__

__

尖東肥貓忌廉哥

筆者攝於2011年12月一個早上。當時還未「紅」
呢隻肥貓相信依家香港無人唔識,但相信大多數都係因為佢曾經懷疑被擄走上報而先認識。筆者鍾意周街撩貓玩,早幾年因為工作關係响尖東一帶出沒已經見識過呢隻肥嘢!

近期的確紅爆,紅到拍廣告、出月曆,甚至出書。今晚本來會經過尖東打算路過探望下佢哋兩公婆,點知去到人頭湧湧,但其實都見怪不怪了。碰上記者老友才知道新書開售。同佢兩隻肥嘢影相之餘都有幫襯返一本


與其話係書,不如話圖冊比較合適,但都有文字介紹忌廉哥嘅故事。其中一章講到佢嘅身世,可以話係貓版醜小鴨 ── 老豆老母係 Breeder 所養,打算配「較值錢」嘅Blue-grey 出嚟,點知嗰胎零零舍舍出咗隻「無咁值錢」嘅Creamy Colour,前半生受盡白眼同欺凌。直到高生高太收養咗佢同擺响舖頭之後就成隻生猛晒,似返隻貓!呢段「貓生經歷」使筆者更加肯定要加快立法杜絕寵物販賣,遏止啲Breeder為求賺錢迫使啲貓狗做性奴,甚至有更多初生寵物重演忌廉哥的前半生

所謂「貓」紅事非多,有說法指高生高太視佢同妹妹為招財貓搖錢樹,亦有說法由此衍生出來,指高生高太根本不會愛護動物,拍廣告印月曆出書搵埋唔少。筆者無去考究亦唔想評論,但上星期日出席青衣城一個動物組織的活動,賣月曆嘅收益會撥歸有關組織就公佈晒出嚟。至於賣書嘅收益,筆者有問過高生,佢亦好直接同我講,一切由發行商發落。

或者換另一個角度去睇,日本都有隻 Maru 嘅英短紅爆Youtube,同樣有拍廣告出商品,為何日本人可以咁做而香港人唔得?!

但既然隻肥嘢唔怕人,算係樂意為人帶來歡樂,何須執著呢?!亦好現實講句,買貓糧都要錢,忌廉哥亦步入中年身體要緊,更是業主可會…………你懂的!

不過,大家去搵隻貓嚟尋求歡樂嘅同時,亦應該注意應該如何對待、保護佢。佢唔怕人唔代表可以任你魚肉,唔好話「你摸佢有摸」隨時搞到佢惹到皮膚病所以要絕對禁止之外,太多人哄埋去而有嘅心理壓力,莫講話人,貓嘅壓力隨時仲大。所以唔好成堆人圍住佢 ,更加唔好大聲呼叫。影相勿用閃燈呢個亦係常識,依家求其搵部電話嘅影相功能都Night Mode 可以加大光圈,暗得滯影唔到唔該下次請早。筆者更會認為,人哋養隻貓俾你玩唔係奉旨,雖則高生亦曾經向我明言「最緊要大家開心」,但我還是建議「係咁意買枝水或者一包香口膠」,體現香港人嗰種禮尚往來互相尊重嘅精神吧!



返回主頁

沒有留言: