順手處理埋，豐田汽車株式會社班人仲廢過福島。
3. 唔該運房局同運輸署唔好再講乜嘢「保持運輸業界生態平衡」，我已經响2016年7月7日《明報》寫咗篇文，踢爆晒你哋玩嘅數字遊戲喇。收手啦，我唔想張局長同楊太到時有份去埋渣華道321號飲咖啡呀！

延伸閱讀
運輸署唔係明益豐田就係明跣三菱
封殺柴油私家車為益油公司，亦係為皇冠車行
港共為保住皇冠車行乜都夠膽死
豐田驗車唔係盡享特權真係搵鬼信
驗車從來都係官威與牙力嘅較量
19座位為平衡其他運輸業利益只係藉口
回應明報、蘋果日報報導運房局否認失實
皇冠車行食得禾米多





返回主頁

運輸署唔係明益豐田就係明跣三菱

黃世澤今早揭露運輸署九龍灣驗車中心懷疑向新款豐田Coaster (B70) 小巴嘅LED路線牌放水，唔少網友追問我仲會唔會有乜料爆。本來星期六想攤抖下，都搞到我心癢癢出去搵返啲以前嘅行家索料，結果當然有發現。

爆料之前，先講講皇冠車行打算將 B70 嘅路線牌或捷輝小巴部三菱 ROSA 嘅樣板 (但俾運輸署「肥」) ，係乜嘢一回事。

依家嘅小巴嘅前路線牌都係放响車頭車頂，但其實响台灣或新加坡做Premium Bus 或 Peak Period Short Bus (即類似香港的「邨巴」) 的豐田 Coaster 或三菱 Rosa (或平治 Sprinter)，路線牌都係裝設响車頭擋風玻璃 upper corner (如下圖)。



日本的既有在車頂，但亦有在擋風玻璃左上角。

證明呢種設計唔係香港自己諗出嚟，而係正如港共啲狗官最愛嘅「有外國先例」。

呢種設計可會有危險？倒想問，一個人會凌空六呎出現於小巴左前方嗎？一個响擋風玻璃頂嘅大箱會導致司機睇唔到一個身高三呎嘅細路响車頭行過？

早幾個月去台北，在台灣做運輸業設備的朋友安排下，去過大都會客運松仁路車場「八卦」，做咗如下圖嘅試驗。



身高只得1.65m 嘅成個X樣清楚可見，證明「視線受阻」只係一個有如左賊口頭禪之一嘅「偽命題」。

講返件事。早在2015年年底，三菱代理去九龍灣為架 Rosa 做 Type Approval 時已經做過，仲要俾我刮到有圖有真相！

(Source protected)

環宇汽車早就想路線牌不再放上車頂，原因係運輸署對小巴使用LED路線牌嘅規格要求，無得用日本原廠 Option 嘅路線牌箱，要搵本地玻璃纖維師傅開模造，即係要$$啦。另外就係小巴業界 (唔只捷輝) 長期埋怨，因為路線牌搞到近車頭嘅車頂好容易漏水，希望可以根治呢個問題。環宇或者係好心，當然亦會係為咗爭取生意，就想响呢次嘅 Type Approval 申請搞掂佢。

驗車當日，驗車官當然堅持「跟例的話個牌要去車頂」。但消息指原來早已向署長級人馬通報 (照架構資料若不是署長楊何蓓茵，就會係副署長/公共運輸事務及管理李萃珍或助理署長/管理及輔助客運李艷芳)，該署長級人馬當然唔會Say Yes or No，只係叫三菱代理「執齊料俾我啲同事睇下點批啦」。响呢個情況之下，環宇汽車好正常就用新嘅路線牌規格去做 Type Approval，包括提交文件申請時嘅圖則。但驗車官「細細聲」同環宇講「不如你張則改返個路線牌上頂先啦，唔係我哋好難做」。結果到最後環宇同驗車官拗餐飽，還是驗車官以「擺官威」力壓勝出。

之後，某方面繼續同運輸署拗嚟拗去，卒之運輸署唔知係嫌煩定點，同意捷輝改一兩部車做試驗同評估，但後來唔知乜原因搞出黃世澤兩個月前爆嘅嗰單「驗車肥佬」事件。

如果索料嘅內容真確，某些網民以為成件事係環宇汽車或捷輝小巴自作聰明，

就真係唔知笑佢先係自作聰明定話佢憨鳩怕佢嬲！





至於皇冠車行今次咁做，架車嘅因素我唔再講。但運輸署如果一批，唔單只再一次斷正偏幫皇冠車行助長豐田霸權，仲係陷環宇汽車同捷輝小巴於不義。

到底係唔係，不如留返俾啲署長級人馬，或以下人士回答：
總驗車主任 李偉文 先生。電話 2829 5464，電郵 cmve@td.gov.hk
九龍灣驗車中心 高級驗車主任/九龍灣 袁錦麟 先生。電話 2759 7522，電郵 smkb@td.gov.hk

運輸署班人一國幾制，仲要豐田就手鬆乜都得唔係豐田就BAN，玩夠架喇。依家幾十對眼昅住你哋，收手啦，你哋拎埋返長糧出嚟都唔會夠玩！記住古語有云，上得山多終遇虎!!!

延伸閱讀
港共為保住皇冠車行乜都夠膽死
豐田驗車唔係盡享特權真係搵鬼信
驗車從來都係官威與牙力嘅較量
運輸署驗車黑幕黑到嚇死你
19座位為平衡其他運輸業利益只係藉口
皇冠車行食得禾米多





返回主頁

長毛俱往矣，社民連亡黨不遠

在一眾社民連成員同長毛 FANS 不斷向民主300+ 吶喊「你唔提名長毛就係共諜你係鬼」屌票之下，長毛梁國雄終於响今日宣佈因「『公民提名』未達38,000目標」放棄參與特首選舉。實數只得20,234。


之前我已經寫過，長毛動機係好，但只顧理念不顧現實同思量實踐嘅可能，可以話埋下今次目標只達成剛過半 (53.2%) 嘅伏線。原因唔單只係「政治就是很現實」，仲有係香港人嘅本質係好現實，明知你長毛就算入到閘都無機會當選；又就算响選舉期間啲論壇上質爆曾俊華同林門鄭氏又如何，佢哋咪一樣應完你機之後乜都當無件事。再就算拎住選舉論壇嘅立此存照向薯片或妖鵝追數又點唧？共匪係撒賴走數你長毛吹得佢哋漲咩?! 既然係咁，仲做乜要俾你嘥時間唧。

反觀曾俊華，眾籌直至今日傍晚，籌得近500萬，24,874人捐咗錢，平均每人捐$197.3。


唔講 $$ 呢個社記同佢哋啲 FANS 視為「罪」嘅東西，單係人數已經多過長毛4,640人，差距22.9%，真係唔知村長嗰堆白痴係咪仲要屌晒全香港人「係共諜係鬼」。仲要對比「簽名」只係畫隻龜，「攞錢」使人產生更多 Hesitations，所衍生嘅心理狀態落差因素，長毛同John Tsang 差距起碼擴大一倍。

長毛今鋪呢一敗，唔單只證明社記班人同啲 FANS 從來只曉得响道德高地 Jerking 結果只會得啖笑，更是以我對呢班人嘅了解，佢哋係唔會反思，繼續認為理念大晒，港燦唔聽係佢哋問題。試問咁樣發展落去，點會唔係步向亡黨之路！

不厭其煩再講一次，理念係必須，更要考慮現實同實踐，所謂「知行合一」，不單係從政者要緊記遵行嘅原則，亦係做人要有嘅原則。恕直接講，社民連繼續黃浩銘嗰套「鏡頭前烈士」嘅作風同理念大過天嘅思維，只好買定香檳等社民連宣告解散亡黨。

返回主頁

巴士佬唔只示範何謂團結就是力量

(柏斯敦巴士台照片)

已有證據顯示該是支那共匪香港支部隱形黨員伍婉婷，支持的士响巴士站「扎艇」有理巴士佬被迫外線上落客抄牌抵死，搞到三間專利巴士公司司機聯手反抗，發動按章工作，導致港島北岸、西隧及紅隧大擠塞。相信件老姑婆無諗過會搞成咁，又或者佢同港共公安、港燦一樣思維，睇唔起巴士佬可以恰得就恰。

的確，今次巴士司機非常齊心，有少少出乎我意料之外。效果唔單只要公安部港島交通部及各環頭交通組空群而出掃蕩的士，變相找返過去幾日抄巴士牌條數，港島交通部頂頭顧又奇高級警司自作自受；仲有係好出奇地搭巴士嘅港燦們竟然表現平靜，更有個別的直接向司機表示諒解甚至支持。

留意返巴士佬成個透過工業行動嘅抗議手法，其實充滿極度濃郁法蘭西膠味。

法國嘅抗議手法層出不窮，農民响政府門外倒豬屎夠晒玩嘢，涉及民生的更會玩到一石二鳥，例如地鐵罷工，唔係只得靜坐抗議，司機、站長工照開但地鐵站閘機解鎖自由出入；巴士司機罷工亦會照開車，但冚錢箱遮Calypso/Navigo pass 讀卡機，任上；公路收費站亦係類似玩法，工照返但唔收錢。直接導致公司損失之餘唔會招致民怨甚至贏埋民意同輿論。

今次巴士司機採取接近法式抗議嘅方法，近乎連民意都贏埋。除咗意味伍婉婷今鋪輸凸、連累埋支共香港支部之外，還引證到遊行、靜坐、請願遞信嗌口號俾記者影相拍片呢啲行禮如儀嘅示威抗議廢到無倫，或至少證明示威抗議唔係得嗰啲例湯例牌菜。可是飯桶、左賊們既是腦閉塞，又是只求個人曝光率知名度而只有「鏡頭前烈士」嘅模式，結果佢哋就上晒報出晒電視，但個議題就無解決到，或者好聽啲講俾政府一直拖。或者唔係咁，點可以「階段性勝利，俾啲掌聲自己」然後推動「可持續抗爭」！

今日巴士司機嘅行動會搞出乜嘢，暫時仍然難講。但好肯定，已經搞到港共，尤其是公安部，同埋土共頭都痕埋。仲要一嘢K.O. 埋飯桶左賊，小弟真係心都涼埋！

返回主頁

的士違泊搵巴士開刀簡直痴線

的士佬目無法紀嘅問題，除咗冚旗揀客、劏客呢啲比較嚴重之外，禁區上落客甚至「扎艇」呢啲相對輕微啲，都係屢見不爽。雖然的士依家都有俗稱「免死金牌」的禁區許可證，但此證只豁免「朝8-10，晚5-7」同「朝7晚7」禁區，「7-12」同雙黃線係唔包。而且只限上落客，即上即落即走，凡「扎艇」者抄得。但唔少的士司機都抱住「四個大字，關人叉事」嘅態度，話之「7-12」定雙黃，一於黃子華嗰句「搵食啫，犯法咩」。

平心而論咁講，上落客問題都不大，但「扎艇」不單係導致交通擠塞嘅成因之一，近月仲因為响銅鑼灣 SOGO 對出軒尼詩道東行「扎艇」問題越趨惡化，巴士埋唔到站焗住第二線上落客，接二連三有新巴、城巴以至九巴司機被抄牌，引起司機們怨氣充天。要求公司同運輸署及警方反映交涉，可是所知無乜正面進展。另一邊廂，灣仔區議會2017-2-14會議，楊雪盈議員質詢呢件事到底點搞。公安部同運輸署當然耍咗就算，但最精彩嘅莫過於報稱獨立、實質同土共馬匪逢國嘅新世紀論壇有關係嘅伍婉婷响會上表示，地鐵站出口梗要方便市民搭的士，而且有好多人要去St. Paul、養和之類睇醫生，唔可以完全取締「扎艇」嘅問題。

芳齡41嘅伍姑婆唔單只親自示範何謂「搵食啫，犯法咩」，仲要為土共日前小弟會稱為「撐公安，要放人」遊行主題建立論述 ── 犯法又點，夠大聲就得啦。

就法律方面，巴士站係根據《公共巴士服務規例》(香港法例第230A章)第3條，

(cap 圖費時你啲土共話老作)

由運輸署署長跟據《公共巴士服務條例》(香港法例第230章) 批出專營權及行駛路線後，劃出「某個道路範圍為巴士站」。

而根據《道路交通(交通管制)規例》(香港法例第374G章)第45條訂明，除非該車輛是專利巴士，否則任何車輛不得在巴士站範圍停車。

(cap 圖費時你啲土共話老作)

還有的，巴士站前後路段係「7-12」禁區，即係如前述的的士「免死金牌」係唔包的。的士佬唔好話「扎艇」一定係犯法，就連上落客都可以抄$450。

可是，莫講話「扎艇」擺到入咗巴士站範圍唔抄，就連前後黃線範圍都「扎艇」趕車都唔做；但搞到巴士埋唔到站、第二線上落客而司機被票控，想請問伍姑婆呢個又係乜嘢道理呢？你哋班土共唔係最鍾意講法治咩？的士大晒呀？巴士佬抵死呀？

伍姑婆同支那共匪香港支部表面上無乜聯系，但埋得共匪堆好自然要「射住」最大堂口。支那共匪香港支部最大金主之一譚匪惠珠，近年除咗幫共匪主子鳩噏之外，對的士牌「投資」好有心得，做大拆家「疊馬仔」幫唔少人搵好多錢。

伍姑婆係咪咁嘅原因，天知地知佢自己先知。但連的士犯法都要放生，巴士佬被迫犯法就爭在未將「抵死」兩個字講到出口，依家就係事實擺在眼前。

根據柏斯敦巴士台披露，新巴同城巴司機已經透過工會發起有如按章工作嘅行動。後果唔單只會因為的士「扎艇」埋唔到站而响外線拉手制等導致塞車之外，進一步激化司機業同公安嘅敵對關係。後果會係點，小弟暫時認為「五斗米折腰」思想充斥各職業司機腦袋因而應該唔會搞出大鑊嘢。但從巴士司機自製嘅通告



各位要出沒港島嘅港燦，還是俾心機助長鐵路霸權、幫港共傀儡政權建造「鐵路萬能俠」，又或者為咗譚匪惠珠啲身家，幫襯的士佬啦!!!

返回主頁

總係要為咗女人對奶拗餐飽

**注意：本文為成人內容 18+ **



澳門母乳協會單膠嘢 (係，我覺得真係好膠)，俾輔仁媒體炒到拆晒天，仲要搞到 (懷疑) 兒童色情照片，心諗嗰句：駛唔駛去咁盡呀?!

無錯，五歲仔仲要啜阿媽 LIN 頭係有啲誇張，但個阿媽肯餵，又唔介意响沙灘露奶俾人睇，關你哋要「道德塔利班」上腦乜事呢？

咁就想問：

• 當的士佬擺段餵人奶嘅車 cam 片上網，一個二個起勢鬧爆個的士司機正一仆街，仲要搞到報警撚召喚；
• 又响食店有阿媽除咗上衫俾個B啜奶，而有人叫個阿媽唔好做埋啲咁「傷風敗德」嘅事，叫佢去廁所餵，又全世界發晒癲叫嗰條友去廁所扒飯盒；
• 然後全世界嘈生晒話香港無為母乳餵哺提供足夠支援，尤其是設施方面。

點解仲係要「LIN 頭是不雅」嘅思想呢？

成件事根本又係 sexual associate 看待女性胸部作為出發點，從泛道德主義為基礎，認為女性不應在大庭廣眾露出胸部；又基於香港淫審處訂定嘅標準 (仲有 Facebook 嘅規條) ~ 見到乳頭就係不雅，於是乎就覺得成單嘢好唔掂，因而嘈起上嚟。

再拉闊啲去講，如果唔係阿媽餵奶，而只係一個正常身形嘅女仔响沙灘以至街上 Topless，你哋又會唔會嘈生晒吖？

紐約市有女性爭取街上 Topless 「合法化」(寰宇膠事錄 2012-6-28)，你哋唔去花園道3號抗議？係囉，又搬龍門話「外國人嘅價值觀點同我哋『中國人』呢」.....





女性夠膽不顧他人嘅性聯想露出自己對奶，那管任何目的，都係她的個人選擇。


呢個世界，唔計人妖、雙性人，唔係男人就係女人。男人就一定有啫啫春袋，女人就一定有波。正常又理性啲講，有乜值得好奇?! 講到尾，一切不過是泛道德主義形成嘅性壓抑，然後就基於對女性胸部嘅性聯想，因而覺得女性露胸 (甚至露 LIN) 是不該嘅事情，欲禁之而後快。

好心就唔好下下用性、道德去看待女人個胸啦。都係嗰句：前世未見過女人個胸咩!

延伸閱讀
夏天為大地帶來......
像天堂的懸崖 ─ 情與慾抉擇
高晧正仲有市場....





返回主頁

各位公安俾心機成就「一將功成萬骨枯」

電影《無間道》開場無耐，黑幫大佬韓琛 (曾志偉飾) 响一間廟入面對住一班準備投考警察嘅手下講咗呢句對白。跟住嘅三句：

但我唔信，我信命運嘅嘢係自己去選擇
你哋入到去之後想點行，你哋自己可以選擇
祝各位阿Sir 响警察部一帆風順

暗角七警今朝被裁定ABH (襲擊導致他人受傷)，即時還押候判。好多人認為正義終於得到申張而高興，但我嘅睇法係梁愛詩做律政司開始，DOJ 已變成一個政治操作嘅部門，黃仁龍時期就稍為頂一頂，但袁匪國強坐就唔只去返詩姑嘅Level仲變本加厲。如果再睇埋朱經緯個 case (根本夠料落 charge) 仲拖住，就更肯定七警單嘢其實都係一個政治操作。

好陰謀論？係架，但我講過好多次，共匪治下無嘢無 hidden agenda。暗角七警呢單 case 嘅政治元素，除咗俾 CCTVB 全程直播無得冚之外，《成報》爆咗 689同張匪曉明响 2014-9-28 打算開槍預計死500人。689 以至成個港共傀儡政權為求補鑊，就必定要搵人祭旗。仲有禿鷹亦要為求脫身，亦只能推啲伙記受靶。

港共公安部變質成有如前蘇聯嘅秘密警察，做嘢必會考慮政治因素，真係盲嘅都睇到。尤其是針對遊行示威，更加唔駛講啦。據夠膽漏料俾小弟嘅警察，當中嘅操作係警校課堂灌輸示威者係導致香港社會秩序大亂嘅元凶，必須強硬對付；仲有係洗腦指公安嘅職責就係維護政府嘅尊嚴。而响演習訓練，就以示威者 They are all terrorists, knock them down or you will be killed 推動採取武力。再加埋課堂會成日講「你哋先係法律專家，街上無人係」，就將班公安洗腦到亂噴椒當家常便飯。

另一方面，頭三年一定係contract basis，捱過咗就先開始計分排宿舍，一個二個新仔自不然搏晒老命搏扎。再另外，平時一啲細單嘢，通常環頭都盡可能同件老散冚、補鑊，件件公安認定「有乜事阿頭一定保住我」。加埋警校咁洗腦法，自不然就乜都夠膽死。

可是，啲老散 (尤其是近4-5年入職嘅新仔) 唔會諗「阿頭可以保住你個飯碗，但阿頭亦可以為咗佢個飯碗搵你祭旗」，更唔會諗港共之下佢哋只係一隻卒仔，無事就表揚下你、俾條紅雞你孭下，呢啲無成本嘅嘢等你哋 high 呀，有事就梗係推啲卒仔出嚟死，廟佳桑拿「老妨」案已經係最佳證明，但阿寶仍然充斥於整個公安部。

禿鷹雖然坐唔到保安局局長，但都叫做過咗海就神仙。佢留低大量蘇州屎，你哋班老散有排受。所謂「路就自己揀，仆街唔好喊」，你哋要做「萬骨枯」無人可以阻你，但記住「一將功成」係唔會多謝你。

今日暗角七警，聽日就應該朱經緯，他日就隨時輪到你哋！自己諗清楚啦。

返回主頁

敵人都無搞清楚，長毛還是請退下

一直以來，長毛係小弟唯一尊重嘅左翼香港政治人物。原因唔單只佢對理念嘅堅持貫徹始終，仲有一份義氣仔女講道義嘅風範。因此港燦們僅從 CCTVB 精心剪接電視畫面以為長毛只會搞事、响議事廳掟嘢，我都會不厭其煩著眾燦們睇下立法會開會直播睇清楚長毛嘅議政質素係非常之高。

特首選舉戰幔揭開以來，邊個宣佈參選我都闊佬懶理，支那共匪殖民主義之下邊個做都係得啖笑，確係原因之一，但唔係最主要的，而係明知北平中南海習、江兩派打交打到九彩，究竟「後事發展如何」係無可能有清晰嘅「下回分解」。極其量幾乎肯定 Mrs. Hitler 被統監府擺上枱做炮灰，連胡官到底葫蘆裡賣甚麼藥都睇唔通。

對於長毛參選，我嘅睇法唔係鎅票、白票、搞局曲線幫林門鄭氏助選，而係只懷著理念參選，就算全民普選又如何!! 走返到現實，要當選起碼601票，就算300+ 嗰327票俾晒佢，仲有274票根本係Mission Impossible。最多可以出現嘅效果只係响選舉論壇(如果有)入面有啲 Sound-bite 俾記者寫下，然後無事發生。即係得啖笑燒時間。

响政治嚟講，理念係好重要，但實踐唔到就都係廢話。當前係特首選舉，唔係政改咨詢，吹乜嘢爭取公民提名根本就係meaningless。爭取簽名支持呢樣嘢，說實在太簡單便宜；反而曾俊華透過眾籌得到嘅捐款人數，仲嚟得更有實效，因為就係涉及「錢」。所指嘅唔係 Uncle chips 籌到幾多錢嚟使，而係捐錢嘅過程對人產生嘅考慮相比簽名多好多。

最氣頂嘅係佢話出選嘅目的就係針對曾俊華。問題不是我的取態 (事實上我未有取態)，而係開口埋口就是「敗壞嘅制度」「邊個當選都係傀儡」，林門鄭氏唔係傀儡咩?!再者，學「村長」黃浩銘話齋睇Track record，林鄭條八婆唔仆街得過薯片??

長毛日前話「不認同中聯辦能夠抵抗中央，操控香港政治」，呢句簡直荒謬。喂阿哥，張匪曉明過去咁多年做咗幾多嘢，你盲架?! 中共權鬥江派習派互片，張曉明作為江澤民駐港頭號馬仔，比起習近平一派只能遙遠控制操盤，响特首選情形勢同操盤邊一派比較佔優唔駛多講。當然，習近平亦唔係善男順女，唔會對香港整體有利；但江派嘅所作所為對香港造成嘅破壞就係事實、就係歷史。長毛從政資歷之深連咁都唔識分析，真正嘅敵人係邊個都無搞清楚，唔係嘛阿哥。呢樣嘢就使小弟火山爆發。

《孫子兵法》謀攻第三：

故君之所以患於軍者三：不知軍之不可以進，而謂之進，不知軍之不可以退，而謂之退，是為縻軍。
三軍既惑且疑，則諸侯之難至矣，是謂亂軍引勝。

要直接地解畫，即係明知不可為而為知，就是憨鳩 (糜軍)。就算唔計當年鬧何俊仁、梁家傑，搬龍門搬到難以服眾，搞到幫共匪抬轎、尤其是前述形勢同操盤佔優嘅一派 (亂軍引勝)。

選舉條例唔可以講明叫長毛退選，但呢個爛局唔搞返掂，社記隨時早過民協亡黨唔係無可能。

返回主頁

封殺柴油私家車為益油公司，亦係為皇冠車行

上一篇提到環保署助理署長莫偉全 (疑似) 遷就豐田 Coaster 上唔到 (未上到) Euro 6，零零舍舍俾小巴同「28座」維持 Euro 5，末段提到「仲有另一單涉及私家車嘅古惑嘢」。所講嘅係提交俾立法會嘅文件入面建議將柴油私家車嘅排放管制由LEV II 提高至 LEV III。


呢單嘅古惑之處係莫生重演1998年佢仲係主任級時嘅劇本。

1998年準備實施 Euro 3 修訂《空氣污染管制(車輛設計標準)(排放)規例》(Cap. 311J) 時，所有車種跟歐盟，唯獨柴油私家車就跟美國 EPA LEV 排放標準，相當於Euro 5。但當時全地球無一間車廠可以生產到呢個標準嘅柴油車，即係變相封殺柴油私家車。只是法例嘅嘢太複雜又或小農奴隸基因「我唔識政治」，搞到港燦以為港共禁止咗柴油私家車出牌。今次莫貪官提出嘅LEV III，同樣地都係全地球唔會有車廠生產到呢個排放標準嘅柴油私家車，再次借法例嘅技術嚟「禁」柴油私家車。

好多港燦受到港共傀儡政權十幾年嚟嘅洗腦，以為柴油車係路邊空氣污染元凶。但先睇以下我曾經拎嚟响立法會打到莫生趴低嘅表：


表面上Euro 5柴油車嘅 NOx 排放比電油車高3倍 (莫生响2011年1月17日立法會話5倍，搞到我要出動 P&P 告佢作失實或虛假陳述先識縮)，Euro 6 就仲相差30%。但要留意排放標準測試 (Test on bench) 係模擬引擎處於峰值輸出80% 狀態行駛嘅數據，而實際行車時柴油車所需嘅馬力同扭力輸出比同排氣量嘅電油車低最少20%。簡單講就係柴油車嘅實際排放會比測試低兩成，即係可以理解為Euro 6 柴油車嘅實際 NOx 排放同電油車係無分別。若果連埋HC (Non methane hydrocarbon) 同 CO 嘅限制，甚至再做 Study 比較 CO2 排放柴油車比電油車低最少15%，根本柴油車比電油車更環保。

只不過柴油車嘅耗油量比電油車低20 - 30%

BMW 530i (1998cc) vs. 520d (1995cc)

Mercedes Benz E220d (1950cc) vs. E200 (1991cc)

對於油公司嚟講就係唔見錢。

「政治化」推高幾個層次，美帝走狗嘅全球戰略考慮因素之一就係石油能源消耗同價格嘅關係，油價係「拗手瓜嘅籌碼」，尤其是對住沙地阿拉伯同伊朗。如果「放緃」柴油車即係減低石油能源需求而油價受壓，莫講話影響侵總統做嘢，就算奧巴馬都有難度。但是「政治就是不能直接操作」，咪唯有借環保之名做事，美帝走狗借制訂 Mission Impossible 排放標準封殺柴油車。莫貪官响1998年同今次其實都係「勾結可恥美帝走狗」搞呢場大龍鳳。順帶一提，VW 柴油車排放造假醜聞其實係咁嘅背景之下發生，所以應該左賊上身「針對政權」而不該遷怒於VW。

返回香港。莫生响文件中提到柴油免稅，所以要再次封殺柴油私家車。

事實上呢單嘢又係因為莫生响1998年場戲搞出嚟，佢以為全世界嘅車廠唔可能參演到《職業特工隊》，可以盤算將汽車燃料同車種掛勾，然後部署可以應酬運輸業。可見呢件貪官無長遠眼光！

要油站向柴油私家車徵收返燃油稅係絕對可以做到，參考如行車隧道按車種收費嘅做法就是了。只不過柴油(現價)約$9.6/L，比扣除每升 $6.06 燃油稅電油淨價約$8.9/L還要高約8%，但柴油車耗油量低兩成或以上，即是每架柴油車導致油公司收益減少起碼15%。

參考歐洲柴油車市場佔有率近半而假設香港有30%私家車改用柴油車，平均每架電油私家車每月入油200升：

500,000 x 30% = 150,000 架柴油私家車
150,000 x 200L x 20% = 4,500,000升燃油
4,500,000 x $9.6 = $43,200,000 x 12 months = $518,400,000

每年5億呀，你係油公司 CEO 點會唔同莫生「死過」！

再仲有的，港共傀儡政權不斷俾中石化、中石油「中標」開新油站或接手現有油站 (例如堅拿道天橋底原為Shell 變成中石化，公主道 Esso 變成中石油)。支那共匪「石油幫」就是江澤民派系嘅一部份，雖然石油幫「坐館」周永康已被打入天牢，但江匪點會唔叫 689 嘈呀！

油公司嘅利益問題該明白了。哪麼同豐田霸權又有何關係？關鍵就係石油氣的士。

黎銘洪先生生前成日同我傾嘅其中一個話題，就係爭取的士可以用返柴油車。杜絕皇冠車行壟斷當然係原因，最主要嘅出發點係唔駛的士司機嘥時間排隊入氣。





但如果批准私家車可以用柴油車，的士業界就必定有所行動。若果成功打開缺口，就算 Crown Comfort 唔停產仲邊會有的士佬買呢件垃圾呀！

豐田日本廠方公佈咗新款 JPN Taxi (如下圖)，


的士業界望到架車個樣已經唔開胃，再望埋規格而機器 (流傳其實) 係二代Prius 的1,500cc + Hybrid 轉用石油氣，直情掉頭走即閃。

但堵塞住柴油私家車呢個缺口，唔俾的士業界有出聲嘅機會，限住的士繼續用石油氣，咪可以皇冠車行賣垃圾而的士佬都焗住要用囉！再者，俾私家車用柴油車，咪更多人出嚟做 Uber，點同譚匪惠珠呢條八婆交代呀！

再講一次：港共响運輸方面嘅嘢，黑到你唔信!!!

後記：皇冠車行母公司英之傑集團知道石油氣的士霸權終有一日會被K.O.，所以响2012年由森娜美手上搶到福特代理權之後，急急腳將 New York City 做的士用CNG嘅Transit Connect 為基礎，改 fuel circuit 變做燒石油氣引入香港。而歐洲原裝規格係柴油，等石油氣的士霸權遭摧毁後都唔駛全軍覆沒。

延伸閱讀
的士加價為推高牌價方程式
皇冠車行食得禾米多
的士業嘅謀生困局
審計署繼續為霸權政策抬轎
香港該全力推動使用生物柴油





返回主頁

港共為保住皇冠車行乜都夠膽死

過去多篇文章 (詳見延伸閱讀)，提及港共傀儡政權為捍衛老懵董時期行政會議成員錢果豐曾經擔任公司主席嘅英之傑集團旗下的皇冠車行嘅豐田霸權，涉及嘅衙門部門除咗運輸署之外，仲有環境保護署。最近環保署掌管負責汽車排放管制工作嘅流動污染源管制組嘅助理署長莫偉全又有新力作。

舊年12月19日立法會環境事務委員會會議議程V. 建議收緊新登記車輛廢氣排放標準，環保署/環境局提交文件，建議2016年12月至2019年9月分階段實施歐盟六期標準 (Euro 6) 排放管制。不過，就以「待本地市場有充裕的歐盟六期車型供應」為由，對總重(G.V.W.) 9噸以下的巴士及小巴暫緩執行，維持現行Euro 5標準。


在分析「官商勾結輸送利益皇冠車行」豐田霸權同呢份文件有何關係，先表明立場：Euro 4 同 Euro 5 技術同實際使用都仲有大堆問題未有妥善解決之前，實不該上腦的「跟歐盟同步」的急急實施 Euro 6。

不過，從官場打聽所知，莫偉全急於推行 Euro 6 以圖「立下功名」光榮地退休，小弟就依家「送佢一程」！

「小巴」是甚麼車種該不用詳細解釋。何謂「總重9噸以下的巴士」，相信唔熟悉汽車嘅各位都一頭霧水。

根據現行《道路交通(車輛構造及保養)規例》(Cap. 374A)，巴士總重上限係24噸。總重接近上限的例子就如專利巴士所用的ADL Enviro 500、Volvo B9TL 三軸雙層巴士。兩軸巴士的上限 (唔計嗰堆「公眾利益」批准的豁免) 是16噸 。接近16噸的例子就如平常所見的45座以上俗稱旅遊巴士嘅非專利巴士。

哪麼「總重不超過9噸」的又是甚麼車? 就如坊間俗稱「28座」的豐田Coaster XZB59 (下左圖)、三菱 Rosa BE640J (下右圖)。


總重分別是5.7噸同7.3噸。大家應該開始聞到陣「又係為咗皇冠車行」的味道吧！

日本豐田車廠响舊年12月正式宣佈推出全新Coaster 小巴 (B60/B70系)。

所謂「全新」不過是新車身設計，底盤其實同現役的B40/B50系是一模一樣，甚至引擎仍舊是因為燒碳同容易壞到你唔信、小巴同旅遊巴業界聞風喪膽的N04C。

根據日本豐田汽車網頁 (如以下截圖)

N04C 的排放標準仍只是「平成21年」，即相當於Euro 5。

至於目前市場另一主要車款三菱 Rosa，雖然就算近期曝光的捷輝小巴新車都只是Euro 5，但採用同款4P10引擎的Canter 貨車已有 Euro 6。若再追查呢款引擎其實係意大利快意集團 (Fiat) F1C 系引擎的背景，快意集團旗下的 Iveco (港譯：歐霸) Daily 客貨車/小巴/輕型貨車，亦早已經推出 Euro 6 規格。即是理論上 Rosa 隨時可以上到 Euro 6。

單是將現有本港市場兩個車款做對比，已經是證明莫偉全再次為維護皇冠車行，仲要斷到正晒！不過好戲在後頭......

戲碼之一，係舊年抵港的廈門金旅客車的 XML6701小巴

採用的Cummins ISF3.8 引擎，是 Euro 6 的。
(嗱，先唔好理係咪會成龍爆炸，就是有多一個Facts先係重點)

再仲有近期吹風嘅低地台小巴，除咗Hino Poncho 之外，另外兩款 (已曝光的Optare Solo；另一款也該是歐洲車，可能係平治Sprinter 或是Fiat Ducato，仲未收到風)，都係Euro 6！





撇除低地台小巴嘅長度同車重問題尚是未知之數，成件事嘅非常簡單，就係因為豐田上唔到 Euro 6，莫偉全呢件貪官為遷就呢個 (唔知濕咗幾多水俾佢) 「主要車型供應」；或反過來說，如果連小巴同「總重9噸以下的巴士」上 Euro 6，皇冠車行就唔駛再賣小巴同「28座」，成個豐田霸權就玩撚完！莫貪官可以唔認，但小弟就會問：

三菱ROSA 唔係車呀？唔係另一個「主要車款來源」呀？小巴佬旅遊巴佬唔買得呀？來自習近平曾主政之地廈門市嘅金旅客車都上到 Euro 6，唯獨豐田「未上到」，仲唔係遷就豐田咁係乜呢？
你俾到其他答案過我以至全香港市民，就請你去大排檔食一餐 (唔超過$500 無觸犯《防止賄賂條例》)

至於戲碼之二，就係提交俾立法會嘅文件中，「香港巴士業供應商聯會的意見由不逾7噸改為不逾9噸」。

當中嘅「古惑」係現時本港市場上超過7噸的「巴士」主要係三菱 Rosa BE640J (7.3噸)。如果寫7噸，又或者「跟歐盟」寫7.5噸，豈不是露出馬腳?! 寫9噸 (以為可以) 掩人耳目嘛 !!

仲有第三個戲碼。來自本地市場同日本方面消息，最新 B60/B70系豐田Coaster 將不會為香港特製 7.7m 長度規格，即是「28座」市場皇冠車行將會全軍覆沒。如果唔設法保住小巴嘅霸權壟斷，皇冠車行商用車輛部班SALES食屎呀！而既然莫生 (疑似)「收咗唔少好處」，點可以唔為「主子」做返啲嘢呀！

相信大家覺得呢單料夠爆。不過........得閒整理好先再唧牙膏。

後記：今次修訂Euro 6 嘅文件仲有另一單涉及私家車嘅古惑嘢，都係擇吉撰文分析。總之港共响運輸方面嘅嘢，黑到你唔信!!!

延伸閱讀
豐田驗車唔係盡享特權真係搵鬼信
19座位為平衡其他運輸業利益只係藉口
皇冠車行食得禾米多






返回主頁

尖沙咀地鐵縱火盡現港燦嘅劣質

循例地先向18名傷者表達慰問，祝盡快康復。



昨晚事發時，正在歸家路上。藍芽耳機不斷發出新聞apps 的prompt 響聲，安全情況下望望手機，第一反應係諗「發生乜嘢事」，然後就提醒自己等進一步消息，不要妄下判斷事件起因及犯案動機。

可是返到屋企開完貓罐後開電腦，一個二個福爾摩斯、柯南上身，推敲犯者唔係痴線佬，就係協助內容農場發佈假新聞，話係人狗交事主，要向港燦報復同歸於盡云云。

新聞專業基礎操守，就係Facts check, verification and clarification，簡單講即係查證同核實。港燦們一邊廂批評近年傳媒新聞質素低落，另一邊廂就自己就犯晒新聞專業基礎操守。莫講話「有乜嘢讀者就有乜新聞質素」咁高深，單係平日啲辦公室政治、姨媽姑爹三姑六婆事非，咪就係一樣無做查證同核實然後人云亦云而導致。最可笑嘅係命仔悠關都繼續呢種習慣模式，實難怪俾人恥笑港燦、港豬、港喱。不過都仲未夠劣質......

新聞系課堂總會討論一個問題：

若你身為記者，發生意外有人受傷、或見到有人準備自殺，你會先救人定準備影相採訪？

記者天職 vs. 人性本質問題，的確拗餐懵。但作為尋常普通人，應該有理無理都梗係救人為先。但尋晚事發後，一個二個就「記者上身」，掛住拍片不顧危險。本來從新聞角度，有呢啲第一現場相片、影片係好重要，但港燦們嘅心態並唔係真正的「記者上身」，而係諗住唔拍片upload 上網「示威」，有如「執輸行頭慘過敗家」嘅思想。但仲有更仆街嘅情況，就係疑犯著晒火走咗出去月台之後，無幾多人有intention 去救火，個個仲繼續掛住影影影。

另一方面，消防員訓練有一句格言：

入到火場第一樣嘢要諗嘅就係自保。呢個唔係自私，而係你保住自己就可以救好多個人，但你一出事就要好多個同僚嚟救你。

套入尋晚嘅事件，你掛住影相拍片，隨時搞到自己受傷而要好多人嚟救你。由此可見港燦嘅所為係幾咁不負責任。

至於有人提及一眾港豬好似唔知車卡、月台有滅火筒，我嘅睇法唔單只係港燦們無危機意識，就是自私自利思想驅使而根本毫不在乎任何安全設備嘅存在同運用。

加埋港燦嘅腦袋已被港共傀儡政權洗腦，使用公共交通就除了鐵路還是鐵路，唔好話全無意識港共嘅交通運輸政策是如何仆街，最基本的如果無人提巴士、小巴、渡輪，地鐵出咗事就全無意識有其他交通工具可以用，所以就算有呢位城巴唔知站長定稽查屌鳩我



我都只係會一笑置之，因為除咗响疑犯身旁而受傷嘅人係值得關注、同情之外，港燦根本就係抵撚死的！

後記：有唔少朋友問我「既然你都睇到港燦無藥可救，仲寫咁多嘢、做咁多事嚟做乜？」我嘅回答「一切做的寫的只為立此存照，以便他日可以癲佬上身通街鬧爆港燦港喱港豬點樣累死香港。」

返回主頁

的士加價為推高牌價方程式

港共批准的士加價，唔少人想到會有更多揀客、拒載、劏客情況發生。部份人會聯想到「炒牌」，但未必明白當中嘅關係，同的士服務百病叢生嘅「生態鍊」是怎樣煉成的。

過去我曾經多次講過如下圖嘅邏輯運作，

但相信大家都未必完全掌握，趁這機會詳細解說一下。

首先，要知道的士牌牌主大多數都有做按揭貸款。就我所知銀行、財務公司會借出估值70%，利息P-1.5% 至P-2.75% p.a. ，年期上限多數20年，有個別可做到25年。

以2.5% p.a.為例計算，年期20年，貸款額每100萬的每月還款額約$5,100.00。目前牌價約660萬，即：

6,600,000 x 70% = 4,620,000 ÷ 1000000 x 5,100 = 每月還款 $23,562.00

現時市區的市車租早更 $460，夜更 $410，合計$870 x 30日=$26,100

$26,100 - 23,562.00 = $2,538.00

即是車主仲有少少錢落袋。

當批准加價之後，車主就會同租車司機講「加咗價，搵多咗，梗係要加返少少租啦」。通常一更加$20 - $30。兩更合計每日多最少 $40 車租收入。

$40 x 30 = $1200

將呢$1200 撥入去還款安排計算：

1200 ÷ 5100 x 1000000 = 235,294

「因還款能力增加」而牌主可以向銀行 / 財務公司申請加按；然後的，銀行 / 財務公司會基於呢個數據，提高牌價嘅估值。於是乎一眾的士牌「投資者」(實為「炒家」) 就可以向外宣稱牌價上升，而幅度就是大約20萬。即是過一段日子就會見到牌價升至大約680萬。

是否小弟生安白砌、故弄玄虛作故仔出嚟，唔駛懷疑嘅，去問下譚惠珠就得架喇。不過佢夠膽答你就太陽由西邊升起！但有個情況可以引證得到呢個我稱為「炒牌方程式」嘅可信性。

2013年12月，市區的士加價，落旗由$20 加至 $22，每一跳由$1.5 加至$1.6。的士牌價由2014年年初約680萬，响2015年5月升至最高725萬。




前述嘅算式反映咗每更加租$20 就牌價估值推高20萬，當時車租由3字升上4字頭，的確加咗最少$30。

班炒家食髓知味，於是响2015年再申請加價。但相信因為立法會「公共交通策略研究」太多針對的士嘅負面聲音，兼運房局提交俾立法會嘅文件指租車司機收入不升反跌，最終被BAN。加埋 Uber 等市場因素，牌價就一直插水。

舊年4月的士都申請加價，但最終又係被BAN，牌價再進一步受壓跌穿600萬，最低見580萬 (2016年6月)。


簡單講，加唔到價就加唔到租，仲要因為多咗人搭Uber 或者Call 客貨車，司機收入更見收縮。而當時嘅車租係稍有下調，夜更舊車租金最低見$360。車主「還款能力」低咗，「估值」就自然下降，牌價咪應聲下跌囉！亦所以的士狗點解要咁針對 Uber 同客貨車，就係希望消除一個妨礙佢哋「加價然後加租」嘅市場因素。

而另一邊廂，因為市場因素少咗人搭的士，司機為咗應付交租同入氣合計每更成本約$700，講緊仲未計排隊入氣耗掉時間接近一小時而起碼做兩枝至三枝旗，涉及車費大約$120 - $150，無形中每日孭住$1000「皮費」，點可能唔加入「八折黨」，甚至要做「黑的」响遊客區冚旗揀客劏遊客吖。

的士佬或者會「黃子華上身」── 搵食啫犯法咩。但由2008年實施「短加長減」以嚟呢接近十年，面對車主 (炒家) 同氣站嘅欺壓，佢哋嘅態度同反應只係忍氣吞聲；又甚至皇冠車行壟斷市場，日圓匯價下跌但車價加跌反升，有人出聲爭取用返柴油車 (包括小弟同黎銘洪先生) ，佢哋就只會「政府想點就點架啦」同「唔駛搵食咩，搞咁多嘢」。佢哋嘅然唔爭氣，甚至可以話有得俾炒家恰，所以唔好怪人 (尤其是小弟) 近幾年對的士佬只會落井下石踩多兩腳。

順便講埋今次689批准的士加價嘅政治考慮，就係為支那匪區嘅炒家响支爆之前作「最後衝刺」，炒高10萬又好20萬又好。另外仲有港共响放寬小巴座位議題諸多藉口刁矯扭擰，除咗要維護皇冠車行响小巴市場嘅霸權之外，就係希望「等極小巴都等唔到上車」轉搭的士的情況可以持續，盡可能俾的士佬搵水，唔係點加租呀！

成套的士管理制度就係咁邪惡，所以大家可以唔飛的就唔飛的好了。

註：以上牌價走勢圖表，來自「的士聯合交易所」網頁 http://taxixchange.com/taxixchange/a_license_reward.php

延伸閱讀
的士狗點解追殺Uber同客貨車，都係為咗炒牌

返回主頁

左賊仲衰過港女

點解咁起題? 不如先重溫經典語錄之「港女同男友去食飯」：

男：想食乜吖BB
女：唔知呀，你諗啦
男：日本嘢啦，你最鍾意架喇
女：鍾意都唔係成日食架，你唔厭我都悶呀
男：咁韓燒囉
女：好熱氣呀，又食肉獸，你想谷肥我都唔駛咁吖
男：唔想熱氣又唔要食咁多肉，不如去食齋吖
女：齋舖好油架.....
男：我知有間素食好正，啲嘢唔肥膩架
女：都話唔想食齋咯
男：越南嘢好唔好？唔油喇，又唔一定煎炸，啱喇掛
女：邊個話唔油架，啲檬粉油淋淋架
男：不如去買嘢返屋企煮啦（借啲意想扑嘢）
女：又要切又要洗，食完又要洗碗
男：（開始不耐煩）我煮我洗喇，好唔好
女：你煮即刻有得食呀，又要等
男：（發老四）呢樣又話唔好嗰樣又話唔好，咁你想點呀
女：唔知呀，是但啦，
男：咁即係點呀小姐？

近期特首選舉，左賊就同各路人馬某君s 咁樣拗法：
某：林鄭係689 2.0，一定要阻止佢當選
賊：薯片都係煲呔2.0，同樣係一件垃圾
某：孽瘤直頭惡毒，胡法官雖無管治經驗，但起碼夠正氣
賊：爛制度就邊個做都唔會做得好。我哋要爭取全民普選特首
某：依家就係無得全民普選特首，咁唔好唔駛人做？
賊：都話爛制度就邊個都唔會做得好。我哋要針對政權，爭取普選特首
某：家陣唔係政改咨詢，點爭取呀？
賊：總之要爭取，唔可以容讓呢個敗壞嘅制度繼續落去
某：你識唔識乜嘢叫時勢架？依家個制度就係咁，你唔搵個Lesser evil 定住先，點走下一步去改變個制度？
賊：民主唔係揀個Lesser evil，而係要得出一個以民為本嘅人
某：咁如果唔頂住，最終係一個比689 更衰更壞嘅人當選，咁點先
賊：咁咪要求重啟政改，摒除8.31，繼續爭取全民普選特首
某：一個比689更差嘅人會做出你想要嘅政改咨詢？唔好玩啦
賊：制度一日唔改，邊個做都係一樣咁衰。
某：你都未話我聽可以點爭取喎
賊：只要中國民主化之後，就會俾香港有民主。所以我哋要建設民主中國
某：建設咗三十幾年都仲未建設到，仲要搞壞埋香港嘅制度。面對現實香港响支那之下根本唔會有普選
賊：香港同中國係不容分割。別妄想搞港獨啦
某：依家唔係講港獨，只係想知道點樣去爭取香港有民主普選特首。等重啟政改咨詢，蚊瞓啦。
賊：只要繼續堅持爭取，就有成功嘅一日
某：依家係問你點爭取呀。等咨詢跟住一人一信呀？做咗咁多次都係咁，唔好諗住重覆做1000次同一件事最終會有唔同結果
賊：咁你去搞港獨搞革命囉
某：如果港獨可以有民主點解唔去獨？係你堅持香港中國不容分割咋！搞革命？你哋唔走出嚟話「得罪中央無運行」，都大吵大鬧「邊個衝邊個係鬼」啦
賊：總之我哋要爭取普選特首、不要假選舉

左賊講嚟講去，只不過係以所謂政治道德立於不敗之地，同港女其實一膠樣。只是港女最多搞到俾路人食花生，頂多同條仔嘈交甚至分手，但左賊嘅刁喬扭擰，就隨時搞冧晒成個香港。文題就係咁得出嚟

返回主頁

唔該曾俊華找咗美食車條數

公開信
致特首參選人曾俊華

曾先生：

不要說美食車先導計劃的食品貴

爛攤子是你搞出嚟，唔該收拾殘局

美食車先導計劃是閣下仍為財政司司長於2015-16年財政預算案提出。發表之後引起社會各界熱烈討論，當中最多的意見認為以預計造價達港幣70萬至100萬，只可以是高消費食品而不可能做到「平民美食」。而批評聲音還有替代建議，包括如何降低造價，重新推動和策劃熟食小販牌照政策，使俗謂「街頭美食」能達百花齊放，欲經營的都有豐儉由人的謀生機會。本人亦曾在報章撰文(《蘋果日報》2015年6月9日)，具體說明可如何落實這些民間意見，並提及台灣和日本的例子指出可行性。可惜，曾先生閣下以至整個特區政府都聽不進耳，硬推這個只有豐厚財政實力才能參與的「遊戲」。

曾先生閣下日前與夫人到尖沙咀光顧美食車，有報導引述閣下認為食品價格偏貴。在回想提出美食車先導計劃以來的意見，實在失笑和感到極大的諷刺。

除了食品價格問題「不幸地」被準確預測之外，本人另一個關注的議題是車輛方面的，包括規格安全和車款型號。

曾先生須知道本人曾從事汽車業(包括代理買賣、維修)多年，因而有廣泛的消息來源渠道。有消息指已開始營運的美食車都有超過核准車輛總重，運輸署為美食車進行驗車時採取「特事特辦」批准驗車合格。雖然以本人對有關車款的技術數據的了解，該未有超過車廠的設計總重上限，單純理論層面估計該不會構成太大安全問題，但驗車過程是否太過草率，甚至運輸署負責驗車官員濫權的可能，是必須正視的問題。

至於採用的車款型號，11架已曝光的美食車，其中6架採用的底盤為HINO 300型號。表面上雖然是商業決定，自由市場原則之下本無需過份猜度。但是 HINO 香港代理商皇冠車行有限公司，特區政府過去17年多項涉運輸政策都產生對皇冠車行汽車銷售有利、甚至形成壟斷的效果，當中包括石油氣的士小巴計劃，與及近期放寬小巴座位和關連的低地台小巴試驗計劃。特區政府當然否定有官商勾結、輸送利益成份，但實際情況是難免惹人扣上帽子，無法排除的。

美食車先導計劃已可以作預計判斷為失敗收場，或至少肯定是難以平民化。再者涉及運輸署運作、甚至不排除有道路安全風險；而且無法不聯想到再次發生製訂政策以向汽車代理輸送利益之嫌。有請曾生公開交代回應以下問題：

1. 雖然美食車先導計劃為期兩年，但既然食品定價並非「平民化」，有必要盡速作出檢討。包括重整熟食小販牌照政策，達至任何有意經營者都有豐儉由人的機會？
2. 要求特區政府，尤其是運輸署交代「超重」傳聞。如果屬實，除必須要有官員問責，還必須在道路安全原則之下作出修正。但如果確實存在道路安全危機，必須立即停止營運？
3. 特區政府過去17年多項涉運輸政策都產生對皇冠車行汽車銷售業務構成有利、甚至可以壟斷市場，而事有湊巧美食車先導計劃亦有相同情況出現。得交代整個計劃草擬過程中，涉及的政府部門和官員名單，和曾經發表過的意見，以讓本人以至公眾了解可會又在重演石油氣的士小巴政策的歷史。

恕本人諸多挑剔，甚至有如雞蛋裡挑骨頭。但作為近年重點研究和評論涉及運輸政策的所云社會意見領袖，實不得不責難曾先生閣下。

時事評論員 林鴻達
謹啟

2017-2-6

返回主頁